Read Maram Naga JON 3 Bible Online

JON 3 - Maram Naga bible

JON 3

¹Aitoinii Farasismei kak kito Nikodimas sii kalat Jehudimei mah doi majang katatmei hangninii leile.

²Mei aipou ainii tinghum Jisuda gongsii mpou dakii tamle, “Rabbi, (katunii Madhiikapyiipii) nangnii Saraa dato kagong ralika- pyiimei hangniniile katu tei nyiinii tile, kadapokii nangnii tiikalei siitihang ai Saraanii mpougo kaswi suleponii, meikaniido tiiwo lakle.”

³Jisunii mpougo Khekalatle, “Inii n-go kasangpii tam leile, mei kata hangninanii manaaloi suleponii, mpounii Saraa mah sating sazyii tei ngoupei wolakle.”

⁴Nikodimasnii mpou dakii tamle, “Meinah hangni- nanii tingkalei kiteito dakumpii mpounii manaaloi wotangpo? Mpou- nii hangna kashang tiisii pwi moi lung liit tosii mana wobuipo?”

⁵Jisunii khekalatle, “Inii godakii kasangpii tam leile, mei kata hang- ninanii dwi ninado rangii kito manaa kasutanii ahnii Saraa mah sating sazyii kitei liitpei wolakle.

⁶Pum kito kalung tei pumle, sateichii rangii kito kalung tei rangiile.

⁷Nangnii manaaloi tanglesii Inii godakii katam kiteito sung gasulo,

⁸tingkainii gwikanyii gwikanyii lamkii gwikaile, sateichii nangnii tingkai koitei shiile, nlenii teitei kada kito gongpo satei- chii kadaki tat tupo katu timakle, rangii kito manaa kaleimei hang- teinii tei takumle.”

⁹Nikodimasnii mpoudakii tamle, “Aihang ai kada takumpiinii tii wotangpo?”

¹⁰Jisunii mpou dakii khekalatle, “Nang Isrelmei mah ralikapyiimei hangninii tiisanii aihang ai timakde?

¹¹Inii godakii kasangpii tam leile, nyiinii kati tei nyiinii tam leile sateichii nyiinii ngoukalei mah kaang kito nyiinii sakchyii pyii leile, nlenii gonyiinii nyiimah sakchyii tei lukaipyii makle.

¹²Sazyii pouryii mah mah pot hang mah kaang kito Inii gonyiigo katam kito gonyiinii n-gu malum makle, teitiileponii sating gam mah mah pot hang mah kaang kito Inii gonyiigo katam kito, gonyiinii n-gu kada takumpiinii malum tangpo?

¹³Sating gamto kahum meinah sapfii mpou tei supiinii, mei kaniido sating gam khiimakle.”

¹⁴Sateichii mpougo kamalum meihangnii kalui kaga karing dou- matu tang karam jangpii,

¹⁵Mosesnii sazyii kamarong kito sanhiigo poikamatu takumpii, meinah sapfii mpou gotei poimatu tang karamle.

¹⁶Kadapokii Saraanii sazyii pou- ryiigo hangkasii lungkasyii jangpii, mpounah sapfii mpou hangniniisang hangninii roinii kalei go tei pyiitakle, teipiinii nah sapfii mpou gotei malum kalumei hang teinii gasupii, kalui kaga karing tei doutang karamle.

¹⁷Daponii Saraanii meinah sapfii mpou gotei Sazyii pouryiigo samtak tiimatu tang karam jangpii sazyii pouryiikii lang m-mang makle, nlenii mpou paikito sazyii pouryiigo keipyii matu tang karam jangpiiniile.

¹⁸Mpougo kamalum mei goteinii samtak tiipyii makle, malum kasu- mei hang goteinii samtak tii aitakle, kadapokii mpounii hangniniisang hangninii roinii kalei Saraa nah sapfii mpou gotei malum makle.

¹⁹Sateichii samtak katii tei aile, katunii Kava tei sazyii pouryii gongtakle, nlenii meinahnii kava goteisung kamyii gotei kisii maraile, dapokii ahnyiimah tha hangtei shyiile.

²⁰Kadapokii kashyii tha katiimei hangteinii kava gotei ngou- roule, sateichii mpoumah tha kashyii tei mangourousii, kava kutei gonglei makle.

²¹Nlenii kasang tiisii kalei ah teinii, ah mah tha tei Saraa dato tiileile katu tei mati mangou tang karam jangpii, kava kutei gong leile.

²²Aitaito Jisu ninado mpou boumei teinii Judiya sazyiiki tat tutakle, sateichii teikito mpounii ahnyiigo kaswisii bamle ninado dwi mpumpyiile.

²³Sateichii Jon-niido Salimki Ainon kito dwi mpum pyiisii leile, dapokii teibam kitei dwi hangka leile; sateichii meihangkii gongsii dwi mpum wotakle.

²⁴Dapokii tei tinglang kitei Jon go kabang kikii kai aimakle.

²⁵Aitoinii Jon mah boumei nei Jehudimei hangninii tiikamatei mah kaang kito kajyiipat tutakle,

²⁶Sateichii ahnyiinii Jonda gongsii mpou dakii tamle, “Rabbi, (Katunii Madhiikapyiipii) leimik kapatlam Jordan kiteito n-go kaswisii kalei, mpoumah kaang kito nangnii sak- chyii pyiikalei sapfii mpoutei, julo, mpounii dwi mpum pyiisii leitakle ninado meihangnii mpouda gongsii leitakle.”

²⁷Jon-nii khekalatle, “Sating gamto mpougo pyiikabam teisupii, mei kata hangninii kaniido samah kado dou- pei wolakle.

²⁸Inii krista tei makle, nlenii mpou doi reisii n-gu lang magonglesii Inii katam tei gonyii pumsekpiinii gumah sakchyiile.

²⁹Myiipeipwi go pang kalu mpou tei nou katii sapfii mpou teile. Nlenii kuto satpii mpou sam shiisii kalei nou katiipii mah kangmei teinii, nou katiipii mah rok shii wosii ntale, gumah ka-nta tiimashang kapyii teinii aile.

³⁰Mpounii moiki tang karamle nlenii Inii tham buibui tang karamle.”

³¹Sagoi gamto kagong mpou teinii hang phyiiryii satle, sazyii pouryiito kagong mpou teinii sazyii pouryii mahle, sateichii mpounii sazyii pouryii mah sam tei tamle, sating gamto kagong mpou teinii kalui kaga hang phyiiryii satle.

³²Mpounii ngoukalu ninado shii kalu tei sak- chyii pyiile, nlenii mei kata hangninii kaniido mpoumah sakchyii tei lukai makle.

³³Mpoumah sakchyii lukai kalu ah teinii Saraa ai kasangle sii seal namkai aitakle.

³⁴Kadapokii Saraanii lang kamagong mpou teinii Saraa sam tam leile, dapokii mpounii rangii tei ajhii masaksii pyiimakle,

³⁵Pfii teinii nah sapfii mpou gotei lungsyiile sateichii mpoubah kikii mahlyiihang tei pyiibam takle.

³⁶Nah sapfii mpou gotei malum kalumei teinii kalui tiikasu karing tei doutakle, nlenii nah sapfii mpou sam swikasumei hangteinii karingtei doulakle, nlenii Saraa mah rakarhii tei mpou gamto leile.