Read Maram Naga JON 8 Bible Online

JON 8 - Maram Naga bible

JON 8

¹Nlenii Jisunii Olip zang gam tat tutakle.

²Tingchoi nukii mpounii nlailoisii Saraa kamaning kilungtei gongtakle, ninado meihangnii mpou bamni tei gongtakle, teito mpounii ntombamsii ahnyiigo tam ralipyiitu takle.

³Ajaitingshang kati ojamei ninado Farasismei hangteinii ma- shung maha leibangpiinii jum kalu sapwi mpei hangniniigo pang gong- sanii, sumto masat tosii,

⁴ahnyiinii mpou dakii tamle, “Madhiikapyiipii, sapwi mpei aigo mashung maha leibangpii jumpang gong leile.

⁵Ajaitingshang kitonii Mosesnii aikakum aigo kuitupii rot tang karam jangpii nyiigo tam ka- khatpyii bamle; nangnanii mpoupei mah kaang kito dapei tam tangpo?”

⁶Ahnyiinii mpou gamkii tam kamashyiini dou wokabui jangpii, mpougo jaijusii sam ai ahnyiinii tam takle. Nlenii Jisunii nkwimang- sanii, bah jungnapii sazyiikii ryiitu takle.

⁷Ahnyiinii mpougo nhii humsii kalei kito, mpounii gongtu sat tosii ahnyii dakii tamle, “Gonyii kak kito kem tiikasu ahteinii mpoupeigo kuitu rotreilo.”

⁸Sateichii mpounii nlailoisii nkwimang, bah jungna teipiinii ryiile.

⁹Teito ahnyiinii ai shiiwosek-kii, kating sekto housii nsang nsangpii tat tutakle; sateichii Jisu roinii nei sumto kalei sapwi mpei tei roinii leitakle.

¹⁰Jisunii rajang makhii jusii mpoupei dakii tamle, “He sapwi mpei, ahnyii kadaki tat tutakpo? Mei kaniido n-go tam mashyiisu takpo?”

¹¹Mpoupeiniikhekalatle, “Mei kado tam mashyiisu takle, Bangpii.” Teito Jisunii tamle, “Iniido n-go tam ma- shyii makle; tat tulo, aitoisekpiinii kem tiiloi sulo.”

¹²Jisunii nlailoisii ahnyii dakii tamle, “Inii sazyii pouryii mah kavale; Gutai swikaleimei teinii kamyii kito tat lakle, nlenii karing mah kava tei doutangle.”

¹³Teito Farasismei teinii mpou dakii tamle, “Nang goroinapii gomah sakchyii pyiileile, gomah sakchyii teinii kasang makle.”

¹⁴Jisunii khekalatle, “Inii guroi- napii gumah sakchyii pyii kado, gumah sakchyii teinii kasangle, da- ponii Inii kada kito gongpo sateichii kadaki tatleipo katu Inii tile, Nlenii Inii kada kito gongpo mak-kii kadaki tatleipo katu gonyiinii timakle.

¹⁵Gonyiinii pumzai taiswisii samtak tiile, Inii meigo kado samtak tiimakle.

¹⁶Nlenii Inii samtak tiile- ponii, gumah samtak katii teinii kasangle. Kadapokii Inii I-roinii makle, nlenii I-nei n-gu lang kama- gong ahgo kaswi leile.

¹⁷Gonyii mah ajaitingshang kito mei hangna mah sakchyii teinii kasangle katu tei ryiibamle.

¹⁸Inii guroinapii gumah sakchyii pyiile sateichii n-gu lang kamagong Pfiinii gumah sakchyii teile.”

¹⁹Teijangpiinii ahnyiinii mpougo tamle, “Go Pfii kadaki leipo?” Jisunii khekalatle, “Gonyiinii n-gudo gu Pfii godo timakle; gonyiinii n-gu tileponii, gonyiinii gu pfii godo titangle.”

²⁰Mpounii Saraa kamaning kilungto tam ralipyii kalei kak, sam- kang hang ai pyiikatoi sanahbung kaibam kalei ki shang kito tamle, nlenii mei kaniido mpougo jum makle, dapodinchii mpoumah tinglang tei rei gongmakle.

