Read Maram Naga TAITAS 1 Bible Online

TAITAS 1 - Maram Naga bible

TAITAS 1

¹Saraanii kalai kalumei mah kamalum gotei tiiha matu tang karam jangpii sateichii Kristenmei mah dormonii ralikapyii kasang kiteikii pang gongpyii matutang karam jangpii, Saraa nga kangamei ninado Jisu Kristamah Tiilamlwi kapyiimei hangninii tiisii kalei Pol, Inii,

²chuisang chuilei kasu Saraanii pyiitanglesii ndouto riishii tiikabam kalui kaga karing tei doutanglesii maning kamalum kito,

³ai toinii ajhii kabi tinglang kiteito, mpounii tiilosii gudakii pyiikabam kabi rasam teipii Saraanii mpoumah tiimatu kanyii kaang tei nyiigo mati mangoupyii takle. Ai ai Inii nyiigo keikapyii Saraamah mwija teipii saa mpat leile.

⁴Kamalum njoi katu kito kasang gunah sapfii mpou Taitas dakii: Pfii Saraa ninado nyiigo keikapyii Bangpii Krista Jisunii jumage kapyii ninado kamajung tei n-go pyii matulo.

⁵Kaang aijangpiinii tangkasu hangtei nangnii adoidoi tiisii tiimajyii matutang karam jangpii sateichii namdi hang kito Charshmah katingmei bam tei kalai matutang karam jangpii Inii n-go Kret kikii kaibamle; Gumah ralikapyii hangtei maninglo, katunii.

⁶Charsh ki katingmei hangninanii tam mashyiipei kalak, nou hangninii mah naa katii, mpou nahmei tei kamalum mei tang karamle, sateichii ngoukashyii jairali mak-kii ahnyii pwi pfiinii katam swikasu jaikashyii tei gatang karamle.

⁷Kadapokii charsh ki doimajang katatmeinii Saraamah mahbam kashangmei hangninii tiisii, mpounii tam mashyiipei kalak, ajaipalhii dikasu, mak-kii lung maring kasu, jou sak panhii kasu, mak-kii n-gi razyii kaga, mak-kii sanahgo lunyii kasumei hangninii tang karamle;

⁸nlenii meigo pyiichii pyiisak kati, kabigo kamarei, mpou roinapii mpou lungswigo apum katii, kasang katii, kamatei, mpouroinapii mpou pumgo jum matwi kabuimei tang karamle;

⁹mpounii kakimeigo kasang rali kapyii teipii lung tiimakhiiha kabui tiisii sateichii teigo mazhii kasumei mah tiikama teido mangoupyii kabui tiisii kasang karaligo kamazhii ninado malum kabui samtam gotei mpounii sangtingsii jumtang karamle.

¹⁰Kadapokii nzhuisii kalei, kakadak sam katam ninado kasang kasu sam teipii chuisii meigo kahem mei hangkii leile, rou tiisii tiigyii malem kalei boumei kak kitole;

¹¹ahnyii mwi tei makat tang karamle, dapokii ahnyiinii seh sanah lukanyii jangpii ahnyiinii tamlak tang karam sam tei tam ralipyiisii, ki kalung mpung hang go tiipaksii leitakle.

¹²Ahnyii roinapii ahnyii kak kito mei hangninii, ahnyiimah doisam katam mei hangninanii tamle, “Kretmeinii tinglang kaleita kachuimei, kashyii kahong, saram- kow sateichii mahat kashyii, apok kadimeile.”

¹³Sakchyii ai kasangle. Teijangpiinii meinahnii likalu Jehu- dimei mah rasam kiteikii sateichii kasang go mazhii kasumei mah kakhatsam kiteikii ahnyiinii lungliit supiinii.

¹⁴Kamalum kiteito sang- ting kabui tiisii, ahnyiigo tiigatpii n-gipyiilo.

¹⁵Kamateimei datonii mahlyiihang ai mateile; nlenii tiimahong kalei ninado malum kasu ahnyii datonii samah kado kamatei tei gale; dapokii ahnyii swi ninado kabi kashyii tikabui ahnyii mah lungswi teido tiimahong aitakle.

¹⁶Ahnyiinii Saraago tilesii tam mpatle, nlenii ahnyiimah tha teinii mpougo mazhiimakle, ahnyiinii ka- ngouroule, katam swimakle, sateichii tha hangninii jangpiiniido kabi tei gale.