Read Maram Naga JON 17 Bible Online

JON 17 - Maram Naga bible

JON 17

¹Jisunii samhang ai tam sek-kii, Mpounii sating gamkii rajang matusii tamle, “Pfii-o, ting- lang tei gongtakle; nah sapfii mpou teinii n-go pumtei kava tei pyii matutang karam jangpii gonah sapfii mpougo pumtei kava tei pyiilo.

²Kadapokii nangnii mpou dakii kapyii hang gotei mpounii kalui kaga karing tiilung pyiimatu tang karam jangpii meilui kalung hang phyii- ryiito nangnii mpougo teimaham tei pyiibam takle.

³Sateichii hangni- niisang hangninii roinii kalei kasang Saraa Ahgo ninado Ahnii lang kamagong Jisu Kristago nyiinii tikatu ai; kalui kaga karing teile.

⁴Nangnii n-gu tiilosii kapyii tha tei tiimashang aisii, sazyii pouryiito Inii n-go pumtei kava tei pyiitakle.

⁵Sateichii Pfii-o, sazyii pouryii tii mpat kasuniito n-gu kaswisii leikatu gumah pumtei kava teipiinii godoito aitoi n-gu pumtei kava tei pyiilo.

⁶“Sazyii pouryiito nangnii gudakii pyiikabam meihang dateikii Inii go zei tei tam mangou takle, ahnyii tei- nii gomahle ninado nangnii ahnyiigo gudakii pyiile sateichii ahnyiinii gosam swiwo takle.

⁷Nangnii gudakii kapyii hangtei godatole katu aitoinii ahnyiinii titakle;

⁸Kadapokii nangnii gudakii kapyii samhang tei Inii ahnyii dakii pyiitakle sateichii ahnyiinii teitei lukaiwo takle, sateichii Inii godato gongle katu tei ahnyiinii kasangpii titakle sateichii nangnii n-gu lang magongle katu tei ahnyiinii malum takle.

⁹“Inii ahnyii jangpii riitasii bamle, Inii sazyii pouryii jangpii riita makle, nlenii nangnii gudakii pyii kabam ahnyii jangpiiniile, kadapokii ahnyiinii gomahle.

¹⁰Gumah kalei hangtei gomahle ninado gomah hangtei gumahle, ninado ahnyii hang paikito Inii pumtei kava tei doutakle,

¹¹Sateichii Inii sazyii pouryiito bamlak takle, nlenii ahnyiinii sazyii pouryiito leile sateichii Inii goda gongleile, kamatei Pfii, nyiinii hangninii katu takumpii ahnyiinii hangninii tiimatu tang karam jangpii, nangnii gudakii pyiikabam ahnyii aigo gozei kito koipyiilo.

¹²Inii ahnyiigo kaswisii bam kalei tinglang kak, nangnii gudakii pyii kabam ahnyii gotei gozei kito Inii koipyiitakle; sateichii Inii ahnyiigo dengpyiile ninado kabi rasam kito tam kabam tei gong matwi matutang karam jangpii, maga tang karam mah nah sapfiimei tei supiinii, ahnyii mei hangninii kagodo maga makle.

¹³Nlenii aitoinii Inii goda gongleile; sateichii ahnyiinii mpou mpou lung kito gumah ka-nta tei matwi mashangsii leimatu tang karam jangpii sazyii pouryiito samhang ai Inii tam leile.

¹⁴Inii gosam tei ahnyii dakii pyiitakle sateichii sazyii pouryiinii ahnyiigo ngourou takle. Kadapokii Inii sazyii pouryii mah kasu takumpii, ahnyiido sazyii pou- ryii mah makle.

¹⁵Ahnyiigo sazyii pouryiito poitoi losii Inii godato riita makle, nlenii kashyii kiteito ahnyiigo koipyiilosii Inii godato riitale.

¹⁶Inii sazyii pouryii mah kasu takumpii, ahnyiido sazyii pouryii mah makle.

¹⁷Kasang teipii ahnyiigo tiimatei pyiilo, go samnii kasangle.

¹⁸Nangnii n-gu sazyii pouryiikii lang kamagong takumpii, Inii ahnyiigo sazyii pour- yiikii lang mpat takle.

¹⁹Ahnyiihang godo kasang teipiinii tiimateipyii ma- tutang karam jangpii, ahnyii jangpii Inii guroinapii n-gu pyiitoi leile.

²⁰“Sateichii ahnyii jangpii roinii Inii riita makle, nlenii ahnyii mah samtam kito malum kalu ahnyii jangpiido,

²¹ahnyii hang ai hangninii tiimatu tang karam jangpii Inii riita leile; nangnii n-gu lang magongle katu sazyii pouryiinii malum matu- tang karam jangpii, he Pfii-o, nangnii gudato sateichii Inii godato kalei takumpiinii, ahnyiinii nyii dato leimatu tang karam jangpii Inii riita leile.

²²Nyiinii hangninii katu ta- kumpii, ahnyiiniido hangninii tiimatu tang karam jangpii, nangnii gudakii pyiikabam pumtei kava tei Inii ahnyii dakii pyiitakle;

²³Inii ahnyii dato sateichii nangnii gudato kalei teipii ahnyiinii sajek gasii hangninii tiimatutang karam jangpiile; katunii nangnii n-gu lang magongle sateichii nangnii n-gu lungkasyii takumpiinii nangnii ahnyiigo lungsyii takle katu tei sazyii pouryiinii timatu tang karam jangpiiniile.

²⁴“He Pfii-o, nangnii sazyii pouryii tii mpat kasunato n-gu lung- kasyii kito nangnii gudakii kapyii gumah pumtei kava tei ahnyiinii ngoumatu tang karam jangpii, Inii kalei nitei ahnyiiniido n-gu kaswisii lei matu katu Inii maraile.

²⁵Oh kasang kamajyii pfii, sazyii pouryii- nanii n-go timakle, nlenii Inanii n-go titakle; sateichii nangnii n-gu lang magongle katu tei ahnyiinii titakle.

²⁶Nangnii n-gu lungsyii katu mah lungkasyii tei ahnyii dato leimatu tang karam jangpii sateichii Inii ahnyii dato leimatu tang karam jangpii, Inii ahnyii dakii go zei tei tam matitakle, sateichii teitei Inii tam mati tangle.”