Read Maram Naga THA 1 Bible Online

THA 1 - Maram Naga bible

THA 1

¹Lungkasyii Theophilas: Inii karyii gumah larek karei teinii, Jisunii kalai kalu tiilamlwi kapyiimei dakii rangii kamatei mah paito kakhatpyii kalei tai,

²Mpougo pangkhii katu piinei leimik katang tei mpounii tha tiikahou sateichii ralipyii hou katu hang mah kaang kitole.

³Leimik rekdai lungki teito tiilamlwi kapyiimei dakii mangou kapyii sateichii Saraa mah sating sazyii mah kaang kito ralipyiisii, Mpounii kamage kalak leh kaleitai maning kariirhii katu gasii tiikamangou kadaziikapiinii mpou pumsek ai ringtakle katu tei ahnyii dakii mangoupyii takle.

⁴Sateichii ahnyiinii gong ndwi sek-kii mpounii ahnyii dakii kakhatpyii takle: “Gonyiinii Jerosalem kito tat tusulo, nlenii Inii gonyiigo katam, Gu pfiinii riishii tiikabam gotei gonyiinii koilo.

⁵Kadapokii Jon-nanii dwi kito mpum pyiile, nlenii gonyii gonii tinglang thaangsupii rangii kamateipii mpum pyii tangle.”

⁶Teijangpiinii ahnyii hangnii gong ndwiwo sek-kii, ahnyiinii mpou dato n-nhiile, “Bangpii, tinglang aikito nangnii Isrelmei dakii Sagong sazyii tei kalaipyiiloi lakpo?”

⁷Teito Jisunii ahnyii dakii tamle, “Gu pfiinii Mpou mah teimaham sek teipii tiida kabam tinglang mak-kii tingkum tinglang tei kadadou tangpo katu titang karam tei gonyii mah makle.

⁸Nlenii rangii kamatei teinii gonyii phyiiryii humpyii sekchii, gonyiinii teimaham tei doutangle, Sateichii gonyiinii Jerosalemto Ju- diya ninado Samariya sazyii hang kikii, sateichii sazyii pouryii nlai katang tei gumah sakchyii tiitangle.”

⁹Sateichii mpounii ai tam kaleitai, ahnyiinii aitiisii juleibangpii, mpougo sating gam pangkhiitu takle; satei- chii mongjyii teipii ahnyii mik tei gomnei wosii mpougo ngousu takle.

¹⁰Sateichii mpounii aitiisii sating gam khii katutai ahnyiinii sating gamkii juleibangpii, julo, peimani kaha kai kaleimei hangna binasek- kii ahnyiida satto takle;

¹¹ninado tamle, “He Galili kito kaleimei, gonyii dajangpii sating gamkii jumakhiisii sat leipo? Gonyii dato sating gam pangmakhii katu Jisu ai sating gam khii katu tei gonyiinii ngou katu takumpiinii, mpounii ai takumpiinii gong tangle.”

¹²Teito ahnyiinii Jerosalem namdigo manangsii kalei kilomiter hangniniikii akak dhiisii kalei Olip zang kiteito Jerosalem ki nlaigong takle.

¹³Sateichii teiki tei liit tosii Pitar, Jon, Jems, Andru, Filip, Tho- mas, Bartholomio, Metiu sateichii Alfaiyas nah sapfii mpou Jems, Selot sii lat kalei Simon, sateichii Jems nah sapfii mpou Judas ahnyiinii bam kalei alaangki kasagoi ki shang kitei tatpi takle.

¹⁴Ahnyiihangnii sapwi- meigo, Jisu pwi Merigo sateichii mpou sanamei hang go kaswisii lungswi hangninii tiisii kariita tei taksupiinii lungliitsii bamle.

¹⁵Sateichii leimik teihang kak kiteito, Pitarnii kangsanamei sumto tusat tosii tamle, (ndwi kalu meihang tei mei haisii makaikii kakumle.)

¹⁶“He kangsanamei, Jisugo kajum kak ahnyii mah Shekapyiipii Judas mah kaang kito, Devit mwi kito rangii kamateinii doireisii tam kabam kabi rasam tei madougong tang karamle.

¹⁷Judas tei nyii bemei hangniniile, kadaponii mpougo kalai wotakle aitha katii kito njai poihai matu tang karam jangpii.”

¹⁸Judasnii kashyii tha katii kito doukalu sana teipiinii lubam hang- ninii lyii wotakle sateichii teito mpou tai takle, mpou moi pak takle ninado arailungnak kalei kaga tei longpat takle.

¹⁹Sateichii Jerosalem kito kaleimei hangnii teitei tigong takle; teijangpiinii lubam tei ahnyii latpiinii ‘AKEDAMA’ katunii zai mah lubam sii latle.

²⁰Kadaponii tam kamatoi lhii- bung kikii aitiisii ryiibamle, ‘Mpouki tei marong matulo; meikaniido teiki tei lungsu matulo;’ sateichii ‘mei kakimeinii mpou tung tha tei tiimatulo.’

²¹Teijangpiinii Jon nii dwi mpum kapyii sekto haosii nyiidato mpougo pang makhii katu piinei leimik katang tei,

²²nyiigo kaswisii bangpii Jisunii tatpat tatliitsii tinglang kaleihang kito nyiigo kaswisii tat kaleimei sapfiimei kak kito mei hangninanii nyiigo kaswisii mpounii ring kakhii mah sakchyii tiitang karamle.”

²³Sateichii ahnyiinii mei hang- nago poi mpatle, Barsabas sii kalat Joseph (Mpou zei kasang teinii Justas le) sateichii Mattias go,

²⁴teito ahnyiinii riitasii tamle, “Meihang mah kamaning lungswi tisii kalei he Bangpii, Judasnii mpou bamki gong- tang karam jangpii, anga ngatang karam ninado Tiilamlwi kapyiimei hangninii bam ai matou aitakle.”

²⁵Mpoubam toutang karam ai mei hangna kak ki aito tapiigo nangnii kalaipyii bampo katu tei mati pyiilo.

²⁶Sateichii Ahnyiinii mpoupiina kak kito kalai tang karam jangpii doikabi tei jutakle, teito Mattias gotei kalai wotakle sateichii mpougo Tiilamlwi kapyiimei keariisiikankhii kiteikii kai mpam aitakle.