Read Maram Naga IPISAMEI 5 Bible Online

IPISAMEI 5 - Maram Naga bible

IPISAMEI 5

¹Gonyii ai Saraamah lungkasyii nahmei katu taiswisii, gonyiinii mpougo njoitang karam tei tiitang karamle.

²Sateichii Kristanii nyiigo lungsyii pyiisanii, nyii jangpii mpou- mah pumsekpii pyiitoi tang karam manam kabi pot hangninii tiisii, Saraa dakii karat kapyii takumpii gonyiinii lungkasyii kito tatpyiilo.

³Gonyii ai Saraago kamalum mei katu taiswisii, sapwimei sapfiimei mah kashyii kahong tha katii, mak-kii matei kasu, mak-kii lukanyii mah samlat katangdo tamlak tang karamle.

⁴Gonyii kak kito tamjyii kasu katham karaam sam, kapang kamang sam, mak-kii dok tiikasu sam tei gasii, teitungpii gonyiinii Saraago hakalang tei pyii matulo.

⁵Gonyiinii ai tigat tolo, katunii kashyii kahong tha katiimei, matei kasu, mak-kii lukanyii... (kadapokii lukanyii ai tingtugo kariita hang- niniile) mei teinii Saraamah ninado Kristamah sagong sazyii kiteito njai dousang doulakle.

⁶Kapang kamang sam hangteipii gonyiigo meikaniido chuisii tamsii hem maluwo sulo; kadapokii katam swikasumei hang phyiiryii Saraa mah rakarhii gongliit tang karam teinii ai kakum hang jangpii sekle.

⁷Teijangpii gonyiinii ahnyiigo nja sulo.

⁸Kadapokii tinglang kareiki gonyiinii kamyii kito leile; nlenii aitoinii Bangpii zei kito gonyiinii kava kito leitakle, teijangpiinii kavamah nahmei takumpii tatlo.

⁹Kadapokii kavamah riiti teinii kabi, kasang ninado kamajyii hang kito doule.

¹⁰Sateichii Saraanii kadapei mareipo katu tei tikabui tiilo.

¹¹Sateichii riiti mati kasu kamyii- mah tha hang kiteito njai poihai sulo, nlenii teitungpii kama tei laat mpat matulo.

¹²Kadapokii ahnyiinii makumpii tiikalei tha hangtei tam mpat tang karam katangpiinado nroule.

¹³Nlenii tam mpat katu hangtei kavapii tam mpat matule, kadaponii tam mpat katu tha hangtei kavale.

¹⁴Teijangpii aitiisii tamle, “Gungkhii wolo; O, ziitsii kalei nang, sateichii katai kiteito ringkhii wolo, sateichii Kristanii go phyiiryiito vapyii tangle.”

¹⁵Teipiinii gonyiinii lungkalei tiilung tei machyiigat wolo, kapang kamangmei takumpiinii lung sulo; nlenii kasakaimei takumpiinii lunglo.

¹⁶Gonyiinii kadou tinglang kabi hangtei kabi tha tiisii jum matou wolo. Kadapokii tinglang ai bimakle.

¹⁷Teijangpii gonyiinii kapangmei tiisulo, nlenii Bangpiimah kamaning kamarei tei kadapeipo katu tilo.

¹⁸Gonyiinii tiimagasii kalei, jou tei sak panhii sulo, nlenii rangiipii tokryiilo,

¹⁹hangninanii hangniniigo tam kamatoi lhii hang teipii, lhii teipii, sateichii rangiimah lhii hang teipii kake kalatlo, sateichii gonyii lungto tam kamatoi teipii njasii Bangpii dakii lhii tei tiilo.

²⁰Nyii Bangpii Jisu Krista zei kito Pfii Sa- raago mahlyii hang jangpii tinglang kaleita hakalang tei pyiilo.

²¹Kristago dzyii ka-nrou kito gonyii hangninanii hangninii kang nkanglo.

²²Noumei Bangpii kang ka-nkang takumpiinii, gonyiinii gonyii naamei kang nkanglo.

²³Kadapokii Kristanii Charsh phyiiryii kasat takumpii naameinii noumei phyiiryii satle, sateichii Kristanii mpou pum Char- shgo keikapyiipii teile.

²⁴Charshnii Krista kang ka-nkang takumpii, noumeiniido mahlyii hang kito ahnyii naamei kang nkang matulo.

²⁵Kristanii Charshgo lungkasyii ninado mpoupei jangpii mpoumah karing tiilung kapyii takumpiinii, naamei, gonyii noumeigo gonyiinii lungsyiilo.

²⁶Dwi kito shyiisii tii- matei kalei tai charshgo Saraa dakii pyiitoi tang karam jangpii, mpounii ai ai tiile.

²⁷Katunii, mahlyii hang kito mpoumah ngoukabi...kamatei ninado kama kaga, sajek kaga mak-kii ndouliit liit katu, mak-kii kaki kaki bimasang kasu tei gasii mpouda sek-kii pyii matu tang karam jangpiile.

²⁸Ahnyiinii ahnyii pumgo lungkasyii takumpii, sapfii- meinii ahnyii noumeigo lungsyii tang karamle. Mpou nougo lungkasyii sapfii mpou teinii mpou roinapii mpougo lungsyiile.

²⁹Kadapokii meikaniido mpou pumgo ngou karou gale, nlenii chiitak gwisii jumatou leile. Kristaniido tei takumpii tiipyiile.

³⁰Kadaponii nyii ai mpou pum mah njai nsang nsang teile.

³¹“Kaang aijangpii sapfiimei hang- ninanii mpou pwi mpou pfiigo toi aisii mpou nougo kaswisii kang hangninii tiitangle, sateichii hangna tei pum hangninii mitangle.”

³²Samkang hang ai Krista ninado Charshgo tam leile katu Inii kati, kasang kamakum kathok samtei kabi rasam aiki aito mati mangoupyii takle.

³³Nlenii samkang hang ai gonyii godo tam leile: Mpou roinapii mpougo lungkasyii takumpii naamei hangnii mpou mpou noumeigo lung- syii tang karamle; sateichii noumei hangnii mpou mpoupei mah naameigo sadzyii ngariit tiitang karamle.