Read Maram Naga THA 28 Bible Online

THA 28 - Maram Naga bible

THA 28

¹Teitiisii dwijai kutei nyiinii kaapat tosek-kii, dwipii maguisii kalei teiki sazyii kathang zei tei Melita sii lat leile katu nyiinii titakle.

²Sateichii teiki sazyii kito lungkalei meinii nyiigo tiikamangou lungkasyii teinii meinii tiikalei takum makle; kadapokii sating karyii ninado katoktai jangpii, ahnyiinii mi tiipyiisii nyii meihang go lukai pyiile.

³Sateichii Polnii ting poikii matam poigongsii teitei mi kikii dek kaisekkii, mi maga teipii sanhii hangninii teiki teito patsii mpou bah kikii kabiitnei wotakle.

⁴Sateichii teiki sazyiimei teinii mpoubah kito sanhii kara teinii nju kalei tei ngou wosek-kii, ahnyiinii hangninanii hangniniigo karashiitu takle, “Mei sapfii mpou aipou ai meigo kagimeile katu maning kariirhii takle, mpounii dwijai kito nlek wokido, kasang samtak katii teinii mpougo tiima- ringpyii sutakle.”

⁵Teitii kado mpou- nii sanhii gotei milungkii katung maliit kaisii samah kado mpougo deng sutakle.

⁶Nlenii mpou ai maah-tang takle, mak-kii binasek-kii koumang tai tang taklesii ahnyiinii maningle; nlenii kathangkii ahnyiinii jusii bamkii mpou dato samah kado kaduk kadang tei ngousu sek-kii, ahnyii- lung maning nlaikai gongsii mpou ai sara lesii tamle.

⁷Sateichii tei kiku tei Publias sii kalat, dwipii magui kalei sazyii abangpii mah sazyii chengniikii leile, mpounii nyiigo lukai pyiisanii leimik hangtum ai lungsyii gatsii nyiigo mpouki rhiimatule.

⁸Sateichii aitiisii pat takle, katunii Publias pfii tei riirhii sii ninado zai kajungsii zyiile. Polnii mpouda liitsii riita kaipyiisii mpou phyiiryiikii bah poikaipyiisii mpougo tii mbipyii takle.

⁹Sateichii aitii kaleitai, dwipii magui kalei sazyii teikito kabam rakani mei hangteiniido gongsii aratei tii mbiwo takle.

¹⁰Ahnyiiniido nyiigo hang- kapii adzyii ka-nrou tei njasii tiigatpii tiipyiile; sateichii nyiinii malyii gam tong wosek-kii nyii- jangpii bitang karam mah hangtei ahnyiinii kaipyii takle.

¹¹Sateichii sakhii tum bam sek-kii dwipii maguisii kalei sazyii teiki teito siitai tinglang kak bamsii kalei mbiitnah sung kating taika- rhiipii mah phyii param kapung Alekjendriya meimah malyii hang- ninii gam nyiinii tongsii hoipat takle.

¹²Sateichii Sairakus kikii malyii matou aisii teikito nyiinii leimik hangtum bamle.

¹³Teiki teito nyiinii tat magui gongsii Rigiam ki gong wotakle, teikito tingneikii bamsanii, lamka lampang mah tingkai gwigong sek-kii, zangnanii piinei tei nyiinii Putiyoli ki gong takle.

¹⁴Teibam ki teito nyii kangsanameigo kadou wosii ahnyiinii nyiigo leimik sana ai kaswisii bamlesii khang takle; aitiisii nyiinii Romki gong takle.

¹⁵Teiki teito kangsanamei teinii nyii mah tingha tei shii wosek-kii, Appiyas mah salikijang sateichii siisang karhiiki hangtum sii kalat bamki katang tei nyiigo doutang karam jangpii gongtakle, Polnii ahnyiigo ngou wosek-kii, Saraago tam matoisii lungdi takle.

¹⁶Sateichii nyiinii Rom kitei liit sek-kii, Polgo kakoi saryiimei gotei kaswisii mpou roinapii mbam tang karam jangpii mazhiipyii takle.

