Read Maram Naga THA 12 Bible Online

THA 12 - Maram Naga bible

THA 12

¹Sateichii teitinglang kak Herot sagongnii kalai kalumei kak kito mei kangkago kaset kalak pyiitu takle,

²sateichii Jon sanapii Jakob go saryiimei kumpii gi aitakle.

³sateichii aipiinii Jehudimei hang go lung kasaat tei pyiitakle katu tei mpounii ngouwo sek-kii, Pitar godo mpounii jum maluwo takle. Sateichii teitei ahee kaihai kasu kaakamaju mah tiirok hang-ngi tinglang kakle.

⁴Sateichii mpounii ahgo jum wosek- kii, kabang kikii kai aisii saryiimei madai madaipii ska madaito mpougo koimatu tang karam jangpii pyiitoi aitakle, kadaponii kaakamaju mah hang-ngi tainii mpougo machii doikii poi mpat lesii maningsii bamle.

⁵aitiisii kabang kilungto Pitargo koibamsii bamle, nlenii mpou jangpii Charsh hangnii teisii riitale.

⁶Sateichii Herotnii mpougo pang- pat tuna tinghum sek teikii, Pitarnii saryiimei hangna kak kiteito sagyii- bah rangkat hangnapii peibamsii zyiisii bamle, sateichii kabangki koikalei saryiimei teinii kabangki kamwito sangsii bamle,

⁷Sateichii julo, Bangpii mah sating gamlui hangninanii ah dato satto takle, sateichii teibam kitei kava hangninii vatakle, teito Sating gam lui teinii Pitargo kachyiito dengsii makengsii tamle, “Kalangsii gungtu wolo,” teito mpoumah sagyii rangkat tei mpoubah kito tak khii takle.

⁸Teito Sating gam lui teinii mpou dakii tamle, “Nang nat kai wolo, sateichii go pichot tei kai wolo,” teito mpounii teitei tiiwo takle, sateichii mpounii mpou dakii tamle, “Go haikak tei kaisii gutai swi wolo.”

⁹Sateichii mpounii tatpatsii mpoutai swiwo takle, sating gam luinii tiikalei ai kasangle katu tei mpounii timakle, nlenii mpounii madhangkapyii kito ngouziilesii maningle.

¹⁰Teito ahnyiinii karei ninado adoipii koisii bamkalei saryiimei gotei tat maju- patsii namdi ki liit tang karam sagyiipiinii katii kamjao kitei gong wosek-kii kamjou tei ahnyii jang- piinii ah rangtiisii laatpyii takle. Sateichii ahnyiinii tatpat tosii, pwidi hangniniiki tat tutakle; sateichii binasek-kii sating gam lui teinii mpou dato tat tutakle.

¹¹Teito Pitarnii mpou roinapii tigong wosek-kii tamle, “Aitoinii Inii kasangpii titakle, katunii Bangpiinii mpoumah sating gam luigo lang m-mangpyiisii, n-gu Herot bah kito ninado Jehudimei hang mah kamaning kiteito kaleipyii takle.”

¹²Sateichii mpounii swi maning wosii, zei Mark siido lat kalei Jon pwi Meri kitei gongtakle; teiki teito meimoinii ndwisii riitasii bamle;

¹³sateichii mpounii takam kajang lamgpangto latsii takam kakhii sek-kii, Roda sii kalat ki kaleipei ralhiipei teinii laatpyii tang karam jangpii pat takle.

¹⁴Sateichii mpoupeinii Pitar mah latle katu tei tiwosek-kii nta beidisii takam tei laatpyii supii mpoupeinii pakliitsii Pitarnii ki takam kuto satsii leilesii tam takle.

¹⁵Teito ahnyiinii mpoupei dakii tamle, “Nang n-gok leitakle!” Sii, nlenii mpoupeinii kasangpiinii lesii tamtakle. Teito ahnyiinii tamle, “Tei dinchiinii mpou mah, sating gam luile!” sii.

¹⁶Nlenii Pitarnii takam kakhiisii bamle, ahnyiinii ki takam tei laat sekkii, mpougo ngou wosii hangkapii madat takle.

¹⁷Nlenii mpounii ahnyiigo malhiisupii bam matu tang karam jangpii mpoubah hampat sii Bangpiinii mpougo kabang ki teito kada takumpiinii pang mpatpyiipo katu tei ahnyii dakii tam mpatpyii takle. Sateichii mpounii tamle, “Sam hang ai Jems ninado kangsanamei hang dakii tampyiilo.” Teito mpounii tatpatsii bam kaki hangniniiki tat tutakle.

¹⁸Tingtang sek-kii Pitar dato kadapei pat takpo sanii saryiimei hang kak kito hangkapiinii nrungtu takle.

¹⁹Sateichii Herotnii mpougo fiisanii doukasu kito, koibamsii kalei saryiimeihang gotei tiigatpii samtak tiisii, ahnyiigo gitoi tang karam jangpii mwija pyii aitakle. Teito mpounii Judiya kito Kaisariya ki tat humsii tei kito bamle.

²⁰Toinii mpounii Tair ninado Sidon kimei phyiiryiikii hangkapiinii rarhii takle, sateichii ahnyiinii hang- ninii tiisii mpoubamni gong sanii, sagong mah bemei (samtak katiiki abam kapoimei) kak kahaipii Blatgo ahnyii kang tiiwosii, majung matu wotang karam jangpiinii khangtakle, kadapokii ahnyiimah sazyii tei sagong mah sazyii kito chiitak tei pat leile.

²¹Sateichii karet kabam leimik hangninii kiteito Herotnii sagong peimani kaisii, sagongbamki bam- sanii, ahnyii dakii sam karashiile.

²²Teito meihang teinii saale, “Saraa- nii katam rokle, meimah makle.”

²³Sateichii mpounii Saraago tam matoi kasu jangpii, teisek-kii Bangpii mah sating gam luinii mpougo tiirang aitakle, sateichii matainii chiisii rangii ga aitakle.

²⁴Nlenii Saraa mah samtam tei dikhiitu takle, ninado moibuibuitu takle.

²⁵Sateichii Barnabas nei Solnii mpoupiina mah atha tei tiisang aisii, zei Mark sii lat kalei Jon go kaswisii mpoupiinanii Jerosalem kito nlai gongtakle.