Read Maram Naga THA 20 Bible Online

THA 20 - Maram Naga bible

THA 20

¹Sateichii koi nrung tei gatu sek-kii, Polnii boumei gotei lat tosii lung tiimadipyii sanii tat n-nou wosii Mesidoniya ki tat tang karam jangpii tatpat takle.

²Sateichii mpounii sazyii teitui tat kagong kiteito ahnyiigo hangkapii tam katwipyii sanii mpounii Gris kitei gongtakle.

³Sateichii mpounii teiki teito sakhiitum bamsanii Sairiya ki katang malyii hoisii tat tanglesii bamleibangpii Jehudimeinii mpougo jumtang karam makumpii tiikajyii tei tigong sek-kii, mpounii Mesi- doniya lampang nlai tang taklesii maning wotakle.

⁴Sateichii Biroya kito Paihus nah sapfii mpou Soptar, Thesolonikamei kak kito Aristarkas ninado Sekundas, Derbe kito Gaiyas ninado Timothi sateichii Asiya kito Taichikas ninado Trophimas, ahnyii ainii mpougo kaswisii tatle.

⁵Ah- nyiinii doi reisii Trosh kito nyiigo koile.

⁶Nlenii ahee kaihai kasu tiirok hang-ngi piinei leimik mangii kashang piinei Trosh ki ahnyiida gong wotakle, tei kito nyii leimik sana bamle.

⁷Sateichii hapta kito karei piinei leimik tei nyiinii tiirok tiirak tang karam jangpii gong ndwi katu tinglang kak, Polnii supounei tatpat tanglesii maning kalu kito ahnyiigo tampyii ralipyii sanii mpounii sam katam tei tinghum asumkii pitakle.

⁸Sateichii nyiinii ndwi kalei ki shang kasagoi kitei thaomi hangkii masei bamle.

⁹Sateichii Iotaikas sii kalat rahang kaleimei hangninii kamlat kuto bamle, mpou ai hangkapii ziitnasii n-ngaktu takle, sateichii Polnii sam tam mathang jupii mpou zyiitu sanii hangtum kashang rasam kiteito takmang takle, ninado taisii poi matu takle.

¹⁰Nlenii Polnii mpou phyiiryii nkwimangsii, mpougo gaiwosii tamle, gonyii hing sulo; kadaponii mpouda karing tei leile.

¹¹Sateichii mpounii tatkhii wosii, tiirok tei tiiraksii chiiwosanii ah- nyiigo kaswisii kathangkii leimik pat kasuta katang tei karashii sii, aitiisii tat n-nou takle.

¹²Sateichii ahnyiinii nah sapfii mpou gotei ringsii poitat tutakle; sateichii ahnyiinii hangkapii nta takle.

¹³Nlenii nyiinii malyii garyiinii katang tei adoi reimaasii Assos ki katang tei malyii tong gong takle; teikito Polgo tong matulesii ma- ningle, kadaponii mpou sekpiinii apipii tatlesii aitiisii kakhatpyii bamle,

¹⁴Sateichii mpounii nyiigo Assos kito kadou wosek-kii, nyiinii mpougo tong malu wosii, Mitailini ki gongtakle.

¹⁵Tei kito nlaigongsii, nyiinii adoipiinei leimik tei Kiyas ki doilampang tei gong wole; sateichii leimik hangninii sousii leimik kanapiinei tei Miletas ki gong takle.

¹⁶Kadaponii Polnii Asiya ki tei tinglang bamtoi laktang karam jangpii, Ipisa tat majupat tosii malyii hoisii tat tutang karam jangpii lung maning wotakle; kada- pokii mazhii leponii mpounii Pentikos ki leimik piinei Jerosalem ki bam tang karam jangpii kalangsii tat tutakle.

¹⁷Sateichii Miletas kito Ipisa kikii mei lang magongsii Charsh ki katingmei hang go mpou dakii lat magong takle.

¹⁸Sateichii ahnyiinii mpouda gong wosek-kii, mpounii ahnyii dakii tamle, “Inii Asiya ki api kangliit karei leimik sekpiinii ting- lang kaleita gonyiigo kaswisii kada takumpiinii bampo katu tei gonyii sekpiinii tile.

