Read Maram Naga THA 7 Bible Online

THA 7 - Maram Naga bible

THA 7

¹Kanat kanhii kajum Tingditu- piinii tamle, “Ai ai kasangpiide?”

²Stifannii khekalatle, “Kang sana- mei ninado gu pfiimei hang, n-gu shii seilo! pumtei kava mah Saraa teinii nyii pfii Abrahamda gongsii mangou- pyiile, mpounii Haran sazyii ki maa lungtu kasunii, Mesopotamiya sazyii ki lung kaleidou,

³mpougo madhang- pyiisii tamle, ‘nangnii go sazyii ki teito sateichii goki kalungmei dateito tat pat tosii Inii godakii mangoupyii tang karam sazyii kitei tat tulo.’

⁴Teitinglang ki mpounii Kaldiya sazyii kiteito tatpat tosii Haran sazyii ki lungtu takle. Sateichii mpou pfii tai kaleitai, teiki teito gonyiinii aitoi bam kalei sazyii aikikii Saraanii ahgo pangpat pyiile;

⁵Saraanii Abrahamgo sazyii tei njai hangninii kado mpoumah roinii tiisii, mpoupi kakuni katangdo pyiimakle, nlenii Saraanii teitei mpoumah tiitanglesii sateichii teitei mpougo ninado mpou- taa mpou nahmeigo pyii tanglesii riishii tiipyiile. Saraanii Abrahamgo rashii tiikapyii tinglang kaktei Abra- ham nah gale.

⁶Sateichii Saraanii aitiisii tamle, mpoutaa mpou nahmeinii meiki sazyiiki lung tangle, sateichii teiki sazyii mei teinii ahnyiigo kabangnah tiimatusii tingkum haimadai katang ai hungsii tiikamage tangle.

⁷‘Nlenii ahnyiinii anga ngatang karam mei lui phyiiryii teikii Inii samtak tiitangle, sateichii tei taito ahnyiinii teiki sazyii kiteito tatpat tosii bam aikito n-gu riita tangle, sii Saraanii tamle.’

⁸Sateichii Saraanii mpou dakii tiigyii malem tang karam mah sat tang karam samtam tei pyiitakle, sateichii mpounii Isak go lung kaleitai leimik siisat sang sekkii mpougo tiigyii malem aitakle; Isaknii Jakob go ninado Jakobnii nyii pfii nyii paomei keariisiinakhiigo aitiisii tiipyii takle.

⁹“Sateichii nyii pfii nyiipaomeinii Joseph go ngourousii mpougo Izip kikii joitoi aitakle; sateichii Saraanii mpougo kaswipyii sanii,

¹⁰mpoumah kamage kalak matum madum kiteito pang maju pyiisii Izip ki sagong Pharo mah lungkasyii ninado swirek kabi tei pyiitakle; sateichii mpounii mpougo Izip ninado mpoumah ka- lung mah amahlyii hang phyiiryiikii Governor tiimatu takle.

¹¹Sateichii Izip ninado Kainan sazyii hangki tak kateeng ninado hangkapii kamage kalak tei pat takle; sateichii nyii pfiimeinii chiitak dousu takle.

¹²Teito Izip sazyiiki kachii kasak leile katu tei Jakobnii shii wosek-kii, karei reisang kito nyii pfiimeigo lang mpatle.

¹³Sateichii hangna kashang kito Josephnii mpouki sanamei dakii matipyii takle, sateichii Joseph ki kalungmeigo Pharo sagong doikii tam mpat takle.

¹⁴Sateichii Joseph- nii lang mpatsii mpou pfii Jakob ninado mpouki kalungmei hang mei reksiinasii mangii nkhii go mpou dakii lang magong takle;

¹⁵Sateichii Jakobnii Izip ki liit takle, ninado mpoudo nyii pfiimei hangdo taitakle.

¹⁶Sateichii ahnyiigo Sekhem kito kalei Hamor nah sapfiimei dato Abra- hamnii sana pyiisii lyiikalu roubam kiteikii poigoi takle.

¹⁷“Nlenii Saraanii Abraham go mazhiisii riishii tiikabam tinglang tei nagong sek-kii, Joseph go jutikasu Izip ki sagong kaki hangninii patloi kasuta,

¹⁸Amei tei Izip ki moibuibui, dibui buitu takle.

¹⁹Sagong teinii nyii luigo kadat karyiisii tiimagesii ahnyii nah kacheng hang go ring matu kasu tiisii rat toi matule.

²⁰Teitinglang kaktei Moses go lung takle, sateichii mpou ai Saraa doito ngoukabi nah kacheng hangniniile, sateichii mpougo mpou pfii kito sakhii hangtum ai makot makhiile.

