Read Maram Naga HEBRUMEI 3 Bible Online

HEBRUMEI 3 - Maram Naga bible

HEBRUMEI 3

¹Teijangpii Saraanii lat kalu, kamatei gukangsanamei, nyiinii tam mpatsii kalei kamalum mah kanat kajum tingdipii tiimatu tang karam jangpii Saraanii lang m-mang kapyii Jisu gotei maninglo.

²Saraa kilungto Mosesnii malum kabui tha tiikatu takumpii ai tha tiimatu tang karam jangpii mpougo kalai kapyii, Saraa sam tei swisii leile.

³Kadapokii ki tiimakhii kalei mei teinii kigo tei sung kisii dzyii ka-nrou doukalei takumpii, Jisunii Moses sung kisii dikaki dzyii ka-nrou tei doumajyiile.

⁴Kadapokii ki hang tei mei kata kangkanii tiimakhiile, nlenii mahlyii hang go tiikapyii teinii Saraale.

⁵Ki kaleimei hangninii tiisii Mosesnii Saraa kilungto malum kabui tha tei tiile, sateichii gong tang karam tinglang kanaki Saraanii tam tang karam mah hang mah kaang kito mpounii tamle.

⁶Nlenii Saraamah ki kalung teito nah sapfii mpou tei tiisii Kristanii malum kabui tei tiile. Nyiinii maning malumsii kalei kiteito nyiinii lung kadi ninado nyiimah lung kalum tei jumsii lei leponii, nyiinii mpoumah ki teile.

⁷Teijangpii rangii kamateinii tam kalei takumpii, “Gonyiinii tingnei mpoumah rok tei shii leponii,

⁸sazyii kamarong ki teito jaikaju piinei leimik, rangpa katu ki takumpii, gonyii lung teisulo,

⁹tei kito gonyii peipao meinii n-gu jai jule sateichii tingkum rekdai katang tei ahnyiinii gumah tha tei ngoutakle.

¹⁰Teijangpii Inii teiha gotei rarhiisii tamle, ahnyiinii tinglang kaleita ahnyii mah lung kiteito dhiisii tat tule, ahnyiinii gumah pwidi timakle.

¹¹Inii rakarhii kito riishii tiikabam takumpii, ‘ahnyiinii gumah ntakbam kitei liitsang liitlakle.’ ”

¹²Kangsanamei, gonyii kak kito mei kado kashyii lung kapung, sateichii malum kasu tei patsii mpounii karing Saraa dato dhiisii tat tu kasu tiisii sakai wolo.

¹³Nlenii gonyii kata kangkago kem mah kasang kasu chuisii kahem teipii gonyii lung tei teimatu kasu tiisii “Tingnei” katu lat kaleita tei, sating kata hangninanii hangniniigo lung tiimadilo.

¹⁴Kadapokii nyiinii nyiimah lung kalum tei karei sekto kalui katang tei sangtingsii jum woleponii, nyii hang ai Kristago kaswisii njai dou njoi katumei takle:

¹⁵ai tiisii tam bamle, “Gonyiinii tingnei mpoumah roktei shii leponii, rangpa katu ki takumpii, gonyii lung teisulo.”

¹⁶Shii wosii rangpa katu ahnyii tei tatapo? Moses nii doimajang tatsii kalai kangto Izip sazyii toikalei mei hang tei makpo?

¹⁷Sateichii mpounii tata phyii ryiikii tingkum rekdai katang tei rarhiipo? Sazyii kamarong kito pum koukalei kem tiikalei ahnyii phyiiryiikii makpo?

¹⁸Sateichii ka- khatsam swikasu meida teikii supii, ahnyiinii mpoumah ntakbam kitei liitsang liit laklesii mpounii tadakii riishii tiipyiipo?

¹⁹Teipiinii malum kasu jangpii ahnyiinii ntakbam kitei liitpei wolak kiile katu nyiinii ngoule.