Read Maram Naga THA 3 Bible Online

THA 3 - Maram Naga bible

THA 3

¹Sateichii Pitar nei Jon-nii kariita mah pung sokchyii kashang tinglang kak Saraa kamaning kilung tatpile,

²sateichii lung kalu sekto pi katwi sapfiimei hangniniigo pang gongsii, Saraa kamaning kilung tat kaliitmei hang dato khangchii matu tang karam jangpii, ngoukabi sii lat kalei Saraa kamaning ki ki takam pibang teikii sating kata keibam leile.

³Mpounii Pitar nei Jon go Saraa kamaning kilung tatliit tuna ngou wosii, jumage kapyii tei doutang karam jangpii khangle.

⁴Teito Pitarnii Jon go kaswisii mpougo tiigatpii jusii tamle, “Neigo julo,”

⁵teito mpoupiina dato mah kanii doutang karam jangpii maningsii, mpounii mpoupiina dakii lungliitsii jule.

⁶Nlenii Pitarnii tamle, “Gumah seh sana ninado kani kahii gale, nlenii gumah kabam hangtei Inii godakii pyii leile Nazaret ki Jisu krista zei kito gungtusii tat tulo.”

⁷Teito mpounii ahgo bah ajii- lamto jum wosii chyiimatu masatpyii takle sateichii binasek-kii mpou pi ninado mpou kakok tei tiisangting- pyii takle.

⁸Teito mpounii gungtu satdo sat takle, tatdo tat haotu takle sateichii mpounii tatpat tatliitsii soksii Saraago tam matoisii ahnyiigo kaswisii Saraa kamaning kilung tatliit takle.

⁹Sateichii mpounii tatpat tatliitsii Saraago tam kamatoi tei meihangnii ngou wotakle;

¹⁰sa- teichii Saraa kamaning ki ngoukabi takam pibangto khangchiisii bam kaleipii teichiile katu tei ahnyiinii tiwosii, mpou dato pat kalei tei kamadat ninado sung kagapii tokryii takle.

¹¹Solomon mah kikajang kamwi sii lat kalei ki teito Mpounii Pitar nei Jon go karashii leibangpii, meihang teinii sung gasii ahnyiida pakgong ndwi wotakle.

¹²Pitarnii meimoi gotei ngou wosek-kii, mpounii ahnyii dakii tamle, “Isrelmeinah, gonyiinii aigo kadajangpii madat leipo? Sateichii kadajangpii gonyiinii nyiigo mik karangsii juleipo? Nyiimah tei- mahampii mak-kii Saraago tiigatpii kamalum kito nyiinii mei aipougo tii mbipyii taklesii gonyiinii maning leipo?

¹³Abraham, Isak ninado Jakob mah Saraa katunii, nyiipei nyiipao- mah Saraa teinii mpouki kaleipii isugo pumtei kava tei pyiitakle, nlenii gonyiinii mpougo teimaham kajum mei bah kikii pyiitoi aitakle, ninado Pailatnii mpougo mpatpyii tanglesii maning kalu katang tei gonyiinii Pailat doisek todo mpougo mazhii makle.

¹⁴Mpounii mateile ninado bile, nlenii gonyiinii Mpougo mazhiisu wole; ninado gonyiinii gonyii jangpii meigo kagi kabamei hangniniigo mpat pyiilosii gonyiinii Pailat dato khangle.

¹⁵Sateichii karing bangpiigo gi aitakle; mpougo Saraanii kataimei kak kito tiima- ringpyii takle, aikaang kito nyiihang- nii sakchyii tiileile.

¹⁶Sateichii mpougo kamalum kito gonyiinii ngou kalei ninado tikalei sapfii mpou aigo mpou zei teipiinii tiisangtingpyii takle; nle mpou paikito kamalum tei piinii gonyiihang doito mpougo tii-mbi kapyii ai pyiitakle.

¹⁷“Sateichii aitoinii, he kang- sanamei; gonyii phyiiryiito apum tiisii kalei meinii tiikalei takumpii, gonyiiniido teitei tisupiinii tii aitakle katu Inii tile.

¹⁸Nlenii Saraanii mpoumah Kristanii kamage kalak leh tang karam jangpiinii Lungka- kalingmei hang mah mwi kito doirei- sii mati kapyii tei aitiisii mpounii madou gong pyii takle.

¹⁹Teijang- piinii gonyii mah kem hangtei tiimagapyii matu tang karam jangpii gonyiinii lung kali wosii nlaigonglo; teitei leponii Bangpii dato kamajung mah tinglang tei gongtangle.

²⁰Sateichii gonyii jangpii kalaipyii kabam Kristago katunii, Jisugo Mpounii lang m-mangpyii tangle.

²¹Saraanii kamatei Lungkakalingmei mah mwi kito ndouto reipii tam kabam takumpiinii mpougo sating gamkii mbam tang karamle, mahlyii hang tiikaranu tinglang tei gong kasuta.

²²Kadapokii Mosesnii tamle, Mpounii n-gu lang kamagong takum- pii, Saraa Bangpiinii gonyii kangsa- namei kak kito Lungkaklingmei hangninii gonyii dakii lang ma- gongpyii tangle, Ahnii gonyii dakii tamtang karam sam hangtei shiilo.

²³Sateichii Lungkakalingpiinii katam samtei swikasu meihang gotei tiimaga tangle.

²⁴Sateichii Samuel sekto sateichii mpou taito kagong Lungkakalingmei hangniido nei- shang tinglang aihang mah kaang kito tam mpatpyii takle.

²⁵Gonyiinii Lungkakalingmei mah ninado Sa- raanii gonyii-pei paomei dakii riishii tiikabam nah sapfiimei hangle; riishii tiikabam kiteito Saraanii Abraham dakii tamle, sateichii gotat goreng kito sazyii pouryii kalung mpung hangnii satoi tei doutangle.

²⁶Sateichii teijangpii Saraanii Mpouki kaleipiigo kalai takle ninado karei kito mpougo gonyii dakii lang m-mangpyii takle, gonyii mah kem pwidi hang kito tat nrek matusii satoi pyiitang karam jangpii.”