Read Maram Naga HEBRUMEI 10 Bible Online

HEBRUMEI 10 - Maram Naga bible

HEBRUMEI 10

¹Kadapokii ajaitingshang tei- nii ai kasang hang mah ajai agok kasang teisupiinii gong tang karam kabi hang mah khiina katu taiswisii, tingkum satui taksupii pyiitoisii kalei njoi katu kakarat hang teipiinii Saraada manang kagongmei hang gotei sajek kaga tei tiisang tiipeiwo lakle.

²Teitii leponii, ahnyiinii pyiitoi kalei tei matou ailakpo? Kamateimei hang gotei binii tiimatei aitakleponii, ahnyiinii kem katii mah tikatu tei leiloi lakle.

³Nlenii kakarat hang teipiinii ting- kum satui kem mah tam maningloi katu hangninii leile.

⁴Kadapokii twom madangmah ninado Amyiinah mah zai teipiinii kem tei poisang poitoipei wolakle.

⁵Teijangpii mpounii sazyii pouryii kagong kak tamle, “Kakarat ninado pyiikatoi hangtei nangnii marei sutakle, nlenii nangnii gujangpii pumrong hangninii tiikadapyii bamtakle,

⁶kouring rusii pyiikatoi ninado kem jangpii pyiikatoi hangtei nangnii marei sutakle.

⁷Teito Inii tamle, ‘julo, ajaitingshang mah larek bung kiteikii gumah kaang kito ryii kabam takumpii, gomah kamaning kamarei tei tiitang karam jangpii Inii gongtakle, O Saraa.’ ”

⁸Mpounii kareiki tamle, “Kakarat, pyiikatoi, kouring rusii pyiikatoi ninado kem jangpii pyiikatoi hangtei nangnii marei sutakle, ninado lung- mang sutakle.” (Aihang ai ajaiting- shang taiswisii pyiitoi ai kido mpounii ai ai tamle;)

⁹teito mpounii tamle, “Julo, Inii gomah kamaning kamarei tei tiitang karam jangpii gongle.” Mpounii hangna kashang tei poi makhii tang karam jangpii karei tei poitoi takle.

¹⁰Meihang jangpii binii Jisu Kristamah pumrong pyii katoi teimah kamaning kamazhii pai- kito nyiihang go tiimateipyii takle.

¹¹Sateichii kanat kajum atingmei hangnii sating kata nga ngasii sateichii njoi katu kakarat hangtei nlai nlai loisii pyiitoi sii satle. Kakarat aipiinii madou kado kem tei poitoi peiwo lakle;

¹²Nlenii Kristanii kem jangpii karat binii sek-kii kalui kaga jangpii pyiitoi aisanii Saraa- mah bah ajiilam teito bam takle.

¹³Saraanii mpoumah ngou karou- meigo mpoumah pi pazhii kangkii kai kasuta mpounii teikito koisii leile.

¹⁴Kadapokii mpounii binii pyiikatoi teipii tiimatei kaleimei hang go kalui kaga jangpiinii sajek kaga tei tiipyii takle.

¹⁵Sateichii rangii kamateiniido nyiigo sakchyii pyiile. Karei kito ahnii tamle,

¹⁶gong tang karam tinglang kanaki Inii gonyiigo ka- swisii tiitang karam sat tang karam samtam tei aile: “Inii gumah ajaitingshang hangtei gonyii lung kikii kaipyii tangle, sateichii gonyiimah lungswi kikii teihang tei ryiikai pyii tangle, sii Bangpiinii tamle.”

¹⁷Sateichii mpounii tamle, “Inii ahnyiimah kem ninado kashyii tha hangtei nlailoisii maningloipyii lakle.”

¹⁸Teipiinii aihang ai kalaipyii aitakle sekchii, kem hang pyiitoi tang karam jangpii pyiikatoi tei tiiloi tang karam kabi tei gatangle.

¹⁹Teipiinii gukangsanamei, Jisunii taikapyii teipii kamatei bamni liit tang karam mah laat kabam tei nyiinii doutakle.

²⁰Mpounii nyii jangpii kalampei kitei katunii, mpou- mah pumrong paikito, karing pwidi, pwidi kasatai hangninii laatpyii bamtakle.

