Read Maram Naga JON 2 Bible Online

JON 2 - Maram Naga bible

JON 2

¹Teito leimik hangtum kashang piinei Galili kito kalei Kena sii kalat ranam kito myii kapang hangninii pat takle, sateichii Jisu pwi teikitei leile.

²Sateichii myii- kapang kiteikii Jisu godo mpoumah boumei hang godo gonghailosii lat takle.

³Jou tei tangsu takle sek-kii, Jisu pwinii mpou dakii tamle, “Ahnyii mah jou gatakle.”

⁴Teito Jisunii mpou pwi dakii tamle, “He sapwi mpei, nangnii n-gu kadapei tiitang karam leipo? Gumah tinglang tei gongmakle rei.”

⁵Jisu pwinii kikaleimei dakii tamle, “Mpounii gonyii dakii katam tei tiilo.”

⁶Jehudimei mah ajai taiswisii tiikamatei mah kanat tei leile, sateichii teijangpiinii kuitupii katii dwi kakaibung, hangninii nsangki ralek haikii kakum liit kabui dwi kakaibung siiruk tei teikikii dung bamle.

⁷Jisunii ahnyii dakii tamle, “Dwi kakaibung hangtei dwipii kaitokryii ailo.” Teito ahnyiinii dwi kakaibung hangtei kagung katang kaitokryii ai takle.

⁸Teito Jisunii ahnyii dakii tamle, “Toinii dwitei chengniikii tok wosii takbaiki tung tiisii jukaleipii datei poimang tulo.” Teito ahnyiinii teitei mpouda poimangtu takle.

⁹Sateichii takbaiki atung tiisii jukajyiipii teinii jou ndat kalu dwitei masaiju katu kito teitei kada kitopo katu tisupii (nlenii dwitei tok ka-mpat kikaleimei teinii tile) takbaiki atung tiisii jukajyiipii teinii nou katiipii sapfii mpou gotei lat tosii mpou dakii tamle,

¹⁰“Mei- hangnii jou sak kabi tei pyiisakrei leile sateichii meihangnii saksat ka- lutainii, chengniikii ka-nkhii joutei pyiisak leile, nlenii nangnii aitoi katangpii jousak kabi tei kaibamle.”

¹¹Mpoumah tiikamangou siitihang mah karei reisang ai, Galili kito kalei Kena kito Jisunii tiimangou takle, teito mpoumah pumtei kava tei mati mangoutakle, ninado mpoumah bou- meinii mpougo malum wotakle.

¹²Aitaito Jisu ninado mpou pwi, sanamei ninado boumei teinii Kaipar- namki tat tutakle, sateichii ahnyiinii teiki leimik chengniikii bamle.

¹³Sateichii Jehudimei mah kaakamaju mah takbai tei nagong sek-kii, Jisunii Jerosalem ki tatpile.

¹⁴Teito mpounii Saraa kamaningki lungto twom, Jao, ninado mahou joikalei mei sateichii sanasui hek kaleimeinii bam kalei tei doutakle.

¹⁵Teito mpounii rengpii tingrang liwosii, twomdo jaodo kalei kaga tei Saraa kamaningki lungto baatoi aitakle, sateichii sanasui hek kaleimei mah sanasui hangtei mpounii maroutoi aisii, ahnyiimah bam kadung hangtei kok kalwitoi aitakle.

¹⁶Sateichii mahou joisii kaleimei dakii mpounii tamle, “Mah pot hang ai aikito poitoi ailo, gu pfii kitei gonyiinii ali-ala katiiki tiilakle.”

¹⁷“Oh Saraa, gomah ki kiteikii Inii lungliitsii kamaning tei, mi takumpiinii gulungto shongsii leile.” Sii kabi rasam kito katam tei mpou-boumeinii maning gongtakle.

¹⁸Teijangpii Jehudimeinii mpou dakii khekalatle, “Nangnii tha ai tiikajyii jangpii nyii dakii tiimangou tang karam kadapei leipo?”

¹⁹Jisunii ahnyii dakii khekalatle, “Saraa kamaningki ai tiimaga ailo, teito Inii leimik hangtum lung kikii tiimakhiiloi tangle.”

²⁰Teijangpii Jehudimeinii tamle, “Saraa kamaningki katii ai tingkum rekdaisii saruk nkhii liit takle, sateichii nangnii leimik hangtum lung kikii tiimakhiiloi wotangpo?”

²¹Nlenii Jisunii tam kalei Saraa kamaningki mah kaang teinii mpou- mah pumpot goteile.

²²Teijangpiinii mpounii kataimei kak kito ring- kakhii kak, mpounii ai tam bamlesii mpou boumeinii maning gongtakle; sateichii ahnyiinii kabi rasam go- teido, Jisunii tam kabam sam goteido malum wotakle.

²³Jisunii kaakamaju takbai tinglangki Jerosalem kito kabam ki kak, mpounii tiikamangou hangtei ngou wosii meihangkanii mpougo malum wotakle.

²⁴Nlenii Jisu pumsekpiinii ahnyii dakii malum makle, dapokii ahnyii kalei kagago mpounii tile.

²⁵Sateichii ahnyiimah kaang kito mei kata hangninanii mpougo tam tang karam tei mpou jangpiinii kabi tei gale, daponii ahnyii lungki kadapei leipo katu tei mpounii tile.