Read Maram Naga ROMMEI 15 Bible Online

ROMMEI 15 - Maram Naga bible

ROMMEI 15

¹Sateichii kamalum kito kasangtingmei nyiinii nyii- jangpii roinii dzyiibi tang karam tiisupii, kamalum kito kaswimei mah pot kamaswi tei pungha tang karamle.

²Nyiimei hangnii mpouki tiinameigo, ahnyii bitang karam sateichii ahnyiimah kamalum tei tiimakhii tang karam jangpii dzyiibi tiimatulo.

³Kadapochiinii Kristaniido mpounii mpou roinago dzyiibi tiimakle, nlenii ryii kabam aitakumpiinii, “N-go dzyiikanui meimah dzyiikanui hangtei guphyiiryii takliit takle.”

⁴Kadaponii kabi rasam kito ryiikabam mah leh kati sateichii lung tiimadi kapyii paikito nyiinii maning kamalum tei doutang karam jangpii leimik karei kito ryii kabam hangtei nyiigo ralipyii tang karam jangpii ryiibam takle.

⁵Lungswi hangninii tiisii gonyiinii rok hangniniipii, nyii Bangpii Jisu Krista mah Saraado tiisii kalei ninado Apfiido tiisii kalei gotei tam matoi tang karam jangpii,

⁶Krista Jisu taiswisii hangninanii hangniniigo lungswi masamsii lungwo kabui tei, leh kati sateichii lung tiimadi kapyiimah Saraa teinii gonyii dakii pyii matulo.

⁷Teijangpii Kristanii gonyiigo lukai kapyii takumpii, Saraa mah pumtei kava jangpii gonyiiniido hangninanii hangniniigo lukaipyiilo.

⁸Kadaponii Inii tam leile, peipaomei dakii riishii tiipyii kabam hangtei gongmatwi matu tang karam jangpii sateichii luikakimei hangnii mpoumah lungkasyii jangpii Saraa go tam matoi matutang karam jangpii,

⁹Saraamah kasang tei mangou tang karam jangpii, Kristago tiigyii malem ka- leimei mah anga kangamei tiimatu aitakle; ryiikabam aitakumpiinii, “Teijangpii Inii luikakimei hang kak kito n-go tam matoi tangle, sateichii gozei kikii lhii tiitangle.”

¹⁰Sateichii nlailoisii aitiisii tamle. “Oh luikakimei hang, gonyiinii mpou mah meigo kaswisii rangalo,”

¹¹sateichii nlailoisii, “Luikakimei hang bangpiigo tam matoilo, sateichii meihangnii mpougo tam matoi matulo.”

¹²Sateichii nlailoisii Isaiyanii tamle, “Jesse mah maatei pok pat tangle, sateichii luikakimei phyiiryiito apum tiitang karam jangpii kagong mpou zei gotei luikakimei hangnii maning malum tangle.”

¹³Maning kamalum mah Saraa teinii gonyiigo ka-nta sateichii kamajung teipiinii kamalum kito tokryiipyii matulo, rangii kamatei mah teimaham teipii gonyiinii maning kamalum tei doukiwo kabui jangpii.

¹⁴Kangsanamei, kabipiinii gonyii dato tokryiisii leile, swirek kati hang doutakle sateichii hangninanii hang- niniigo tampyii ralipyii buile katu tei Iniido gonyii kaang kito malum takle.

¹⁵Nlenii lui kakimeihang dakii Inii Krista Jisumah nga kangamei tiitang karam jangpii Saraanii gudakii pyii kabam jumage kapyii tei kaang kiteito, gonyiigo maningloi matu katu takumpii, Inii gonyii dakii akaang chingniikii pyiiryiikii lung- disii ryii bamle.

¹⁶Rangii kamateinii tiimatei kalei luikakimeigo pyiikatoi tei lukai kabui tiisii, Inii kanat kajum Atingmei takumpii Saraa mah kabi rasam mah nga ngaleile.