²¹Saraamah ki phyiiryiito koipyii tang karam kanat kajum atingmei kadi hangninii nyiinii doutakle.

²²Teipiinii kabi kashyii tikabui kama lungswi kiteito tiimatei kalei ninado dwi kamatei piinii shyii matei kalei pumrong hangtei pung- sii, lung kamatei ninado soikalak kamalum teipii nyiinii Saraada manang gongde.

²³Nyiinii tam kalei nyiimah maning kamalum tei sang- tingsii jumjoude; dapodinchii Saraanii mpoumah riishii tei majang lakle katu tei nyiinii mpougo malum wobuile.

²⁴Hangninanii hangniniigo tiihasii lungkasyii mangou tang karam ninado kabi tha tiitang karam jangpii, hangninanii hangninii jang- pii maningde.

²⁵Kangkanii tiisii kalei takumpii, nyii hangnii gong ndwi kalei tei nyiinii matou sude, nlenii Bangpiimah leimik tei nagong bui buisii kalei tei gonyiinii ngoukatu taiswisii, hangninanii hangniniigo kisii lung tiimakhiide.

²⁶Kadapokii kasangmah swirek kabi doukalu teito nyiinii kem tei tiisii leihum leponii, kem poitoipyii tang karam kakarat pot hangninii kado gale,

²⁷nlenii mashak kalei teinii Saraago mazhii kasumeigo tiimaga tang karam ngou kahing mah mi ninado samtak katiimah gong kalei gotei hingsii koitang karam tei roitakle.

²⁸Moses mah ajaitingshang go swikasumei hang gotei, meihangna mak-kii, teisung moisii kalei sakchyii teinii samtak tiisii kama tei dou wosek-kii, mah kado lungkasyii tei gasii girang leile.

²⁹Teitii leponii jumage kapyii mah rangiigo kalet kalou katii, ahgo kem kito tiimatei kapyii Saraamah zaimah sat tang karam samtam go mai kamalamah pot hangninii takumpii poikalei, Saraa nah sapfii mpougo mazhii kasu gotei kadaziikapii kaki kadwi karat tei doumajyiile sii gonyiinii maning leipo?

³⁰Kadapokii “Inii kumfii tangle, Inii powrui tangle,” sii katam sateichii “Bangpii- nii mpoumah meihang gotei samtak tiitangle,” siido katampii gotei nyiinii tile.

³¹Karing Saraa bahki tak kaliit ainii ngoukahing hangniniile!

³²Maning gonglo, tinglang ka- reiki gonyiinii kada takumpii leipo: teitinglang dou, gonyii phyiiryiikii Saraamah kava mangoupyii kaleitai, gonyiinii kamage kalak hangkii doule, nlenii teiteinii gonyiigo ngamwo makle.

³³Tinglang hangninii kinii gonyiigo machii doito kalet kalou tiipyii takle, ninado ju tiimashyii takle. Sateichii tinglang kaki hang- ninii kinii aitiisii tiikaleimei gotei gonyiinii haitang karam jangpii tiikada takle.

³⁴Kabangki kabam meimah kamage kalak njai tei gonyiinii dou njoi takle, sateichii gonyiimah mahbam hangtei soukalu tinglang kak, gonyiimah maga kalei tei gonyiinii nta ntasii leh wotakle, dapodinchii kalui tiisupiinii bam tang karam kisii bikaki tei doutakle katu gonyiinii tile.

³⁵Teijangpiinii alangh kadi kaswi kalei, gonyiimah maning kamalum tei rat toi aisulo.

³⁶Kadapokii gonyiinii Saraamah kamaning kamazhii tei tiitang karam jangpii sateichii mpounii riishii tiikabam tei doutang karam jangpii, gonyiinii lung lehti tang karam kabi ai leile.

³⁷Kadapokii kabi rasam kito tamle, “Tinglang shangniikii tai gongtang karam ahtei gong tangle, sateichii ahnii rilakle.

³⁸Nlenii gumei kasang kamajyiimei hangteinii, kamalum teipii ring tangle, sateichii ahnyii kak kito mei kata hangninanii tailam pang nlaitu leponii, Inii ahgo lungmang lakle.”

³⁹Nyiinii tailampang nlai katu ninado maga kaleimei hangtei makle, nlenii nyiinii malumsii keipyii kalumei teile.