¹⁷Sateichii leimik hangtumtai mpounii Jehudimei phyiiryiito doi- majang katatmei go lat ndwi wole; sateichii ahnyiinii gong ndwi wosek- kii, mpounii ahnyii dakii tamle, “He kangsanamei, Inii gumah lui mak-kii nyiipei nyiipaomah kanat kanhiigo mazhii kasu samah kado tiimak kido nyiigo Jerosalem kito kabang kikii kabangmei hangninii tiisii Rom mei bah kikii pyiitoi aitakle.

¹⁸Rom meinii n-gu sam kachyiinhii katu kito, n-gu gitang karam kaang hangninii kado kaga jangpii ahnyiinii n-gu mpat pyiinyii takle.

¹⁹Nlenii Jehudimeinii n-gu mazhii kasu sam katam kito Inii gului dakii tam kamashyii kama hangninii kado ga kado, Inii Kaisar dato nlailoisii samtak tiitang karam tei pat takle.

²⁰Teipiinii aijangpii Inii gonyiigo kadoutang karam sateichii karashii njoitang karam jangpii lat leile. Ka- daponii Kretmeinii maning malumsii kalei mpou jang teipii n-gu bah sagyii rangkat aipii peibamle.”

²¹Teito ahnyiinii mpou dakii tamle, “Nyiinii Judiya kito gomah kaang kito larekdo doumakle, satei- chii kangsanamei kangkii aiki gong kaleimei kak kitodo gomah kaang kito samah kado tam kamashyii mak-kii ryii kamakhiido gale.

²²Nlenii goswi golung kadapeipo katu nyiinii godato shii kajyiitakle katu maningle; kadaponii bee aimei phyiiryiikii bamlyii hang kito karashii kalei ai nyiinii tile.”

²³Sateichii ahnyiinii mpou dakii tingneikii leimik karet kalu kito, ahnyiimei moi mpounii kazyiibam kitei gong takle. Mpounii ahnyii dakii Moses mah ajaitingshang kiteito sateichii Lungkakalingmei mah larek kiteito Saraa mah sating sazyii mah kaang kiteito sakchyii tiisii, sateichii Jisu mah kaang kiteito ahnyiigo malum tang karam jangpii hemsii tingchoito tingkhii katang tam ralipyiile.

²⁴Sateichii mei kangkanii rali kapyii samtei malum wotakle. Nlenii kangkanii malum sutakle,

²⁵Sateichii ahnyiinii ahnyii karapii mazhiisu sek-kii, n-noutakle. Tat n-nou kasunii Polnii ahnyii dakii sam hangninii tamle, “Rangii kamateinii nyiipei nyiipaomei dakii lungkaka- lingpii Isaiya go tiigatpii saa mpat matusii katam teile:

²⁶‘Nangnii lui aimeida tat tulo, sateichii tamlo, gonyiinii kashiinii shiitangle, nlenii tisang tilakle, sateichii kangounii ngoutangle, nlenii swi kitonii tisang tipeiwo lakle.

²⁷Kadaponii ahnyiinii mikpii kangou koipii kashii, ahnyii swinii kati, nryii kagong, sateichii Inii ahnyiigo tii mbipyii tang karam kito mazhiilak tang karam jangpii ahnyii lungtei tii mada aitakle; ahnyii koitei maswisii shii wolak takle, sateichii ahnyii mik tei mikchyii aitakle.’ ”

²⁸“Teijang teipiinii Saraa mah kaleikapyii kasaga karing ai lui kakimei dakii lang m-mangpyiile katu gonyiinii timatulo; ahnyiinii shiitangle.”

²⁹(Sateichii mpounii sam hang ai tam sek-kii, Jehudimeinii ahnyii karapii hangkapii kajyiisii n-noutu takle.)

³⁰Sateichii mpounii ngat kalu aki teiki teito tingkumna bamsii mpouda kagongmei hang go lukaipyiile.

³¹Mpougo meikaniido kanam tiisupii mpounii lungdisii Saraa mah sating sazyii mah tam ralipyiisii sateichii Bangpii Jisu Krista mah kaang kito ralipyiisii bamle.