Read Maram Naga KOLOSIMEI 3 Bible Online

KOLOSIMEI 3 - Maram Naga bible

KOLOSIMEI 3

¹Gonyiinii Kristago kaswisii ring- khii takle, Kristanii mpoumah sagongmah bam kito Saraamah bah ajiilamto bamsii kalei, sagoi gamto kalei mah pot hang gotei fiilo.

²Sagoi gamto kalei mah pot hang kiteikii gonyii lungswi tei keilo, sazyii pouryii aikito kalei mah pot hang kiteikii kaisulo.

³Kadapokii gonyiinii taitakle, sateichii Kristago kaswisii gonyiimah karing tei Saraa dakii kabaibamle.

⁴Gonyiimah kasang karing tei Kristale, sateichii mpounii kagongki gonyiiniido mpougo ka- swisii gongsii mpoumah pumtei kava tei njaitangle.

⁵Teijangpii gonyii lungto sazyii pouryiimah kamaning kamarei tha tiisii kalei, katunii, sapwimei sapfiimei kashyii kahong tha katii, matei kasu, matei kasu marai majang katii, kashyii go kamarai sateichii lukanyii (ai tingtugo kamaning mahjai hangniniile) gotei tiitat ailo.

⁶Ai kakum jangpiinii katam swikasu meihang phyiiryiitei Saraamah ra- karhii gongle.

⁷Gonyiinii tha aihang kito lungkalei kak, gonyiido teikito tinglang hangniniiki tatdo tatsii leile.

⁸Nlenii aitoinii rakarhii, raikapat, kamaimhii kalet kalou katii sateichii gonyiimwi kito tamjyii kasu katam kamalhii hang ai matou ailo.

⁹Hangninanii hangninii dakii chui- sulo, kadapokii gonyiinii mei kaham gotei, ahmah jairali hangtei njasii poitoi aitakle.

¹⁰Sateichii teigo tiikapyii mah khii njoi taiswisii swikati kito tiiranu tiisatei kabam, mei kasatai gotei nat kai kalei takum kai wotakle.

¹¹Kasatai mei aikito, Grikmei ninado Jehudimei, tiigyii malem kaleimei ninado tiigyii malem kasumei, dikhiikasumei, meijai tika- sumei, kabangmei ninado Abangmei katu gale, nlenii Kristanii mahlyii hangle, sateichii mahlyiihang kito leile.

¹²Teijangpiinii Saraamah kalei kalu kamatei ninado lungkasyiimei hang takumpiinii, lungset kati, lung- kasyii, lung kasana, lung kamanoi lung leh kati, tei gonyiinii nat kaikalei takumpii kai wolo.

¹³Hangninanii hangniniigo lung leh kati tiisii, mei kata hangninanii mei kata hangninii phyiiryiikii samou kasu leileponii, hangninanii hangni- niigo magapyiilo; Abangpiinii gonyiigo magakapyii takumpii gonyiiniido magapyii tang karamle.

¹⁴Sateichii aihang phyiiryiikii sajek gasii mahlyiihang go jum njapyiisii kalei lungkasyii tei nat kaikalei takumpii kai wolo.

¹⁵Sateichii Kristamah kamajung teipii gonyii hang lung kito apum tiimatulo; gonyiigo teijangpii apum hangninii tiisii latdo latpyii takle; sateikii gonyiinii hakalangdo tamlo.

¹⁶Kristamah samtam tei gonyii lung kito moisii leimatulo, swirek kabi hang kito hangninanii hangniniigo ralipyiilo sateichii dwisii tiimajyii tiimatui pyiilo, sateichii Saraago tam kamatoi lhii, Saraago kamata lhii ninado rangii lhii hang- teipii gonyiihang lung kito Saraago hakalang katam teipii lhii tei tiilo.

¹⁷Sateichii gonyiinii katalyii hang katii kito, samtam kito, mak-kii katii kapung kito pfii Saraa Jisu paito hakalang tamsii, Bangpii Jisu zeikito mahlyiihang tei tiilo.

¹⁸Noumei, gonyii naamei kang nkanglo, dapokii Kristenmei tiisii teitei nangnii tiitang karamle.

¹⁹Naamei, Gonyii noumeigo lung- syiilo, sateichii ahnyii phyiiryiito kakaa tei tiisei sulo.

²⁰Nahmei, mahlyii hang kito gonyii pwi gonyii pfiinii katam swilo, dapokii teitei Saraa djyii karanga teile.

²¹Apfiimei, Gonyii nahmeinii lung katai tei patlak tang karam jangpii, ahnyiinii rarhii kabui tiisii ahnyiigo n-gisulo.

²²Kabangmei, meigo lung kashat tha katiimei takumpiinii mikmah nga kanga tei tiisupii, lungswi kangkii tiisii, Abangpiigo hingsii thalyiihang kito gonyiimah sazyii pouryiimah apum tiisii kaleimei mah katam tei swilo.

²³Gonyiinii katii hangtei meijangpii tiisupii Saraa jangpii tiikapyii takumpiinii gonyii lung ntasii tiilo.

²⁴Sateichii mpoumah mei jangpii mpounii kaidek kabam tei Abangpiinii gonyiigo alangh hang- ninii tiisii pyiitangle katu tei ma- ninglo. Kadapokii Krista tei nangnii nga ngakalei kasang apumpii teile.

²⁵Sateichii tiima kaleimei hang gotei mpou mpounii tiima kabam hang jangpii powtei ruitangle, dapokii kaku ka-nraang gasii mei hang go Saraanii samtak tiile.