¹⁷Teipiinii Krista Jisu dato Saraa jangpii Inii tha tiikajyii kaang jangpii Inii det tiitang karam leile.

¹⁸Kadaponii samtam ninado tha katii teipii tiikamangou siitihang sateichii kamadat kamadat mah teimaham teipii, Rangii kamatei mah teimaham teipii, luikakimeinii katam swimatu tang karam jangpii, Kristanii gupaito tiikapyii tei supii- nii Inii mah hangninii kado lungdisii tam lakle.

¹⁹Aitiisii Jerosalem kito Illurikam go kamagui katangtei tatsii Inii Krista mah kabi rasam tei tam ralipyii lahok takle.

²⁰Nle, aitiisii Inii kaki hangninii mah kibangmaa phyiiryiikii tiimakhii lak tang karam jangpii, Krista mah zei tisang kasu bam kiteito kabi rasam tei tam ralipyii tang karam ai gu swi kito raang kalule;

²¹Nlenii ryii kabam aitakumpii, “Mpou kaang kito tam sang tam matipyii kasumei tei ngoutangle, sateichii mpou kaang kito shiisang shii kasumei tei tigong tangle.”

²²Tei kaang kito Inii gonyiida gongtang karam tinglang kadaziikii kito n-gu namwo takle.

²³Nlenii aitoinii sazyii baang aitoito Inii tha tiitang karamni gakatu taiswisii sateichii tingkum kadaziikii Inii gonyiida gongnyiisii kalei taiswisii.

²⁴Inii Spen ki mangtang karam mbui kapat tinglang kak, tat maju pat gonyiigo Inii kadou tanglesiii ma- ningle, sateichii Inii gonyiigo kadou kaleitai Inii mbui matang karam bamni tei gonyiinii n-gu kapou sei- tang lesii maningle.

²⁵Nlenii aitoinii kamateimei nga ngatang karam jangpii I-Jerosalem ki tat tutangle.

²⁶Kadaponii Mesidoniya ninado Akaiya kito kaleimeinii Jerosalem kito kalei kamalum mei kak kito mah kagamei jangpii mah chengniikii pyiikatoi ai leitakle.

²⁷Nle, ahnyii- mah dzyii karanga tei leitakle, sateichii kasangpii ahnyii teinii ahnyii dakii pyii kamajyii pow tei pungleile, kadaponii Jehudimeinii ahnyiimah rangii mah satoi tei luikakimei dakii njai leponii luikakimei teinado mah pot mah satoi tei poi mpatsii Jehudimeigo tiiha kajyiile.

²⁸Teipiinii ai tha ai Inii tiisang aisekchii sateichii ahnyii jangpii poi ndwi kalu sana hangtei ahnyii bah kikii pyii aitakle sekchii, Inii Spen ki gongtang karam jangpii tat tutangle, sateichii teiki pwidi tat leibangpii Inii gonyiigo kadou tangle.

²⁹Sateichii Inii gonyiida kagong tinglang kitei Krista mah katokryii satoi tei kaswisii Inii gongtangle katu tei tile.

³⁰Sateichii kangsanamei Judiya kito kalei malum kasumei dato n-gu keipyii tang karam jangpii sateichii Jerosalem jangpii Inii tiikalei tha tei kamatei meinii lukei wokabui tiisii,

³¹gujangpiinii Saraa dakii gonyiinii n-gu kaswisii tiigatpii riita njoi pyii matu tang karam jangpii, nyii Bangpii Jisu Krista paito sateichii rangii kamatei mah lungkasyii paito Inii gonyii dato khangleile;

³²Saraamah kamaning kamarei kito Inii gonyiida ntasii gongsii gonyiigo kaswisii ka-ntak tei doumatu tang karam jangpii,

³³kamajung mah Saraa teinii gonyii hang go kaswipyii matulo, Amen.