Read Maram Naga JON 15 Bible Online

JON 15 - Maram Naga bible

JON 15

¹“Kasang darkha bangtei I-le, sateichii darkha toipyiilu katiipii tei gu Pfiile.

²Gudato kalei ti mati kasu kha hang gotei mpounii tat toileile, sateichii ti kamati kha hang gotei kisii ti mati matutang karam jangpii mpounii tiimateile.

³Inii gonyiigo ralikapyii teipiinii gonyiigo tiimateipyii aitakle.

⁴Gudato taksupii leilo, sateichii Inii gonyii dato taksupii leitangle. darkha bang kiteito kha teinii taksupii lei sule- ponii, ah roinapii ti matipei kalak takumpii, gonyiinii gudato taksupii lei suleponii, gonyiido ti matipei wolakle.

⁵“Darkha bangtei I-le, kha hang- tei gonyiile, gudato taksupii kalei ninado Inii ah dato taksupii kalei ahteinii ti hangniikii matile; kada- pokii I-haisupiinii gonyiinii samah kado tiipei wolakle.

⁶Mei kata hang- ninanii gudato taksupii lei suleponii, ahgo kha takumpii toido toile taido taiga tule; sateichii ahnyiinii teigo tei poi nkom wosii mi sumkii toikaisii rutoi leile.

⁷Gonyiinii gudato taksupii leileponii, sateichii gumah samkang hangtei gonyii dato taksupii leileponii; gonyiinii kamarei hangtei khanglo, sateichii teitei gonyii dakii pyiitangle.

⁸Gonyiinii ti hangniikii matisii, aitiisii gonyiinii gumah boumei tiikatu aipiinii gu Pfii mah pumtei kava tei mangoule.

⁹Pfiinii n-gu lungkasyii takumpii, Inii gonyiigo lungsyiile; gonyiinii gumah lungkasyii kito taksupii leilo.

¹⁰Inii Pfii mah kakhatsam hangtei swi wosii, mpoumah lungkasyii kiteito kalei takumpiinii, gonyiinii gumah kakhatsam hangtei swiwo leponii, gonyiinii gumah lungkasyii kito taksupii leitangle.

¹¹“Gumah ka-nta ai gonyii dato leimatu tang karam jangpii; sateichii gonyii mah ka-nta tei matwi mashang matutang karam jangpii, sam hang ai Inii gonyii dakii tam takle.

¹²Inii gonyiigo lungkasyii takumpii gonyiido hangninanii hang- niniigo kalungsyiilo katu ai gonyii dakii pyiikalei kakhatsamle.

¹³Mei kata hangninanii mpou mah kangmei jangpii tai kapyii; aidoito mei kado lungkasyii dikaki gale.

¹⁴Inii gonyii dakii kapyii kakhatsam hangtei gonyiinii swileponii, gonyii ai gu kangmei hangle.

¹⁵Nlailoisii Inii gonyiigo ki kaleimei latloi lak takle, kadapokii ahmah pumpiinii katii tei kikaleimeinii timakle; nlenii gonyiigo kangmei lat takle; kadapokii Inii Pfii dato shii kalu hangtei Inii gonyii dakii mati takle.

¹⁶Gonyiinii n-gu kalai makle, nlenii gonyiinii mangsii ti mati matutang karam jangpii ninado gonyii mah ti tei leimatu tang karam jangpii sateichii gonyiinii gu zei kito Pfii dato kakhang hangtei mpounii gonyiigo teitei pyii matutang karam jangpii, Inii gonyiigo kalai takle ninado bam kaipyii takle.

¹⁷Gonyii hangninanii hangniniigo kalungsyii matutang karam jangpii kakhatsam ai Inii gonyii dakii pyii leile.

¹⁸“Sazyii pouryiinii gonyiigo ngourou leponii, gonyiigo ngourou kasunakii n-gu ngourou takle katu gonyiinii tilo.

¹⁹Gonyii ai sazyii pouryii mah leponii; sazyii pouryiinii mpou mah sek takumpiinii gonyiigo lungsyii tangle. Nlenii gonyii gonii sazyii pouryii aito Inii kalai wotakle, sateichii gonyiinii teimah makle; teijangpii sazyii pouryiinii gonyiigo ngourou leile.

²⁰Kikaleimei teinii ahmah apumpii sung kisii dibwi maklesii Inii gonyii dakii tam katu samtei maning gonglo, ahnyiinii n-gu tiikamage leponii; gonyii godo tiikamage tangle, ahnyiinii gusam swileponii, gonyii samdo switangle.

²¹Nlenii gu zei jangpii ahnyiinii aihang ai gonyii dakii tiitangle; kadapokii n-gu lang kamagong ah gotei ahnyiinii timakle.

²²Inii gongsii ahnyii dakii tam suleponii, ahnyii mah kem tei leilakle, nlenii aitoinii ahnyii mah kem magapyii tang karam gatakle.

²³N-gu ngoukarou meihang teinii gu Pfii godo ngouroule.

²⁴Mei kaniido tiikasu tha tei Inii ahnyii kak kikii tiimangou suleponii, ahnyiimah kem tei leilakle; nlenii aitoinii ahnyiinii n-gudo gu Pfii godo ngoudo ngoutakle sateichii ngoudo ngourou takle.

²⁵Ai ai ahnyiinii akaang gasii n-gu ngourou takle sii ahnyii mah ajaitingshang bung kikii ryii kabam samkang tei gong matwi matu tang karam jangpiiniile.

²⁶“Nlenii Pfii dato lang magong tang karam tiikahapii tei; katunii Pfii dato kagong kasang mah rangii teinii kagong tinglang kak; ahnii gumah kaang kito sakchyii pyii tangle;

²⁷sateichii gonyii hangdo sakchyiile, dapodinchii saroisekto gonyiinii n-gu kaswisii leile.