Read Maram Naga 1 KORENMEI 4 Bible Online

1 KORENMEI 4 - Maram Naga bible

1 KORENMEI 4

¹Aitiisii meinii nyiigo Krista ki kaleimei takumpii sateichii Saraa mah kasang kamakumsam mah mahbam kajumei takumpii maning matulo.

²Tei phyiiryiito kisii kakashangmei tiitang karam jangpii ahnyii ai malum kabuimei tiitang karamle.

³Nlenii gonyiinii mak-kii meinah mah ajaitingshang piinii n-gu samtak tiitang karam tei gudatonii hangkasii mah kacheng hangniniile. Nle, Inii gu roinapiiniido n-gu samtak tiimakle.

⁴Kadapokii I gumah kama samah kado timakle, nlenii aipii I-kama ga kasang takle katumah makle; nlenii guphyiiryiikii samtak katii teinii Bangpii teile.

⁵Teijang- piinii Bangpii gong kasuta, tinglang kasunakii meigo kado samtak tiisulo; aitoi kamyii kikii kabai kabam mah hangtei mpounii kava kikii poi mpat tangle, sateichii lungswi mah tiitang karam kamaning hangtei mangou tangle. Sateichii tei tinglang kak meihangnii Saraa dato mpou mpoumah dou kamajyii tam kamatoi tei doutangle.

⁶Sateichii kangsanamei, gonyii mei kaniido mei hangninii jangpii kaki hangninii phyiiryiikii mazhii kasu tiisii detdilak tang karam jangpii, ryii kabam tei maju leimakle katu ai nyii gamto gonyiinii raliwo kabui jangpii, gonyii jangpii Inii gu gamkii sateichii Apollos gamkii nda tiileile.

⁷Tanii n-go mei kakimei doito taamsii tiipyiipo? Nangnii doukalu mahlyiihang tei Saraanii n-go pyiimakpo? Bitakle, teitii leponii, nangnii doukalu hangtei luha kasu takumpiinii nangnii kada takumpii detdiwo tangpo?

⁸Aitoinii gonyii moi maghii takle! Aitoinii gonyii mah nitakle! Nyii haisupii gonyiinii sagong tiisii lung leitakle! Nlenii, nyiido gonyiigo kaswisii sagong tiisii leitang karam jangpii, gonyiinii sagong tiisii kama- gong tei nyiinii mareile.

⁹Kadapokii madupii doito taitang karam mei takumpii, Saraanii nyii tiilamlwi kapyiimeigo bam tei pyiitaklesii Inii maningle, kadapokii sazyii pouryii doito, sating gam luihang doito sateichii meinah doito nyii ai hang mah mik hoi kapungmei tiitakle.

¹⁰Nyiinii Krista jangpii kamang meile, nlenii gonyiinii Krista dato kasakai meile; nyiinii kasuile, nlenii gonyiinii kateimeile; gonyiinii tam kamatoi doule, nlenii nyiinii ju kashyii tei doule.

¹¹Aitoi katangdo nyiinii moimazyii sii, saryiisii, peikot peimani kaisii, datsii ki gasii luki luki tatsii bamle,

¹²sateichii nyiinii nyii bahpiinii nlaisii tha teisii tiisii bamle. Nyiigo kasheeng kak, nyiinii satoi pyiile; nyiigo kalak kathei kak, nyiinii lehle;

¹³nyiigo tam kamashyii kak, nyiinii samlat kabipii khekalat pyiile, aitoinii nyii ai sazyii pouryii mah pot mah kahong takumpii, mahlyiihang doito matei kasumei takum takle.

¹⁴Inii gonyiigo tii-nrou tang karam jangpii ai ai ryiimakle, nlenii Inii lungkasyii gunah meigo takumpii gonyiigo tam rali tang karam jangpiiniile.

¹⁵Kadapokii gonyiimah Kristen tiilung kito gonyiigo majang kapyiimei tang kearii lei kido, gonyiinii Pfii hangkii bam makle; kadaponii Jisu Krista lamto kabi rasam paikito Inii gonyii Pfii tiiwo takle.

¹⁶Teijangpii Inii gonyiigo khangleile, gonyiinii gumah jairali taiswilo.

¹⁷Teijangpii Bangpii zei kito gumah lungkasyii ninado katam kaswi gunah sapfii mpou Timothigo gonyii dakii Inii lang magong leile. Bamlyiihang kito, Charsh hang kito, Inii ralikapyii takumpii, Jisu Krista dato kalei gumah jaitingshang hang tei mpounii gonyiigo tam maningloi pyiitangle.

¹⁸Inii gonyiida gonglakle katupii kangkanii detdi sii bamle.

¹⁹Nlenii Bangpiinii mazhiipyii leponii Inii gonyiida kalangsii gongtangle; satei- chii ai det kadimei mah sam teisupiinii ahnyii mah teimaham tei Inii fii-mpat tangle.

²⁰Kadapokii Saraa mah sating sazyii teinii sam katam kamalhii tei makle, nlenii teimaham teile.

²¹Inii gonyiida ting- rang haisii gonglopo, mak-kii kasana karasok rangii mah lungkasyiipanii gonglopo? Gonyiinii kadapei mareipo?