¹⁹Katunii, Inii hang- kapii lung manoisii, mikdwi kapat ninado Jehudimeinii n-gu makumpii jumtang karam kito n-gu ajai kaju kapat tei njasii Bangpii mah nga ngasii;

²⁰Saraa lampangkii lung ka- kali ninado nyii Bangpii Jisu Krista dakii kamalum Jehudimei dakiido Grikmei dakiido sakchyii tiisii,

²¹mah kata bitang karam sam gonyii dakii tam ka-mpat kito sateichii mei machii doikii, aki-ki lungkado gonyii- go tam ralikapyii kito kada takumpii Inii nkhiimang makpo katu gonyiinii tile.

²²Sateichii aitoinii julo, rangiinii katam swisii I-Jerosalem ki katang tat leile; tei kito gudato kadapei pat tangpo Inii timakle.

²³Ai katangnii tile, Kabang ninado kamage kalak piinii n-gu koisii bamlesii rangii kamateinii namdi hang kikii n-gu sakchyii pyiile.

²⁴Nlenii gumah tii- kamajyii ninado Saraa mah kalung- set mah kabi rasam mah sakchyii pyiitang karam jangpii, Bangpii Jisu dato Inii doukalu atha tei Inii tiimashang tang karam jangpii, Inii gumah tiilung ai amai bamlesii, ninado gudato maiteenglesii maning makle.

²⁵Sateichii aitoinii, julo, gonyii kak kito Inii Saraa mah sating sazyii rasam tam ralipyiisii tatsii leile, nlenii gonyiihangnii guju nlailoisii ngoulak takle katu ai Inii tile.

²⁶Teijangpiinii meihang mah azai kito I-kama gale katu tingneinii Inii gonyii dakii sakchyii tiileile.

²⁷Kadaponii Saraa mah kamaning hang kito gonyii dakii tam ka-mpat kito Inii nkhiimakle.

²⁸Mpounah mah zai sekpiinii lyii kalu Saraamah Charsh go kamakot, gonyii roinapii ninado Jaokoi hang kiteito machyii wolo; rangii kamateinii gonyiigo jaokoi teimah kakoimei tiipyii takle.

²⁹Inii tattu kaleitai jaokoigo masaklak tang karam, ngoukahing sangyiinii gonyii kak ki liit tangle katu tei Inii tile.

³⁰Sateichii gonyii kak ki sek aito ahnyiitai switang karam jangpii boumeigo chyii mpat tang karam jangpii tiikarampou sam katam sapfiimei pat tangle.

³¹Teijang teipiinii tingkum hangtum katang tei Inii tinghum tingna mikdwi patsii meihang go ralikapyii matou makle katu tei gonyiinii maning wosii sakai wolo.

³²“Sateichii aitoinii Inii gonyiigo Saraa dakii ninado mpou mah jumage kapyii mah samtam kikii pyiitoi leile; samtam aipiinii gonyiigo tiikamakhii ninado tiimatei kaleimei ahnyii hang kak kito dou kamajyii tei gonyii dakii pyii wobuile.

³³Inii mei- mah kado seh sana mak-kii peimani lukanyii tei tiimakle.

³⁴Sateichii bah aipiinii gujangpii ninado n-gu kaswi kaleimei jangpii tha tiitakle katu gonyiinii tile.

³⁵Mahlyii hang kito Inii gonyiigo tiimangou pyiitakle, katunii, tha teisii katii aipiinii nyiinii kasuimeigo tiiha tang karamle, Bangpii Jisunii tam kabam mpoumah samtam hang gotei maningsii, ‘Kadou sung kapyii teinii kisii sadoi bile.’ ”

³⁶Ai tam aisii, mpounii kok kumsanii ahnyii hang go kaswisii riita takle.

³⁷Sateichii ahnyii hangnii hatsii Polgo gaisii matwum takle,

³⁸Mpou ju nlailoisii ahnyiinii ngouloilak taklesii mpounii katam sam jang teipiinii ahnyiinii kisii lung kamage takle. Teito ahnyiinii mpougo malyiini katang tei kapaopyii takle.