²¹Sateichii mpou kito mpougo rat toi aisek-kii, sagong nah sapwi mpei teinii mpougo poi wosii mpoupei nah kasang takumpii makot makhii pyiile.

²²Mpougo Izipmeinah mah swirek kabi hangtei ralipyiisii mpou ai samtam kito ninado atha kito kadi kathangmei hangninii tiiwole.

²³“Mpounii tingkum rekdai sang sekkii, mpoutai karhii ninado mpou sung kating Isrelmeinah gotei mpou lung kito jukanyii tei pat takle.

²⁴Sateichii ahnyii kak kito mei hangniniigo Izipmeinahnii tiimajyii supii tiikamage kapyii tei ngou wosanii, mpounii ahgo tiihasii, Izip- meinah gotei gi aisii akum fiitakle.

²⁵Saraanii mpougo jumpyiisii ah- nyiigo matapii lat toipyii matutangle katu ai mpou luinii tilei tanglesii Mosesnii maningle, nlenii ahnyiinii tisuwole.

²⁶Supounei tei mpounii Isrelmeinah hangna kadatsii kalei tei ngou wosii, mpounii ahnei hangna kak-kii kamajung tei poigong pyii kabui mah tiisii mpounii tamle, ‘Shii- pyiilo, gonei ai Isrelmeinah karale, kadajangpii gonei aitiisii kadat leipo?’

²⁷Nlenii mei kakipiigo kasang kasu tha katiipii teinii Moses go lutuikii tui mpatsii tamle, ‘N-go tanii nei phyiiryiikii pum katii ninado samtak katiipii tiipyiipo?’

²⁸Ndazyii nangnii Izipmeinahgo gitoi kalei takumpiinii n-gudo gilesiime?

²⁹Sateichii ai tamsek-kii, Mosesnii pak tusii, Mediyan sazyii kito bamtu takle, teiki teito mpounah sapfiimei hangna lung wotakle.

³⁰“Tingkum rekdai sang sek-kii, sinai zang mah sazyii kamarong kito sating gamlui hangninanii rangum hangninii ki misung lung teito mpougo mangoule.

³¹Sateichii Mo- sesnii teitei ngou wosii, mpounii ngou kalei gotei madat takle sateichii tii- gatpii jutang karam jangpii mpounii tatkhii manang sek-kii, Bangpii dato rok hangninii gongle.

³²Inii gonyii pfii gonyii paomei mah Saraa Abra- ham mah, Isakmah ninado Jakob mah Saraa teile; teito Mosesnii nchyiidung dungsii tiigatpii jusu- takle.

³³Teito Abangpiinii mpou dakii tamle, gopi kito pichot tei loktoi ailo, kadapokii nangnii sat kalei bam ai kamatei sazyiile.

³⁴Izip kito kalei gumah mei hang mah kamage kalak matum madum tei Inii ngoutakle, sateichii ahnyii mah kamage rok tei shiitakle sateichii Inii gonyiigo kaleipyii tang karam jangpii gong leile, sateichii aitoi patlo, Inii n-go Izip kikii lang mpat tangle.

³⁵“Tanii n-go pum katii ninado samtak katiipii tiimatu pyiipo? sii ahnyiinii mazhii kasu Moses aigo rangum kabi kito mpou dakii mangou kapyii sating gamlui bah teipiinii apum katii ninado pang mpatpyii matutang karam jangpii Saraanii lang mpatpyii takle.

³⁶Mei aipou ainii Izip kito, dwijai kaghang kito sateichii sazyii kamarong kito tingkum rekdai ai kamadat kamadat tha ninado tiikamangou hang tiisii ahnyiigo pang mpatpyii takle.

³⁷Saraanii gonyii kangsanamei hang kak kito gonyii jangpii go kakum Lungkakalingmei hangninii mpat- pyii tanglesii Isrelmeinah dakii tam kabam Moses tei aile.

³⁸Sinai zang gamto mpou dakii tam kapyii Sating gamlui teinei nyii pfii nyiipao meigo kaswisii sazyii kamarong kito meimoi kakto kabam mpou tei aile. Mpounii nyii dakii pyiitang karam ringkalei samtei doutakle.

³⁹“Nyii Pfii nyiipaomeinii mpou sam swirousii mpougo ahnyii dato twitoi aisii, ahnyii lungswi tei Izip sazyii kikii ngaryii gongsanii Aron dakii tamle,

⁴⁰nyiidoi reipyii tang karam, nyiijangpii sara hangtei tiipyiilo; kadapokii nyiigo Izip sazyii kito pang mpat kapyii Moses tei aito kadapei pat takpo nyiinii tisutakle.

⁴¹Teito ahnyiinii teitinglang ki twomnah hangninii tiiwosii, ating- tupiinii katii param dateikii pyiika- toi poigongsii ahnyii bah chempiinii tiiwo kalu param dateito ahnyiinii nta nlangtu takle.

