Read Maram Naga HEBRUMEI 4 Bible Online

HEBRUMEI 4 - Maram Naga bible

HEBRUMEI 4

¹Aitoinii mpounii tam kalei ntakbam tei nyiinii dou kabui tiisii Saraanii nyiigo riishii tei pyiibam takle. Teitii leponii, riishii tiikabam ka-ntak tei doutang karam kito gonyii mei kado tiidou kalak tei kadou kasu tiisii nyiinii sakai wode!

²Kadapokii ahnyii dakii tam rali kapyii takumpii nyii dakiido kabi rasam tei tam ralipyii takle; nlenii shii kalu samtei ahnyii jangpii mah kado kabi gale, daponii katam kaswimei teinii kamalum tei njasii teigo tei lukai makle.

³Kadapokii malum kalumeinii ka-ntak nitei liitle, mpounii tam kabam takumpii, katunii, Inii rakarhii kito riishii tiikabam takumpii, “Ahnyiinii gumah ka-ntak nitei liitsang liit lakle,” mpoumah tha hangtei sazyii pouryii tii mpat saroisekto lui aikado,

⁴Kadapokii mpounii leimik sana ka- shangmah kaang kito mahki katonii aitiisii mpounii tam bamle, “Leimik sana kashang piinei Saraanii mpoumah tha hang kito ntakle.”

⁵Sateichii bam aikito mpounii tamle, “Ahnyiinii gumah ka-ntak kitei liitsang liit lakle.”

⁶Teijangpii mei kangkanii ka-ntak kitei liit tang karam lei katu taiswisii, sateichii kareiki kabi rasam tam ralikapyii shii kalumei teinii katam swikasu jangpii liit kasu taiswisii,

⁷mpounii tinglang kathangkiitai Devit paikito ndouto tam kabam takumpii, “Gonyiinii tingnei mpoumah rok tei shii leponii, gonyii-lung tei sulo,” sii ‘tingnei’ katu retbak kapyii leimik hangninii mpounii nlailoisii retpyiile.

⁸Kadapokii Saraanii pyii tanglesii riishii tiikabam ka-ntak tei Joshu- wanii ahnyiigo pyii aitakleponii, Saraanii ataito leimik kaki mah kaang kito tamlak takle.

⁹Teipiinii Saraamah meihang jangpii ka-ntak leimik leile;

¹⁰Kadapokii Saraamah ka-ntak ki liit kalei meihang teinii, Saraanii mpoumah tha kito ka-ntak takumpiinii ahniido ahmah tha kito ntak tang karamle.

¹¹Ahnyiinii katam swikasu jangpii tiidou kasu takumpii nyii kak kito mei kado tiidou kasu tei tiikasu tiisii nyiinii ngam kabuita teimah ka-ntak kitei liit kalu tiide.

¹²Saraamah samkang teinii ring- kalei sateichii nlaisupii bam kasu, mwi hangna kapung saryiikhang sungdo kisii mwi bikile, rakot nei rangiigo sateichii ashaang nei akeeng go jaitaam katu katang tei jowkalale, sateichii meinah mah kamaning lungswi ninado alungmah karaang kamaning hang go samtak tiile.

¹³Sateichii tii mpat kabam mah pot hangniniido mpou doito kakabei gale, nlenii mpou mikjot kito mahlyii hang gomnei supii laatlasii leile, sateichii nyiinii mpou dakii tam mpat tangle.

¹⁴Saraa nah sapfii mpou Jisu, sating gam hang ki pitang kalu kadi kanat kajum tingdipii nyiimah kalei taiswisii, nyiinii tam ka-mpat tei sangtingsii jumde.

¹⁵Kadapokii nyii- mah tang kasu kasui hang go lungsyii pei kalak kanat kajum tingdipii tei nyiinii bam makle, nlenii nyii takumpii mahlyiihang kito nyiigo takumpii hem katu doukalei, nlenii kem kaga, kanat kajum tingdipii tei nyiimah leile.

¹⁶Teitii leponii nyiinii tiikaha mareisii kalei kak, lungsyii kati doutang karam ninado jumage kapyii tei nyiinii ngoutang karam jangpii, lung kalum tei kaswisii jumage kapyii mah sagongbam kitei nyiinii tat manang liitde.