Read Maram Naga 2 KORENMEI 7 Bible Online

2 KORENMEI 7 - Maram Naga bible

2 KORENMEI 7

¹Lungkasyii gukanghemei, riishii aihang ai nyii dakii pyii kabam taiswisii, nyiinii nyii roinapii nyii pum ninado nyii rangiigo tiihangsii kalei matum madum kito tiimatei aisii, Saraago dzyiirousii kahing kito nyii mah kamatei tei mashang matwileje.

²Nyii dakii gonyii lungtei laatpyiilo; meigo kado nyiinii tiimah makle, nyiinii meigo kado tiimage makle, nyiinii mei kata hangninii datodo liipat doutang karam jangpii tiimakle.

³Gonyiigo tam mashyii tang karam jangpii Inii ai ai tam makle; kadapokii Inii reipii tam takle katunii, gonyiinii kaswisii taitang karam sateichii kaswisii ringtang karam tei nyii lung kito bamle.

⁴Gonyii dakii kamalum tei Inii bamle, gonyii jangpii Inii detkadi hangkapii leile, Inii kasamoupiinii tokryiile, nyiimah kamage kalak hangtei njasii Inii nta beidi takle.

⁵Nyiinii Mesidoniya ki gong katutai katangpii, bamlyii kiteito kamage kalak teipii, sateichii nyii lung kito kahing teipii, nyiinii ka- ntak tei hangninii kado doumakle.

⁶Nlenii lung kamage kaleimeigo lung tii-ntapyiisii kalei Saraa teinii, Taitasnii nyiida kagong teipiinii nyiigo tiisamou pyiile,

⁷sateichii mpounii nyiida kagong teipii roinii nyiigo tii-ntapyii makle, nlenii gonyiinii mpougo kada takumpiinii tii-ntapyiipo katu mpoumah tam kapyii samtam teiniidole. Mpounii nyii dakii gonyiinii mangwisii kalei, gonyiinii madak kalei, gujangpii gonyiinii swi lung kapyii tei tampyii takle, teijangpii Inii kisii ntale.

⁸Kadapokii Inii gumah chiti teipii gonyiigo lung tiikamage kado, Inii teitei kamanga gale. Kadapokii chiti teinii gonyiigo shangniikii jangpii roinii kado, gonyii lung tiikamage aitakle katu tei Inii ngoule.

⁹Toinii Inii gonyiigo lung tiikamage katu jangpii supiinii, gonyiimah lung ka- mage katu teipiinii gonyii lung tiikali kalu jangpii Inii ntale; gonyiigo lung tiikamage katu tei Saraanii tha tii- pyii takle, teijangpii nyiinii gonyiigo samah kado tiimashyii makle.

¹⁰Kadapokii Saraa dato lungswi kamage katu teipii lungkali katu mah riiti tei mati matusii keikapyii kasaga tiilung nitei pang gongpyiile sateichii kamanga tei pung gong makle, nlenii sazyii pouryiimah lungswi kamage katu teipii katai tei pat matule.

¹¹Gonyiimah lungswi kamage katu tei gonyii jangpii Saraanii kamarei teile, sateichii julo, gonyii mah lungswi kamage katu teipii gonyii jangpii kadapei tiipyii takpo! Teiteipiinii gonyiigo tha tii- matu kanyii sateichii gonyii ai tiima makle katu tei maning kariirhii katu gasii tiimangou takle, pat kalei phyiiryii teikii gonyiinii rarhiile sateichii nlailoisii patloi tang karam gotei gonyiinii hingle. Teipii gonyiinii n-gu kamangwi, gonyiinii n-gu dangpyii kanyii, sateichii tiikama mei gotei dwisii rat kanyii tei teiteipii mpatpyii takle. Aihang mah tha ki aito pat kalei hangtei gonyiinii makle katu tei gonyiinii mangoupyii takle.

¹²Teipiinii Inii gonyii dakii ryii aikido, kama tiikaleipii jangpii makle mak-kii tiikama kito kaleipii jangpii makle, nlenii nyii jangpii gonyiinii hungsii lung kaliit tei Saraa doito gonyii dakii mati mangou tang karam jangpii teitei Inii ryiile.

¹³Teijangpii nyiinii lungswi samou takle sateichii nyiimah kasamou phyiiryiito Taitasmah ka-nta jangtei- pii nyiinii kisii nta takle, kadapokii gonyii hangnii mpoumah lungswigo ntak matu takle.

¹⁴Kadapokii Inii gonyii mah kaang kito detkadi samtei mpou dakii tam leponii, Inii ka-nrou tei doumakle, nlenii nyiinii gonyii dakii katam hangtei kasang katu takumpiinii, Taitas doito nyiimah detkadi teido kasangle katu tei doutakle.

¹⁵Gonyiihangnii mpoumah katam karali hang gotei kadaziikapii swinyiisii leipo katu sateichii gonyii- nii kahing ninado nchyiikok kok katu teipiinii mpougo kada takumpii lukaiwopo katu tei mpounii maning gongsii, gonyii jangpiinii mpoumah lungkasyii tei teibui teibuisii leile.

¹⁶Inii ntale, kadaponii tiigatpiinii maning kamalum tei Inii gonyii dato leile.