Read Maram Naga THA 19 Bible Online

THA 19 - Maram Naga bible

THA 19

¹Apollosnii Koren kito kabam kak Polnii teiki sazyii longryii gam teito tatpatsii teimah baangmah sum teito tat majupatsii Ipisa ki gongle, teito mpounii boumei kang- kago kadou wole.

²Sateichii mpounii ahnyii dakii tamle, “Gonyiinii kamalum kito rangii kamatei tei doutakpo?” Teito ahnyiinii mpou dakii tamle, “Doumakle, rangii kamatei leile katu tei nyiinii shiido shiimakle.”

³Sateichii mpounii ahnyii dakii tamle, “Teitiileponii, gonyiigo kadapei kikii dwi mpum pyiipo?” Teito ahnyiinii tamle, “Jon mah dwi mpum kapyii kiteikii.”

⁴Sateichii Polnii tamle, “Mpou taito gongtang karampii katunii, Jisugo malum tang karamlesii Jon- nii meimoi dakii tamsii, lung kakali mah dwi tei mpumpyii takle.”

⁵Sateichii ahnyiinii ai ai shii wosek-kii, Bangpii Jisu zei kito dwi mpum wotakle.

⁶Sateichii Polnii ahnyii phyiiryiikii bah poikai pyii- sekkii rangii kamatei teinii ahnyii phyiiryii tei gong takle, sateichii ahnyii tei lat katham kathampiinii Saraa sam tam mpat tutakle.

⁷Sa- teichii ahnyii kalei kagapii sapfiimei keariisiinakhii-kiile.

⁸Sateichii mpounii Jehudimei mah ndwiki lung tei liit tosii Saraa mah sating sazyii kaang kito sam kajyiisii ninado hemsii sakhii hangtum katang lungdisii ralipyiile.

⁹Nlenii ahnyii mei kangkanii meihang doito pwidi mah kaang kiteito sam kashyii tamsanii lung katei ninado malum kasu kito mpounii ahnyii dateito tatpat tosanii, boumei gotei poitaam wosii sating kata Tairanius mah ki kadi kiteito sam kajyiisii bamle.

¹⁰Ai ai tingkum hangna katang tei aitiisii pat takle, teijangpiinii Asiya kito lung kalei mei hang, Jehudimeido, Grikmeido Bangpii mah samtei shii wotakle.

¹¹Sateichii Saraanii kisii kama- dat tha tei Pol bahpiinii tiimatule;

¹²ai katang tiimatule, mpoupum kito peijuipei kado, peira kado ara kanimei dakii poigong pyiisekkii, ahnyii mah ara tei biwole, ninado sara kashyii hangniido pat tole.

¹³Teito roipat roiliitsii kalei Jehu- dimei sara kashyiigo baatoi kaleimei kangkaniido, Polnii tam ralipyiisii kalei Jisu zei tei latsii gonyiigo kakhat leile sii tamsii sara kashyiinii kaswi kaleimei phyiiryiikii Bangpii Jisu zei tam tutakle.

¹⁴Sateichii Jehudimei mah kanat kanhii kajum tingdimei hangninii Seva nah sapfiimei sananii ai ai tiile.

¹⁵Sateichii kashyii rangii teinii ahnyii dakii khekalatle, “Inii Jisu godo, Pol godo tile, nlenii gonyii tapo?”

¹⁶Sateichii kashyii rangii kaswi kaleipii teinii ahnyiigo kumsii ahnyiigo apum tiiwo takle, teipiinii ahnyiinii ki teiki teito makungpii ninado agam tiiriit riit kapyii tei dou wosii pakga takle.

¹⁷Sateichii Ipisa kito kalei Jehudimei sateichii Grikmei hangnii ai ai tigong takle, sateichii ahnyii hangnii hingtakle sateichii Bangpii Jisu zei dipat tutakle.

¹⁸Malum kalumei ahnyii kak kito meihang kaniido gongsii ahnyii mah tha tiikalei tei latsii tam mpatle.

¹⁹Sateichii kamadat mahai kajum mei ahnyii mei hangkanii ahnyii mah larek tei poi nkom wosii meihang doi teito miru aitakle; ninado ahnyiinii teimah amai fiikatu kak, sana thang rekngiile.

²⁰Aitiisii Bangpiimah kabi rasam tei katei teimaham lam- pangto tei buibuisii dipat takle.

²¹Sateichii tha aihang ai sang kaleitai Polnii Misidoniya ninado Akaiya tat majupat tosii Jerosalem ki katang maatang karam jangpii rangiinii maning wosii tamle, “Inii teiki tei gongwosii Romdo jutang karam takle.”

