Read Maram Naga 2 KORENMEI 2 Bible Online

2 KORENMEI 2 - Maram Naga bible

2 KORENMEI 2

¹Kadapokii Inii gong gonyiigo swi tiimashyii tang karam jangpii gonyiida gongloilak taklesii gulung sat totakle.

²Kadaponii Inii gonyiigo lung tiikamage leponii, Inii lung tiikamage katu ah tei supiinii tanii n-gu tii-ntapyii tangpo?

³Teijangpii chiti tei Inii gonyii dakii ryiile...katunii, Inii gonyiida gongsii n-gu tii ntapyii tang karam mei gotei lung tiikamage roule. Kadapokii Inii ka-nta tinglang sek-kii gonyii hangdo ntale katu Inii malumle.

⁴Inii chiti tei karyii tinglang kak, Inii hang- kapii swi shyiisii lung kamagesii ninado hatsii leile; gonyiigo lung tiikamage tang karam jangpii makle, nlenii Inii gonyii hang go kada- ziikapii lungsyiipo katu tei timatu tang karam jangpiiniile.

⁵Nlenii mei kata hangninanii mei kangkago lung tiikamage leponii, teitei ahnii gudakii tiimakle, nlenii gonyii hang dakii tiibam takle; mak-kii meihang dakii sukido, gonyii mei kangkii dakiinii tiibam takle. Inii ai tamle, kadapokii teitha ka- tiipii ah phyiiryiikii Inii teimahung roule.

⁶Kadapokii tei kakum tha katiimei phyiiryii teikii aitiisii gonyii mei kamoilamnii dwisii karat tei buitakle.

⁷Teijangpii ahnii lung kamage katu teipiinii beidijusii matum madum rat toi malei kasu tiisii, gonyiinii ahgo kama kalei pyiisii ahgo lung tiimadi tang karamle.

⁸Teijangpii gonyiinii ahgo nlailoisii madupii lungsyiisei matu tang karam jangpii Inii gonyii dato khang leile.

⁹Kadapokii gonyiinii mahlyiihang kito katam kaswi swikasu gonyii mah kasang tei Inii titang karam jangpii chiti tei Inii gonyii dakii ryiile.

¹⁰Gonyiinii kata hangniniigo kama kaleikapyii tei, Iniido ahgo kaleipyii takle. Inii mah kata hangninii kaleipyii leponii, Inii kaleikapyii tei, Krista doito gonyii jangpii kaleipyii takle.

¹¹Sara kashyiinii nyii phyiiryiito teimaham gamatu tang karam jangpii Inii ai ai tiile; kadapokii ahmah chem tei nyiinii tile.

¹²Krista mah kabi rasamtei tang ralipyii tam karam jangpii Inii Trosh ki kagong kak, teikito tha tiitang karam jangpii Bangpiinii pwidi laatpyii kabamtei Inii doutakle.

¹³Nlenii Inii hangkasii lungnaang takle, kadaponii nyii sanapii Taitasgo Inii ngousu takle. Teijangpii Inii ahnyii dato tat n-nou aisii Mesidoniya ki tatjoutu takle.

¹⁴Nlenii Saraago halangle! Kada- pokii Kristago kaswisii hangninii tiisii nja kalu kito Kristamah saryii ngam kalu mah pareng beekatu kitei maringpouchyiimei takumpii nyiigo Saraanii pangsang pangtat pyiile. Kristamah swirek kabi tei manam kabi keirum takumpiinii bamlyii hang kikii jai nha tang karam jangpii Saraanii nyiigo poisii tha tiipyiile.

¹⁵Kadapokii keikapyii doutang karam pwidi kito kaleimei ninado taitang karam pwidi kito kalei mei kak kito nyiinii Kristanii Saraago kat kalei manam kabi tiiroutou kai takumle.

¹⁶Kadapokii maga kaleimei jangpiinii, ai ai gisii kalei manam kashyii katai kai teile; nlenii keikapyii doukalu ahnyii jangpiinii, ai ai karing poigong kapyii manam kabi keirum teile. Teitiileponii, tei kakum tha tiitang karam jangpii tanii tiimajyiipo?

¹⁷Kadapokii nyiinii mei kaki kakimeinii Saraamah kabi rasam gotei mai kamala pot takum- piinii jum kalei takum makle; nlenii Saraanii nyiigo langkai kapyii jangpii, Kristamah ki kaleimei nsang nsang tiisii mpou doito lung kamatei teipii nyiinii tamle.