Read Maram Naga ROMMEI 7 Bible Online

ROMMEI 7 - Maram Naga bible

ROMMEI 7

¹He kangsanamei, meinahnii ring kaleita tei ajaitingshang teinii meinah pyiiryiito apum tiisii bamle katu tei gonyiinii timakde? Kada- ponii ajaitingshang katimei dakii Inii tam leile.

²Kadapochiinii kalak tiikalei sapwimei gotei ring kalei mpoupei mah naa dateikii Ajaiting- shang teinii kangbamle. Nlenii mpoupei mah naa teinii tai takle leponii mpoupei ai go naa dakii kangkabam ajaitingshang ki teito mpatpyii aitakle.

³Teitakumpiinii mpoupei mah naa teinii ring kalei kak mpoupeinii sapfiimei kaki hang- niniiki gongtu leponii mpoupeigo mashung kamahapei sii lat tangle. Nlenii mpoupei mah naa teinii tai takle leponii, teimah ajai tingshang kiteito mpoupeigo mpatpyii aitakle. Teipiinii mpoupeinii sapfiimei kaki hangniniiki gongtu kido mpoupei tei mashung kamahapei makle.

⁴Tei takumpiinii he kangsanamei, Gonyiinii kaki hangninii mah, katunii katai kito ringkhii kalu Ahmah tiitang karam jangpii, gonyiido Krista mah apum paito Ajaitingshang lamtuito tai takle, ai ai nyiinii Saraa dato ati-matitang karam jangpiiniile.

⁵Nyiinii pum zai lamto lung kalei tinglang kak, ajaitingshang teinii tiimarak kapyii nyii pum nyii zainii kamarei ka-nta hangtei nyiipum pot mah njaihang kito, katai mah ati-mati matutang karam jangpii atha tiisii bamle.

⁶Nlenii aitoinii ryii kabam kaham ajaitingshang tai tei swisupii rangii mah karanu tiilung kito nyiinii anga nga tang karam jangpii, katai teinii nyiigo maringpouchyiimeigo takumpii jumnei kabam, ajaitingshang kiteito mpatpyii ai takle.

⁷Teitii leponii kadapei tam tangpo? Ajaitingshang ai kempo? Teisang teimakle, Nlenii kem tei kadapeipo katu tei ajaitingshang teinii n-gu timatule, ajaitingshang teinii “Meimah lunyii sulo.” sii tambam suleponii lukanyii katu tei kadapeipo katu Inii tilakle.

⁸Nlenii kem teinii akaikabi tei kakhatsam kito dou wosii gudakii lukanyii lungswi hangtei pung gong takle, kadaponii ajaitingshang haisupiinanii kem teinii kataile.

⁹Tinglang hang- niniiki Inii Ajaitingshang haisupiinii lungle, nlenii kakhatsam tei gong sek-kii kem tei ringkhii takle sateichii I tai takle;

¹⁰Ringtang karam jangpii riishii tiikabam kakhatsam tei katai pung gong takle.

¹¹Kadaponii kem teinii ajaiting- shang paito akaikabi tei dou wosii teiteipii n-gu satui sadzyii tiisii n-gu gi aitakle.

¹²Teipiinii ajaitingshang teinii mateile, sateichii kakhatsam teinii mateile majyiile ninado bile.

¹³Teitii leponii kabi teipii gudakii katai pung gong leipo? Teisang teimakle. Nlenii kem gotei kem lesii mangou tang karam jangpii kabi paito kem teinii gudato taitang karam mah tha tiisii gudakii katai tei pung gong takle; ai ai kakhatsam paito kem teinii kisii kem tiimatu tang karam jangpiiniile.

¹⁴Kadapochiinii ajaitingshang teinii rangii mahle katu tei nyiinii tile, nlenii Inii kem dakii joitoi kalei taiga kabui meinahle.

¹⁵Kadaponii Inii tiikalei tei Inii timakle kadaponii Inii tiikanyii tei Inii tiimakle, nlenii Inii ngou karou tei Inii tiile.

¹⁶Teipiinii Inii tiikarou tei Inii tiisii bamle leponii, ajaitingshang ai kabile katu tei Inii mazhii takle.

¹⁷Teitii leponii teitei tiikalei tei Inii sutakle, nlenii gulungto kabam kem teiniile.

¹⁸Kadaponii guda, katunii gupum pot lung aito kabi samah kado gale katu tei Inii tile, kadaponii kabi tei Inii maning wobuile, nlenii kabi tei tiitang karam gale.

¹⁹Kadapokii Inii tiikanyii kabi tei Inii tiimakle, nlenii Inii tiikarou kashyii tei Inii tiile.

²⁰Aitoinii Inii tiikarou tei Inii tiisii leileponii tei tiikalei tei Inii sutakle, nlenii gulungto kalei kem teiniile.

²¹Teipiinii Inii kabi tei tiikanyii tinglang kak kashyii teinii n-gu ka- swisii kalei ai ajaitingshang teiniile katu tei Inii ngoule.

²²Kadaponii gulungto kalei mei tai tei swisii Saraamah ajaitingshang kito I-ntale;

²³nlenii gupumpot mah njaihang kito kalei gulungswinii maziipyii kalei ajaitingshang gotei, sateichii gupumpot mah njaihang kito kalei kem mah ajaitingshang mah maring- pouchyiimei tiimatu tang karam jangpii ajaitingshang kakinii saryii tiisii kalei tei Inii ngoule.

²⁴I-ai kadazyiikapii kamage kamarhii meipo, n-gu kataini pangtat kalei apumki aito tanii n-gu poi mpatpyii tangpo?

²⁵Teitiileponii, I ai guroi- piinanii Saraa mah ajaitingshang gotei gulung swi kamaning piinii anga ngale, nlenii kem mah ajaitingshang gotei gupum teipiinii nga ngale, ai tiikapyii Saraago, nyii Bangpii Jisu Krista paito halangle.