²²Sateichii mpougo tiikahamei, Timothi nei Irastas ahnei hangnago Mesidoniya kikii lang mpat aisii mpoupum sek teinii tinglang shangniikii jangpii Ipisa kito bamtu takle.

²³Teitinglang kaktei pwidi mah kaang kiteito kahung akoilat kamoi Ipisa kito pat tutakle.

²⁴Kadapokii Demitrius katupii sapfiimei, sana raguiba karakimei hangninanii Arti- mis sara kamaningki tei sana raguibapii tiimakhiisanii, baichem tii katimeigo tha tiimatusii sana hangkii liipat patsii bamle.

²⁵Mpounii ahnyiigo sateichii ahnyiigo njoi katu tha tiisii kaleimei hang go poi ndwi wosii tamle, “Kangmei, tha aimah paikito nyiinii seh sana douziile katu tei gonyiinii tile.

²⁶Sateichii bahpii- nii katii tei Saraa maklesii Pol ainii Ipisa kikado roisupii, Asiya bamlyii hang kikanakii meihangkago hemsii ajai tiikali aitakle katu tei gonyiinii ngoule ninado shiitakle.

²⁷Sateichii nyiimah atha zei katat nkhiimangtu tangle katu roisupiinii, Asiya ninado sazyii pouryii hangnii mata kalei sara kadi Artimis mah sara kama- ning ki godo tiikadak aitangle ninado mpoumah ngoukabi kiteito tii-nkhii aitangle katu mah sadoi kashyii tei leile.”

²⁸Teito ahnyiinii ai ai shii wosek-kii, rarhii beidisii saa mpatle, “Ipisa mei mah Artimis dile!”

²⁹Sateichii namdi kitei karampou- piinii tokryii takle; sateichii Polgo kaswisii pwidi mbuitat kalei Mesido- niya mei Gaiyas ninado Aristarkasgo ahnyiinii jum wosii swi hangninii tiisii ka-nta ka-nlangki tei pak kashoi kabeiliit takle.

³⁰Sateichii Polnii meihang kak kitei liit kanyii kiteito boumeinii mazhiisu takle.

³¹Sateichii mpou kangmei Asia kito teimaham kajum kadi kathangmei kak kito kangkanii mpouda sam tam magongsii tamle, ka-nta ka-nlangki lung teikii ju mangousei sulo.

³²Teijang teipiinii kangkanii sam hangninii sateichii kangkanii kaki sam hangninii saa mpatle, kadapokii meihang ndwi kalei tei rampou takle sateichii ndwi kaleimei kangkanii kadajangpii ndwi leipo katu tei timakle.

³³Sateichii kangkanii Alekjendargo meihang kak kito poi mpat takle, kadaponii Jehudimeinii mpougo adoikii tui mpat takle, teito Alekjendarnii mpoubahpii kahaisii meihang dakii sam tam mpat tang karam jangpii tiitakle.

³⁴Nlenii mpou ai Jehudi- meile katu tei ahnyiinii tiwosek-kii, meihangnii pungnakii katang, “Ipisa meimah Artimis dile!” sii rok hangninii tiisii saa mpatle,

³⁵Teito namdi mah karyiipii teinii meihang gotei malhii matusupii tamle, “He Ipisa ki sapfiimei! Ipisa ki namdi ai Artimis kadipei mah ninado sating gamto tak kahum tingtuparam kamatei kuitu mah sara kamaningki kakoibamle katu tikasumei ta leipo?

³⁶Teijangpiinii sam hang ai mazhii kasu tiipei kalak taiswisii gonyiinii majungsii kabam ninado chotchotsii mah kado tiilak tang karam takle.

³⁷Kadapokii sara kamaning kito raga kasumei ninado nyii sarago maning mala kasu sapfii- meihang aigo gonyiinii pang gongbam takle.

³⁸Teijangpiinii Demitrius ninado mpougo kaswi kalei baichem katimei hang mah sam ai mei kata hangninii phyiiryiikii lei lepochiinii, Sratki ai laatbamle sateichii sazyii aigo apum katiimeido bamle, ahnyiinii hangninanii hangninii phyiiryiikii kama tei poigong matulo.

³⁹Nlenii gonyiinii kaki kaki sam jangpii fiilei lepochiinii, ajai taiswisii tingnei mata ndwi katu kiteito tiimasang tangle.

⁴⁰Kadaponii tingnei mah akaang kaga sam aikaang ki aito n-gi nrungsii kalei ai nyii jangpiinii sadoi kashyiile sateichii ai kaang ki aito kadapei kaang jangpii nyiinii ndwisii ndwisii leipo katu akaang tei pyiipei wolakle.”

⁴¹Sateichii mpounii ai ai tam kaleitai, mpounii meihang ndwi kalei tei tiipak aitakle.