Read Maram Naga THA 4 Bible Online

THA 4 - Maram Naga bible

THA 4

¹Sateichii Pitar nei Jon-nii mei moi dakii sam tamleibangpii, kanat kanhii kajum Atingmei, Saraa kamaning kilungto kadi kathang kapungmei ninado sadhumei teinii mpoupiinada gongle.

²Ahnyii tei hangkapii samousu takle kadaponii Tiilamlwi kapyiimei hangna teinii katai kito Jisu ringkhii taklesii mei- dakii ralipyiisii bamle, teitei piinii kataimei ai ringkhii tangle katu tei mangou takle.

³Teijangpii ahnyiinii mpoupiinago jum wosii kabang kikii kai aitakle, kadaponii tei tinglang tei tingkhii takle.

⁴Nlenii kabi rasam tei shiikalu meihang teinii malum wotakle sateichii mei tei moibuibuisii mei thang mangiikii kakum pat takle.

⁵Supounei tei Jehudimei ki apum katiimei, katingmei ninado ajaiting- shang kati ojamei hang gong Jero- salem kito ndwiwo takle.

⁶Sateichii kanat kanhii kajum Tingditupii Anas ninado Kaifas go Jon, Alekzendar sateichii kanat kanhii kajum Tingditupii ki kalungmei hangdo swi leile.

⁷Sateichii ahnyiinii mpou- piinago asumkii masatsanii n-nhiile, “Kadapei teimahampii mak-kii kadapei zei kito gonyiinii ai tiileipo?”

⁸Teitinglang kak Pitarnii rangii kamateipii tokryiisii ahnyii dakii tamle, “He mei aimeigo apum katii- mei ninado katingmeihang,

⁹neigo tingnei leimik, pi lung kama kasuimei hangninii phyiiryiikii kabi tiikapyii jangpii kadapeipiinii aipougo tii mbipyiiposii n-nhiileponii,

¹⁰gonyiihangnii ninado Isrelmeinah hangnii ai ai timatulo, katunii gonyiinii Krosh gamkii dhangsii gitoi kalei, Saraanii kataimei kak kito tiimaring kapyii Nazaret ki Jisu zei kito, katunii mpou paikito mei aipou ainii biwosii gonyii doito sat leile.

¹¹Gonyii ki katiimeinii mazhii kasu kuitu tei hang kak kito roukatii ki kha mah kuitu tiiwo takle.

¹²Sa- teichii mei kaki hangninii dakado keikapyii karing tei gale, kadapokii nyiigo keipyii tang karam, meihang dakii pyiikabam sating kang aito zei kaki hangninii kado gale.”

¹³Teito ahnyiinii Pitar nei Jon mah lung kadi tei ngou wosek-kii, ninado larek tikasu meida meile katu tei tiwosek-kii, hangkapii sung ga- takle, sateichii mpoupiina ai Jisugo kaswisii kaleimeile katu tei ahnyiinii tigong takle.

¹⁴Sateichii ara kani kito bikalupii teinii ahnyiigo kaswisii kabam tei ngou wosanii, ahnyiinii teiphyiiryii teikii samah kado katampii gatakle.

¹⁵Nlenii ndwibam kiteito saba tatpat tolosii mwija pyiisii, ahnyiinii hangninanii hang- niniigo karashiisii tamle,

¹⁶“Aimei phyiiryiikii nyiinii kadapei tiitang- po? Kadapokii ahnyiinii kasamsang tha tiikamangou ai tiitakle, tei tei Jerosalem kito kaleimei hang dakii madupii mangou aitakle, sateichii teitei nyiinii mazhii kasu tiipei wolakde.

¹⁷Nlenii ai ai meihang dakii kisii tam kahi kasu tiisii ahnyiinii toisekpii meida kado zei aikito tam matu kasu tiisii nyiinii ahnyiigo tii kahuile.”

¹⁸Teito ahnyiinii mpoupiinago lat tosii, tamsangdo tam kasu, ralido ralipyii kasu tiisii ahnyiigo mwija pyiitakle.

