Read Maram Naga GALATIMEI 1 Bible Online

GALATIMEI 1 - Maram Naga bible

GALATIMEI 1

¹Meinah dato kasu, meinah mah paikitodo kasu, nlenii Jisu Krista sateichii mpougo katai kito tiimaring kapyii Pfii Saraamah paikito Tiilamlwi kapyiimei hangninii tiisii kalei Polnii,

²sateichii n-gu kaswisii kalei kangsanamei hang dato Galati kito kalei Charsh hang dakii:

³Nyii Pfii Saraa ninado Bangpii Jisu Krista dato jumage kapyii ninado kamajung tei gonyii dato leimatulo.

⁴Nyii Pfii ninado nyii Saraamah kamaning kamarei taiswisii tingnei- shang kashyii kahong sazyii pouryii ki aito nyiigo keipyii tang karam jang- pii, mpou pum sektei nyii kem jang- piinii pyiitakle.

⁵Pfii Saraa dakii kalui tiisupii pumtei kava tei matulo, Amen.

⁶Kristamah jumage kapyii kito gonyiigo lat kapyii Mpougo hangkapii kalangsii toi aisii, kathaam kaki kabi rasam hangniniigo gonyiinii lukai kalu kito Inii sung gale.

⁷Kataam kaki kabi rasam leile katu mah makle, nlenii Inii ai ai tam leile, katunii gonyiigo lung tiikamatai ninado Kristamah kabi rasam ai tiikali tang karam jangpii tiikaleimei leile.

⁸Nlenii nyiichiido mak-kii sating gamto kahum sating gamlui- niichiido, nyiinii gonyiigo tam ralikapyii tei supiinii kabi rasam tei malatpii tam ralipyii leponii, ahnii sheengkapyii riishii tei doumatulo.

⁹Nyiinii ainu tam kabam takumpii, Inii aitoi nlailoisii tam leile, gonyiinii doukalu kabi rasam teisupii, mei kata hangninanii malatpii tam ralipyii leponii, ahnii sheengkapyii riishii tei doumatulo.

¹⁰Meinah mah kamazhii doutang karam mak-kii Saraa mah kamazhii doutang karam jangpii Inii fiileipo? Mak-kii Inii mei dzyiibi tiitang karam jangpiinii tiisii leipo? Inii aitoi katang mei dzyiibi tiitang karam jangpiinii tiisii leipo? Inii aitoi katang mei dzyiibi tiisii leileponii, Inii Krista mah kikaleimei hangninii tiilak tang karamle.

¹¹Kangsanamei, Inii gonyiigo mati leile, katunii Inii gonyiigo tam ralikapyii kabi rasam teinii meinah mah makle,

¹²kadapokii teitei Inii meinah dato doudo doumakle, mei hangninii kaniido teitei n-gu ralipyii makle, Jisu Krista sekpiinii teitei n-gu mati mangoupyiile.

¹³Jehudimei mah kanat kito Inii lungliitsii lungkalei tinglang kak, Inii kada takumpii lungsii Saraamah meihang go lungset gasang gasii kada takumpii Inii ahnyiigo kaset kalak pyiipo sateichii ahnyiigo tiimaga tang karam jangpii kada takumpii Inii gumah tiiki kalakpii tiisanii leipo katu tei gonyii dakii tam mangou takle.

¹⁴Inii Jehudimei mah kanat taiswisii tiisii kalei kito gumah tingkum masam katu n-gu njoi katu Jehudimei gu hemei daziikiidoi reisii leile sateichii nyiipei nyiipaomei mah tingshang rali hang gotei Inii kisii lungliitle.

¹⁵Nlenii n-gu lung kasunato Saraanii mpou mah jumage kapyii kito n-gu kalai wotakle sateichii mpou nga ngalosii latto takle;

¹⁶sa- teichii Inii luikakimei hang dakii mpoumah kaang kito kabi rasam tam ralipyii tang karam jangpii, mpounii mpounah sapfii mpou gotei gudakii mati mangou tang taklesii satto sek- kii, Inii pum ninado zaigo kaswisii rashii makle,

¹⁷gu doito Tiilamlwi kapyiimei tha tiisii kaleimeinii kalei Jerosalem kido Inii maa makle, nlenii manoisekkii Inii Arabiya ki maale, teito Inii Damaskas ki nlaigongle.

¹⁸Sateichii tingkum hangtumtai, Kaifas go kadoutang karam jangpii Inii Jerosalem ki tat pile, teito Inii mpougo kaswisii leimik keariisii mangii nkhii bamle.

¹⁹Nlenii Bangpii sanapii Jems tei supiinii tiilamlwi kapyiimei kaki hangninii kagodo Inii ngoumakle.

²⁰Inii gonyii dakii ryiikalei ai kasangle, I chuimakle katu Saraanii tile!

²¹Teito Sairiya ninado Silisiya mah sazyii longkuihang kitei Inii gong takle.

²²Sateichii Krista dato kalei Judiya mah Charsh hangteinii n-gu ju timakle;

²³“Nlenii tinglang kareiki nyiigo kaset kalak pyiisii kalei mpou teinii tinglang kareiki tiimaga aitanglesii tiisii kalei kamalum tei aitoinii mpou sekpiinii tam ralipyiisii lei takle” katu katam tei roinii ahnyiinii shiile.

²⁴Sateichii ahnyiinii gu jangpii Saraago tam matoile.