Read Maram Naga 1 THESOLONIKAMEI 3 Bible Online

1 THESOLONIKAMEI 3 - Maram Naga bible

1 THESOLONIKAMEI 3

¹Teijangpii nyiinii kisii lehpeilak takle sek-kii, Athens ki ai I-roinapii kalei bitaklesii nyiinii maning takle;

²sateichii kamage kalak ainii mei kata hangninii godo tii nlai matu kasu tiisii, gonyiimah kamalum mah kaang kito tiisangting pyii matu katu sateichii gonyiigo tiiha matu tang karam jangpii nyii kangsanapii sateichii Kristamah kabi rasam katam kito Saraa tha tiisii kalei Timothigo lang magong leile;

³kadapokii kamage kalak hang aipiinii gonyii meikagodo tii nlai matulak tang karam jangpii; tei kakum kamage kalak hang tei nyii jangpii Saraanii kamaning kama- reimah njai hangniniile katu tei gonyii pum sekpiinii tile.

⁴Kadapokii gonyiinii tisii kalei, sateichii teitei pat kalei takumpii, nyiinii gonyiigo kaswisii kalei tinglang kak, nyiinii kaset kalak tei dou tang karamle katu tei pat kasunakii reipii gonyiigo nyiinii tam takle.

⁵Aijangpii Iniido nlailoisii lehpei kalak tinglang kito, gonyiigo kahem teinii hemwo tang karam sateichii nyiimah teisii tha katii tei kadak aitang karam gotei hingsii, Inii gonyiimah kamalum tei titang karam jangpii mpougo lang magong leile.

⁶Nlenii aitoinii Timothinii gonyii dato nyiida nlaigongsii, gonyiimah kamalum sateichii lungkasyiimah kabi nha, sateichii nyiinii gonyiigo ngoukai kanyii takumpii gonyiiniido nyiigo ngoutang karam jangpii saryii- sii tinglang kaleita nyiigo tiigatpii maningsii leile katu tei nyiidakii tam mangou takle;

⁷aijangpii kangsana- mei, gonyiimah kaang kito nyiimah swi kamage katu sateichii kaset kalak hangtei gonyiimah kamalum paikito nyiigo tii ntapyii takle,

⁸kadapokii gonyiinii Bangpii dato sangtingsii satleponii, aitoi nyiinii ringleile.

⁹Kadapokii nyiinii gonyii ju ngoutang karam jangpii sateichii gonyiimah kamalum tang kasu hangtei pyii matutang karam jangpii, tinghum tingna nyii lungswi matum madumpii nyiinii khangsii,

¹⁰nyii Saraa doito gonyiimah kaang kito nyiinii ka-nta doukalu teijangpii nyiinii Saraa dakii dakumpii kisii tam matoi wotangpo?

¹¹Aitoinii nyii Saraa sateichii Pfii pum sekpii, sateichii nyii Bangpii Jisunii gonyiida gong tang karam pwidi tei nyii jangpii tiidapyii matulo!

¹²Sateichii nyiinii gonyiigo lungkasyii takumpii, gonyii mei hangninanii hangniniigo sateichii meihang go gonyiimah lungkasyii katu tei Bangpiinii tii m-moipyiisii kisii kisii moi matulo.

¹³Aitiisii nyii Bangpii Jisunii mpoumah kama- teimei hang go kaswisii kagong ki, nyii Pfii Saraa doito mpounii gonyiigo sajek gasii kamatei kito tiisangting pyiitangle.