Read Maram Naga 1 KORENMEI 1 Bible Online

1 KORENMEI 1 - Maram Naga bible

1 KORENMEI 1

¹Saraamah kamaning kamarei paikito Jisu Krista mah tiilamlwi kapyiimei hangninii tiisii lat kalu Polnii sateichii nyii sanapii Sostenesnii Koren kito kalei charsh dakii,

²katunii kamateimei tiisii lat kalu, Krista Jisu dato tiimatei kalei ahnyii dakii sateichii nyii Bangpii, ahnyii mahdo nyii mahdo tiisii kalei Jisu Krista zeigo bamlyii hang kito matasii kaleimei hang dakii mati leile:

³Nyii pfii Saraa sateichii Bangpii Jisu krista dato jumage kapyii ninado kamajung tei gonyiigo pyii matulo.

⁴Krista Jisu paikito gonyii dakii pyii kabam Saraamah jumage kapyii jangteipii Inii gonyii jangpii tinglang kaleita Saraago hakalang tamsii leile;

⁵Kadaponii Krista dato leikatu kito gonyiinii mahlyii hang kito, samlat hang kito, sateichii swirek kati hang kito niki takle;

⁶aitiisii Krista mah kaang kito sakchyii tei gonyii kak kito tiisangtingpyii takle.

⁷Teipiinii nyii Bangpii Jisu Kristago mangou tang karam jangpii koisii koisii gonyiinii rangiimah luha dou- tang karam samah kado tangkasu tiimakle;

⁸Sateichii nyii Bangpii Jisu Krista mah leimik piinei gonyiinii kakui kama gatang karam jangpii mpounii gonyiigo kalui katang tei tiisangting pyiitangle.

⁹Saraanii malum buile, mpou paikito mpou nah sapfii mpou Jisu Krista katunii, nyii Bangpiigo kanghe tiimatu tang karam jangpii gonyiigo laatpyii takle.

¹⁰He kangsanamei, gonyii hang- ninanii hangniniigo mazhiisii bamle, sateichii gonyii kak kito njairiit-riit katu tei galo, nlenii njoi katu kamaning lungswi ninado njoikatu tiitang karam kaang kiteito gonyii- hang kangkii tiisii njalosii, nyii Bangpii Jisu Krista zei kito Inii gonyii dato khang leile.

¹¹Kadaponii gukangsanamei, gonyii kak kito n-girazyii patlei lesii Kloi ki kalungmeinii gudakii tamle.

¹²Inii tam kaleinii kadapokii, gonyii mei hangni hangninanii: “Inii Pol mahle,” mak-kii “Inii apolo mahle,” mak-kii “Inii Kaifas mahle,” mak-kii “Inii Krista mahlesii” tamle,

¹³Kristago njai leipo? Gonyii jangpii Polgo Krosh gamkii gitakpo? Mak-kii gonyiigo Pol zei kito dwi mpum pyiipo?

¹⁴Krispas nei Gaiyasgo supiinii gonyiimei hangninii kagodo Inii dwi mpumpyii kasu jangpii Inii Saraago hakalang tamle.

¹⁵Teipiinii gonyii guboumei tiitang karam jangpii dwi mpum wotakle katu mei kaniido tam wolakle.

¹⁶(Sateichii Inii Stifanas ki kalungmei godo dwi mpumpyii takle, teidoito kisii mei kaki hangninii kagodo Inii dwi mpum mpumpyii makpo katu I-tidousu takle.)

¹⁷Kadapokii dwi mpum matutang karam jangpii Kristanii n-gu lang m-mang makle, nlenii Krista mah krosh tei kadaklak tang karam jangpii sazyii pouryiimei mah samlat kati mah swirek kabi tei haisupiinii, kabi rasam tei tam ralipyii matu tang karam jangpii lang m-mangpyiile.

¹⁸Kadapokii Kristanii Krosh gamto kataimah samtam ai magasii kaleimei jangpiinii kamangle, nlenii keikapyii doukalu nyii jangpiinii teitei Saraa mah teimaham teile.

¹⁹Kadapokii aitiisii ryiibamle: “Inii kasakaimei mah swirek kabi tei tiimaga tangle sateichii kasakaimei mah maning kati kasakai tei Inii poitoi aitangle.”

²⁰Kasakaimei kadaki leipo? Ajai- tingshang kati ojamei kadaki leipo? Aiha kito sam kajyiikati mei kadaki leipo? sazyii pouryii meimah swirek kabi gotei Saraanii tii m-mang aitak makpo?

²¹Kadaponii Saraanii mpoumah swirek kabi kito, sazyii pouryiimeinii ahnyiimah swirek kabi teiroinapii mpougo timatu sutakle. Nlenii nyiinii tam ralikapyii kapang kamang mah samtam teipii malum kalumei hang go keipyii tangle katupii Saraanii satto takle.

²²Kadapokii Jehudi- meinii siiti tiikamangou khangle sateichii Grikmeinii swirek kabigo fiile,

²³Nlenii Jehudimei jangpiinii pi kapaswi kuitu sateichii lui kakimei jangpiinii kapang kamang tiisii kalei, krosh gamkii dhangsii gikalei Krista mah kaang kito nyiinii tam ralipyiile.

²⁴Nlenii latkalu Jehudimei jangpii sateichii Grikmei jangpii- niido Krista ai Saraamah teimaham sateichii Saraamah swirek kabi teile.

²⁵Kadaponii Saraamah kapang kamang teinii meinah sung kisii sakaile; sateichii Saraamah kasui teinii meinah sung kisii teile.

²⁶Kadaponii kangsanamei, go- nyiigo lat kapyii tei maning gonglo, katunii, apumzai taiswisii kasakai- mei moimakle, katei kakhangmei moimakle, kadi kathangmei moi- makle;

²⁷Nlenii kasakai meigo tii-nrou tang karam jangpii sazyii pouryiito kapang kamangmei gotei Saraanii kalai wotakle; sateichii kateimeigo tii-nrou tang karam jangpii, sazyii pouryiimah kasuimei gotei Saraanii kalai wotakle;

²⁸Sateichii sazyii pouryiito rou katiilesii kaleihang gotei samah kado kasu tiimatu tang karam jangpii sazyii pouryiimah kasana ka-nkang meinii maning kamala gotei sateichii sazyii pouryiito kaga mahlyii hang gotei Saraanii kalai wotakle.

²⁹Kadapokii sazyii pouryiimei mei- kaniido Saraa doito detdi lak tang karamle.

³⁰Nlenii Saraanii gonyiigo Krista Jisu dakii poi njapyii takle, sateichii Saraanii nyiijangpii Krista aigo nyiimah swirek kabi tiipyii takle, mpou paikito nyiihang go Saraa doito tiimadi pyiitakle; nyiinii Saraa mah kamateimei tiitakle sateichii matapii laat mpatpyii takle.

³¹Teijangpiinii aitiisii ryiikabam takumpii: “Detdi kanyiimei hang teinii, Bangpii kaang kito detdi matulo.”