Read Maram Naga 2 KORENMEI 12 Bible Online

2 KORENMEI 12 - Maram Naga bible

2 KORENMEI 12

¹Teiteipii kabi doutang karam samah kado gakido, Inii detdi tang karamle. Nlenii aitoinii Bangpiinii n-gu pyii kabam madhang kapyii sateichii mati mangou kapyii hangtei Inii tam tangle.

²Inii Kristenmei hangninii rasam tile, teitei tingkum keariisii madai nkhii doi mpougo sagoi kaki sating gam kitei pangkhiile. (Ai ai pumzai kito manii, mak-kii pumzai kito makpo, Inii timakle Saraanii tile.)

³Inii tamloi leile, mei aipou aigo sating gam pangkhii takle katu tei Inii tile. (Ai ai pumzai kito manii mak-kii pumzai kito makpo Inii timakle, Saraanii tile.) Sateichii sampiinii tampei kalak meinah malyii piinii tamlak tang karam mahlyii hang tei teito mpounii shiitakle.

⁵Teijang- piinii mei aipou tung tiisii Inii detdi tangle, nlenii gumah kasui hang jangpii supiinii gutung tiisanii Inii detdi lakle.

⁶Inii detdinyii leponii, I-ai swikagamei hangninii mitu lakle, dapochiinii kasang tei Inii tamsii leitangle. Nlenii Inii detdi lakle, kadapokii mei hangninii kaniido Inii katii ninado Inii katamtei mpounii ngoukalu taiswisii n-gu maning sagoiki matu katu tei Inii marei makle.

⁷Sateichii n-gu hangkii matima- ngou kapyii kito detdi maju matulak tang karam jangpii, gupum kikii atu hangninii toukaipyii takle, seitan mah sampao kapungmei hangninii, n-gu tiikamage tang karam jangpii, sateichii n-gu detdi maju matulak tang karam jangpii,

⁸ai kaang jangpii Inii Bangpiigo riita tumkiile, teitei gudato poitoi pyiilosii.

⁹Nlenii mpouniigudakii tamle, “Gumah jumage kapyii ai gojangpiinii tang kalak tiimakle, kadapokii gumah teimaham teipii kasui kiteito matwi mashangpyiile;” gumah kasui hang jangpii Inii kisii kisii ntasii detdi tangle, katunii Krista mah teimaham tei guphyiiryiito ntak matu tang karam jangpii.

¹⁰Krista jangpii Inii kasui hang kito, kalet kalou katii kito, kahung kanang kito, kaset kalak kapyii kito, sateichii kamage kalak kiteito Inii lung samoule, kadapokii Inii suisii kalei tinglang kak Inii teimaham tei leile.

¹¹Inii swikagamei hangninii takumpii tiisii leile, nlenii gonyiinii teitei n-gu tiirou kido tiimatule, kadaponii n-gu tam matoi tang karam sekle, kadapokii Inii samah kado mak kido, phyii kasat tiilamlwi kapyiimei hang doito Inii nkangsang nkang buimakle.

¹²Hangkapii lung leh kati teipiinii, I-ai kasang tiilamlwi kapyiimei hangniniile katu tiikamangou siiti hangtei, sung kaga hang teipii, kamadat hangteipii, sateichii mei tiikalak tha kadi hang teipii, gonyii hang kak kito tiimangou takle.

¹³Inii gupum sekpii gonyiigo sana tiiha matutang karam jangpii tiikamage kasu jangpii supiinii, charsh kaki kakimei hang doito kada takumpiinii gonyiigo jumasam makpo? Kama aijangpiinii n-gu magaseilo.

¹⁴Julo, hangtum kashang tiisii Inii gonyiida gongtang karam jangpii tiidabam takle, sateichii Inii gonyii jangpii kamaswi tei pyiilakle, kada- pokii Inii kamarei teinii gonyii gole, gonyiimah seh sanahgo makle; kadapokii pwi pfii jangpii nahmeinii poi nkom kajyii makle, nlenii nahmei jangpii pwi pfiinii poi nkom tang karamle.

¹⁵Gonyiigo tiiha tang karam jangpii Inii gumah kaleihang sateichii gupum katangpiinado nta ntasii mpatpyii tangle. Inii gonyiigo kisii kisii lungsyii katu jangpii gonyiinii n-gu nkangsii lungsyii tangpo?

¹⁶Teitii leponii Inii gonyiigo tiimaswi makle katu tei gonyiinii mazhiinyii tangle, nlenii Inii achem tiisii gonyiigo kachui teipii mphee kikii mai aitaklesii mei kangkanii tam tangle.

¹⁷Inii gonyii dakii lang kamagong sampao kapungmei kata hangninii mah paikito gonyii mah kabi tei Inii poiwo takpo?

¹⁸Inii Taitasgo tat tulosii khangle, sateichii mpougo kaswisii sanapii gotei Inii lang magongle, Taitasnii gonyii dato kabi tei poiwo takpo? Rangii hang- ninii kito nyiinii tat makpo? Pikang hangninii kito nyiinii tat njoimakpo?

¹⁹Nyiinii nyii roinapii nyiigo gonyii doito danglei lesii gonyiinii maningsii leipo? Teimakle! Saraa doito Kristanii nyiigo tam matu tang karam takumpii nyiinii tam leile. Sateichii lungkasyiimei hang, nyiinii tiikalei hangtei gonyiinii tiimakhiiha tang karam jangpii tiibam takle.

²⁰Kadapokii Inii kagong tinglang kak, Inii kamarei takumpii gonyiigo Inii doukasu, sateichii gonyiinii kamarei takumpii gonyiinii n-gu doukasu malahle; n-girazyii kapat, kangourou katu, kararhii katu, mpou mpou jangpiinii kamaning, kalet kalou katii, samchet sampei katu, detkadi ninado matou kasu tei Inii ngoutang maniisii hingle.

²¹Inii nlaikai gong katu tinglang kak, gu Saraanii gonyii doito n-gu tii-nrou- pyii loisii, asung kareiki kem tiisii ahnyiinii tiikabam, matei kasu, kashyii kahong tha katii sateichii sapwimei sapfiimei kashyii kahong tha katii kito lungkali kasu ahnyiihang jangpii Inii lung magesii hat tang karam tei Inii hingle.