⁴²Teijangpii Saraanii ahnyii dato tat nryiitu takle ninado ahnyiigo Sating gam sageiti hang go riita matutakle; Lungka- kalingmei mah larekbung kikii ryii kabam takumpiinii: ‘Isrelmeinah! Sazyii kamarong kito tingkum rekdai gonyiinii karat tang karam ninado pyiitoi tang karam kamyii tei gudakii pyiitoi makpo?

⁴³Sateichii Molak sara mah dwipeiki ninado sageiti mah sara Rempham mah param, mata tang karam jangpii gonyii bahpiinii tiiwo kalu param hang gotei gonyiinii poitatle, teijangpii Inii gonyiigo Bebilon sazyii ki katang majusii kathaitoi tangle.’

⁴⁴“Nyii pfii nyii paomeinii mahpwizyii kito kabam tinglang kak tei Saraa haikajyii mah dwipei ki tei ahnyiigo kaswisii bamle. Teiteinii Saraanii Moses go mangou kapyii jaitalui takumpiinii tiibamle.

⁴⁵Nyii pfii nyiipao mei doito Saraanii baatoi kalei luimei mah sazyii kitei tat kaliit tinglang kak, dwipeiki nyii pfii nyiipao meinii adoidoi douhumsii Joshuwa go kaswisii poigong takle, teitei Devit haki katang tei bamle.

⁴⁶Mpounii Saraa mah lungkasyii tei dou wole, sateichii mpounii Jakob mah Saraago mbam tang karam bamtei mpougo pyiilosii mpounii Saraa dato khangle.

⁴⁷Nlenii Solo- monnii Saraa jangpii ki hangninii tiipyii takle.

⁴⁸“Nlenii sagoi kaki Saraa teinii meinahnii katii aki kitei bamlei mak- le; lungkakalingmeinii tam kabam takumpii:

⁴⁹Abangpiinii tamle, ‘Sating gam ai gu sagongbamle ninado sazyii ai gupi kakunile, da kakum ki tei gonyiinii gujangpii tiipyii tangpo? Inii bam tang karam bamtei kadaki leipo?

⁵⁰Ai mahlyiihang ai Inii gubahpii tiipyii makpo?’

⁵¹“Gonyii kadaziikapii kamalum gapo? Gonyii lung ai kadaziikapii teipo? Saraa sam shii tang karam kito gonyii khoi ai kadaziikapii teipo! Gonyii ai gonyii pfii gonyiipoumei takum takle; gonyiiniido rangii ka- mateigo mazhii makle!

⁵²Gonyiipfii gonyiipou meinii tiikamage kasu Lungkakalingmei hangninii kado leigapo? Mpou mah kasang kama- jyiipii gongtanglesii gong kasunato reipii mati kapyii Saraamah sampao kapungmei hang gotei ahnyiinii gitoi aitakle sateichii aitoinii gonyiinii mpougo schoi choikaipyiisii mpougo gitoi aitakle.

⁵³Gonyiinii Saraa mah ajaitingshang tei doukalu mei- hangle, teitei sating gamlui dato m-mangpyiile, nlenii gonyiinii swisu takle.”

⁵⁴Sateichii ahnyiinii samhang ai shii wosek-kii ahnyii lungtei rakarhiipii tokryiisanii, mpou phyii- ryiikii ahnyiinii aghii kaget tutakle.

⁵⁵Sateichii mpounii rangii kama- teipii tokryiisanii sating gamkii rajang matukii Saraa mah pumtei kava ninado Jisunii Saraa mah bah ajiilam pangto sat kalei tei ngou wosii tamle,

⁵⁶“Julo, Sating gam kamwi laatkapyii ninado meinah sapfii mpou teinii Saraa mah bah ajiilam pang teito satsii kalei tei Inii ngoutakle.”

⁵⁷Nlenii ahnyiinii rok sagoisii saasanii ahnyii koitei kabanei wosii lungswi hangninii tiisii mpou gam kachotkhii takle.

⁵⁸Sateichii ahnyiinii mpougo namdi kiteito saba chyiipatsii mpougo kuitupii rot tutakle sateichii kangoumei teinii ahnyii peimani tei, zei Sol sii kalat rahangmeinah hangninii pibangkii kai aitakle.

⁵⁹Sateichii Bangpiigo kalat sateichii “Bangpii Jisu, Gu rangii ai poipyiilo” sii riita leibangpii ahnyiinii mpougo kuitupii rotsii bamle.

⁶⁰Sateichii mpounii kok kumsii lat sagoisii riitale, “Bangpii, ahnyii phyiiryiikii kem ai kaipyii seisulo.” Teito sam ai tamsii mpounii majutu takle.