²¹Nlailoisii mpounii ahnyii dakii tamle, “Inii tat tutangle ninado gonyiinii n-gu fiitangle, nlenii gonyii- nii gonyii mah kem kiteito taitangle, Inii kagongnitei gonyiinii gongpei wolakle.”

²²Teito Jehudimei hangnii tamle, “Inii kagong nitp-ei gonyiinii gong- pei wolakle katu ainii mpouroinapii mpougo gitat aileziide?”

²³Teito mpounii ahnyii dakii tamle, “Gonyiinii kangtole, Inii lou gamtole, Inii sazyii pouryii aito makle.

²⁴Teijangpii gonyiinii gonyii mah kem kiteito taitanglesii Inii gonyii dakii tam takle; dapokii I-le katu gonyiinii malum kasuta, gonyii mah kem kito gonyii taitangle.”

²⁵Ahnyiinii mpou dakii tamle, “Nang tapo?” Jisunii ahnyii dakii tamle, “Inii saroisekto gonyii dakii katam tei sekle.

²⁶Gonyii mah kaang kito Inii tam kanyii sateichii samtak tiitang karam hangka leile; nlenii n-gu lang kamagong ahteinii kasangle, sateichii Inii mpou dato shiikalu hangtei roinii sazyii pouryii dakii tam leile.”

²⁷Mpounii Apfii mah kaang kito ahnyii dakii tam kalei tei ahnyiinii timakle.

²⁸Teipiinii Jisunii tamle, “Meinah sapfii mpougo gonyiinii poi kasagoi tinglang kak, I-ai mpoule, ninado gumah teimaham roinapiinii samah kado Inii tiimakle, nlenii pfiinii gudakii ralikapyii takumpii Inii sam ai tam mpat leile katu gonyiinii titangle.

²⁹N-gu lang kamagong ahteinii n-gu kaswipyiisii leile, mpounii n-gu toipyii makle. Kadapokii mpounii kamarei kasat tha tei Inii taksupii tiile.”

³⁰Mpounii aitiisii katam kito, mei hangkanii mpougo malum wotakle.

³¹Teijangpii mpougo malum kalu Jehudimei hang dateikii Jisunii tamle, “Gonyiinii gumah samkang kiteito taksupii leijou leponii, kasangpii gonyii ai gumah boumeile.

³²Sateichii gonyiinii kasang tei ti- tangle ninado kasang teinii gonyiigo laat mpatpyii tangle.”

³³Ahnyiinii mpougo khekalatle, “Nyiinii Abraham mah taa nahmeile sateichii mei kaniido kikaleimei tiisang tiiju makle, ‘gonyiigo laat mpatpyii tangle’ sii nangnii kada takumpii tam leipo?”

³⁴Jisunii ahnyiigo khekalatle, “Kasang kasangpii Inii gonyii dakii tam leile, Kem tiikaleimei hangtei kem mah kikaleimeile.

³⁵Sateichii kikaleimei teinii kito bamjou lei- makle, nah sapfii mpou teinii leihum leile.

³⁶Teipiinii nah sapfii mpou teinii gonyiigo laat mpatpyii leponii, gonyiinii kasangpii laatbam takle.

³⁷Gonyii Abraham mah taa nahmeile katu Inii tile, nlenii gonyii n-gu gilesii fiileile, dapochiinii gonyii lung kito gumah samtam teinii bam doumakle.

³⁸Gu Pfiinii n-gu kama- ngou kaang hang kito Inii tam leile, sateichii gonyiiniido Pfii dato shiikalu hangtei tiile.”

³⁹Ahnyiinii mpougo khekalatle, “Nyii Pfiinii Abrahamle.” Jisunii ahnyii dakii tamle, “Gonyii ai Abraham nah meileponii, Abrahamnii katii tei gonyiinii tiitangle.

⁴⁰Nlenii Saraa dato shiikalu kasang tei gonyii dakii tampyiisii kaleimei n-gu aitoi gonyiinii gilesii fiileile; ai ai Abraham nii tiimakle.

⁴¹Gonyii Pfiinii katii tha tei gonyiiniido tiilo.” Ahnyiinii khekalatle, “Saraa ah sektei roinii nyii Pfiile, sateichii nyiinii ahmah nah sapfiimei hang teile.”