¹⁹Nlenii Pitar nei Jon-nii ahnyiigo khekalatle, “Saraa go sung kisii gonyii sam kaswi ai Saraa mah mikjot kito matoupo gonyiinii samtak tiipyiilo.

²⁰Kadapokii nyiinii ngou kalu ninado shiikalu tei tam- supei wolakle.”

²¹Sateichii meimoi jangteipii ahnyiinii mpoupiinago kada takumpii tiikamage tangpo katu samah kado tei gasii, mpoupiinago kisii kakahwi sam tamsanii mpat aitakle, kadapokii meihangnii pat kalei teijang teipii Saraago tam matoile.

²²Kadapokii ai ra kani kito tii-mbi kapyii tiikamangou sapfii mpou tei tingkum rekdaisii kikii takle.

²³Sateichii mpoupiinago mpatpyii sek-kii, mpoupiinanii ahnyii bemeida nlaigong sii, kanat kanhii kajum Tingdimei sateichii katingmeinii mpoupiina dakii katam sam hangtei tam takle.

²⁴Teito ahnyiinii teitei shiiwo sek-kii lungswi hangninii tiisii Saraa dakii ahnyiinii rok sagoisii tamle, “He Bangpii, nangnii sating sazyii, dwijai ninado teilungto kaleihang go tiipyiile;

²⁵rangii kamatei paito goki kaleipii nyii pfii Devit mwi kito nangnii tampyii takle, ‘Kada jangpii lui kakimeinii kaishyii leipo sateichii aimei nah ainii kakadak lungswi ai kadajangpiinii maning leipo?’

²⁶Bangpii phyiiryiikii ninado mpoumah Krista phyiiryiikii sazyii pouryii mah sagong hangnii tusat takle ninado pum katiimei hangnii ndwi wotakle.’

²⁷Kadapokii nangnii thao manuk kapyii goki kaleipii kamatei Jisu kaswisii Herotniido, Pontios Pai- latniido,

²⁸nangnii gobahpii ninado goswipii adoito pat tang karam, reipii tiida kabam hangtei pat matutang karam jangpii, kasangpii namdi aikikii ahang go chyii ndwipyii takle.

²⁹Aitoinii he Bangpii, ahnyiinii neigo tiikahui kalei ai juseilo, sateichii ara kanimeigo tii mbi matutang karam ninado goki kaleipii kamatei Jisumah zei paiki teito tiikamangou hang ninado kamadat kamadat tiiwo kabui,

³⁰nangnii gobah hampatpyii kalei kak kii, hangkapii lung disii, gosam tam wokabui goki kaleimei dakii jumage pyiilo.”

³¹Sateichii ahnyiinii riita ka- leitai, ahnyiinii ndwisii kalei bamtei nlai takle sateichii ahnyiihang tei rangii kamateipii tokryiisanii, kahing gasii Sara sam tam mpat takle.

³²Teito kamalum mei hangtei aswi alung hangninii tiisii bamle, sateichii ahnyii mei hangninii ka- niido mpou mpoumah amah kabam hangtei gumah roinale katu tei tam makle, nlenii ahnyiinii mah kabam hangtei meihang mah tiisii jumle.

³³sateichii Jisu Kristanii ringkakhii mah akaang ki kalei teito teimah teimaham kadi tei kaswisii Tiilamlwi kapyiimeinii Bangpii Jisu ringkakhii mah sakchyii tiile; sateichii ahnyii meihangnii jumage kapyii kadi tei dou wole.

³⁴Kadapokii ahnyii kak kito tang kalak mei kado gale, kadaponii sazyii mak-kii ki mei- hangnii teitei joitoisii, joikalu amah teimah tei poigongsii,

³⁵Tiilamlwi kapyiimei dakii pyiitakle, sateichii mpou mpounii poikamajyii taiswisii meihang dakii jaipyii takle.

³⁶Sateichii Kaipras kito lung kalei, Levitmah sadung, Tiilamlwi kapyiimeinii Barnabas sii zei lat kaleipii, (zei ai kadat mpatkii tii ka-nchokpii ziile.)

³⁷Joseph mah alu hangninii bamle, mpounii teitei joitoisii, sana tei poigongsanii tiiilamlwi kapyiimei dakii pyiitakle.