Read Maram Naga HEBRUMEI 1 Bible Online

HEBRUMEI 1 - Maram Naga bible

HEBRUMEI 1

¹Ndou kareiki Saraanii lungka- kalingmei paikito nyiipei nyii- paomeigo jairali kataam kataam kito nlai nlailoisii sam rashiile,

²nlenii ai kalui tinglang leimik aikito nah sapfii mpou paikito nyii dakii mpounii sam rashiile. Mpougo mahlyii hangmah matou katou tei tiipyii takle, sateichii mpounii mpou paikito sazyii pouryiido tiipyiile;

³Mpounii Saraamah pumtei kava tei seikalatsii leile sateichii mpounii nunuto kalei Saraamah jaitalui gotei njoichak thiile; Sazyii pouryiigo mpoumah teimaham kalei samkang teipii panglungsii leile. Sazyii pouryiimei mah kem jangpiinii kaleikapyii doukalu taito, dikaki teimaham, Sating gam Saraamah bah ajiilam teito mpounii bam takle.

⁴Mpounii sating gamlui hang doito kisii bikaki zei doukalu takum- pii, ahnyii hang doito teiziikapii kisii bikaki tei tiipyii takle.

⁵“Kadapokii nang gunah sapfii mpoule, tingnei Inii go pfii tiiwo takle,” mak-kii nlailoisii “Inii mpoumah Pfii tei tangle, sateichii mpounii gunah sapfii mpou tei tangle,” sii Saraanii mpoumah sating gamlui hangninii dakiido tamsang tam makle.

⁶Sateichii Saraanii lungkarei mpounah sapfii mpougo sazyii pouryiikii lang m-mang katu kak, mpounii tamle, “Saraamah sating gamlui hangnii mpougo mata tang karamle.”

⁷Sateichii sating gamluimah kaang kito Saraanii tamle, “Saraanii mpoumah sating gamluigo tingkai tiipyiile, sateichii mpou nga kangameigo mi mah mishong tiipyiile.”

⁸Nlenii Nah sapfii mpoumah kaang kito mpounii tamle, “O, Saraa, gomah sating sazyii tei kalui tiisang tiimakle, sateichii kagu kapang gasii nangnii gomeigo apum tiisii lungle.

⁹Kasang kamajyii tei nangnii mareile, sateichii kama gotei ngouroule, teijangpii Saraanii, go Saraanii, go bemei doito n-go kisii ka-ntamah thao manukpyii takle.”

¹⁰Sateichii mpounii tamle, “He Bangpii, saroisekto sazyii tii mpatpyii takle, sating hang ainii go baichemle;

¹¹ahnyiinii gatutangle, nlenii nangnii bamjou tangle; ahnyiihangnii peimaninii ham katu takumpii hamtu tangle.

¹²Sateichii kabapei takumpii nangnii teigo tei kadiitsii kajui tangle, sateichii ahnyii teinii peimani takumpii taamdo taam tutangle. Nlenii nangnii njoisii leihumle, sateichii gomah tingkum teinii luisang luilakle.”

¹³Inii n-go ngou karoumeigo gopi kangkii kai kasuta “Gubah ajiilam aito bamlo sii Saraanii mpoumah Sating gamlui hangninii dakiido tamsang tam makle.”

¹⁴Sating gamlui hang ai kada- peipo, teitiileponii? Ahnyiinii Saraa nga ngasii kalei ninado keikapyii karing doutang karam meigo tiiha matu tang karam jangpii mpounii m-mang kabam rangii teile.