Read Maram Naga 1 KORENMEI 8 Bible Online

1 KORENMEI 8 - Maram Naga bible

1 KORENMEI 8

¹Aitoinii tingtugo pyiitoi kalei chiitak mah kaang kito; “Nyii- hang ai swirek kati leile,” katu nyiinii tile, “swirek kati” teipii det tiimatule, nlenii lungkasyii teipii tiimakhiile.

²Mei kata hangninanii swirek kati bamlesii maning leponii, ahnii tiikamajyii katang teido ahnii rei tiiwomakle.

³Nlenii mei kata hangninanii Saraago lungsyii leponii, ahgo mpounii titakle.

⁴Teijangpiinii tingtu dakii pyiitoi kalei chiitakgo kachii mah kaang kitonii, “Tingtuparam teinii kasang karing tei gale,” sateichii “hangninii tei roisupiinii Saraa kaki gale katu nyiinii tile.”

⁵Kadapokii sating gamto mak-kii sazyii pouryiito “sara” sii kalat hang tei lei kido ai kakum Saraa hangkii sateichii “bangpii” hangkii lei kido,

⁶nyiijangpiinii Saraa hangninii, katunii, Apfii tei leile; mpou dato mahlyii hang patle, sateichii nyiinii mpou jangpii ring leile, sateichii Bangpii hangninii katunii, Jisu Krista tei leile; mpou paikito mahlyiihangdo nyiihangdo ring leile.

⁷Nlenii swirek kati tei meihangnii bam makle, mei kangkanii tingtugo matasii lungkapi taiswisii, tingnei katangpii ahnyiinii tei kakum chiitak tei kachii kak, teitei tingtugo pyiitoi kalei chiitak takumpiinii ahnyiinii maningsii leile; ahnyiimah kabi kashyii tikabui mah lungswi kasui taiswisii chiitak teipii tiima- hong taklesii ahnyiinii maningle.

⁸Nlenii chiitak teinii nyiigo Saraa dakii chyiigong manangpyii makle, nyiinii chiimak kido kisii shyiibui tang makle, sateichii chii kido kisii bibwi tang makle.

⁹Nlenii gonyii mah arangra tiikabui ainii kamalum kasuimei jangpii, pi kapiiswi hangninii tiima- tulak tang karam jangpii sakailo.

¹⁰Kadapokii swirek katimei hang- ninanii, tingtu mah Saraa kamaning ki lungto chiitang karam bam gam tei bam kalei tei mei kata hangninanii ngouwo leponii, mpoumah kabi ka- shyii tikabui lungswi tei suileponii, tingtugo pyiitoi kalei chiitak ai chii matutang karam jangpii mpougo lung tiimaditu lakpo?

¹¹Kadapokii gomah swirek kati teipii Kristanii mpou tung tiisii tai kapyii, kamalum kasui gosanapii gotei tiimaga takle.

¹²Sateichii aitiisii gonyii kangsa- namei phyiiryiikii kem tiisii sateichii ahnyii mah kabi kashyii tikabui kasui lungswi gotei rajam matusii, gonyiinii Krista phyiiryiikii kem tiile.

¹³Teijangpiinii Chiitak teipii gosanapiigo kem tiimatusii lei le- ponii, gosanapiigo kem kikii tiikailak tang karam jangpii Inii nlailoisii kamyii tei chiisang chiiloi lakle.