⁴²Jisunii ahnyii dakii tamle, “Saraa ai gonyii Pfii leponii, gonyiinii n-gu lungsyii tangle; dapokii Inii Saraa dato patsii gongtakle, Inii gumah kamaning kamazhiipii gong- makle, nlenii mpounii n-gu lang magongle.

⁴³Inii katam tei gonyiinii dajangpii timakpo? Gonyiinii gusam ai shiipei kalak jangpiiniile.

⁴⁴Gonyii ai gonyii pfii seitan dateitole, sateichii gonyii pfii mah kamarei ka-ntha hang tiitang karam tei gonyii mah kamaning kamazhii teile. Ahnii nu saroisekto meigo kagi kabaameile sateichii kasang gotei kaswisii tha tiitang karam samah kado gale; dapochiinii ahda kasang tei gasang gale. Ahnii kachui sam katam kak nunuto kalei ahmah jai taiswisii malhiile, kadapokii ahnii kachuipiile ninado teimah pfii teile.

⁴⁵Nlenii Inii kasang tei tamle, tei- jangpii gonyiinii n-gu malum makle.

⁴⁶Gonyii tapiinii I-ai male katu mangoupyii wobuipo? Inii kasang tamsii leileponii, gonyiinii n-gu dajangpii malum makpo?

⁴⁷Saraa dato kagongmei teinii Saraamah tam ka mpat samtei shii leile, nlenii gonyiinii Saraa dato gongmakle, teijangpii gonyiinii shii makle.”

⁴⁸Jehudimeinii mpougo khekalatle, “Nangnii Samariyameile sateichii sara kashyii kaswi leilesii nyiinii tam kalei ai nyiinii tam ma ai takpo?”

⁴⁹Jisunii Khekalatle, “Inii sara kashyii kaswimakle, nlenii Inii gu Pfiigo sadzyii ngariit tiile ninado gonyiinii n-gu sadzyii ngariit tiimakle.

⁵⁰Teitii kido Inii guroinapii n-gu tam kamatoi tei fiimakle; nlenii teigo tei fiisii kalei hangninii leile sateichii mpounii samtak katiipii tiitangle.

⁵¹Kasang kasangpii Inii gonyii dakii tam leile, mei kata hangninanii gusam swisii leileponii, katai tei ahnii ngousang ngoulakle.”

⁵²Jehudimeinii mpou dakii tamle, “Nang sara kashyii kaswi leile katu aitoinii nyiinii titakle! Abraham taitakle ninado lungkakalingmei hangdo taitakle, nlenii nangnii tamle, mei kata hangninanii gusam swisii leileponii ahnii katai tei ngou- sang ngoulakle.

⁵³Nyii Pfii Abraham sung nang dibuipo? Mpoudo taiga takle, Lungkakalingmei hangdo taiga takle! Nang talesii maning leipo?”

⁵⁴Jisunii khekalatle, “Inii guroi- napii n-gu tam matoi leponii, gumah tam kamatoinii samah kado makle, nlenii gonyii mah saralesii gonyiinii tam kalei, gu pfii ah teinii n-gu tam matoipyiile.

⁵⁵Nlenii gonyiinii ahgo timakle, nlenii Inii ahgo tile, sateichii Inii ahgo timakle leponii, I-do gonyii takumpiinii chui tangle, nlenii Inii ahgo tile, ninado ah mah sam swile.

⁵⁶Gonyii pfii Abrahamnii gumah leimik tei ngou tanglesii ntasii leile, mpounii tei tei ngou wosii ntale.”

⁵⁷Teijangpii Jehudimeinii mpou dakii tamle, “Nangrei tingkum rek- ngiido tangsupii, nangnii Abraham go ngoutakpo?”

⁵⁸Jisunii ahnyii dakii tamle, “Kasang kasangpii Inii gonyii dakii tam leile, Abraham go lung kasuniito I-leile.”

⁵⁹Teipiinii ahnyiinii mpougo rot tang karam jangpii kuitu poimakhii takle, nlenii Jisunii mpouroinapii mbeiwosii, Saraa kamaning kilung teito tatpat totakle.