Read Maram Naga HEBRUMEI 5 Bible Online

HEBRUMEI 5 - Maram Naga bible

HEBRUMEI 5

¹Kadapokii meihang kak kito kalai kalu kanat kajum tingdimei hang teinii Saraa nga kanga kito meihang tung tiisii pyiikatoi ninado kem hang jangpii karat matu tang karam jangpii bam kaipyiibamle.

²Mpou godo kasui teinii bang maguisii kalei taiswisii tikasu ngoukasumei ninado tiikama meigo lung manoisii mpounii kaswiwo buile;

³sateichii meihang mah kem jangpii mpounii karat kapyii takum- pii, mpoumah kem jangpiiniido mpounii karat tang karamle.

⁴sateichii mei kaniido sadzyii ngariit katii bamtei mpou roinapii poilei makle, nlenii Aron go lat kapyii takumpii mpou godo Saraanii latpyiile.

⁵Teitakumpii Kristaniido kanat kajum Tingdimei hangninii tiitang karam jangpii mpou roinapii mpougo poisagoi makle, nlenii mpou dakii, “Nang gunah sapfii mpoule, tingnei leimik Inii n-go manaapyii takle” sii katam mpouniile.

⁶Mpounii bam kaki hangninii kitodo tamle, “Melkizedek taito adoidoi tiisii lung kadoihum kalei taiswisii, nangnii kalui kaga kanat kajum atingmei hangninii tiitangle.”

⁷Mpounii sazyii pouryiimei tiisii lung kalei kak, katai kito mpougo keipyii wokabui kangam ah dakii hungsii kahat ninado mikdwi kapat tei njasii kariita ninado kakhang tei Jisunii pyiile, sateichii Saraago hingsii kamaning jangpii, mpougo shiipyiile,

⁸Mpounii Saraa nah sapfii mpou tei tiiwo kido mpounii kamage kalak leh katu teipiinii katam kaswi tei rali wotakle,

⁹sateichii mpounii sajek gasii bimatui wokalu taiswisii, mpounii katam kaswimei hang jangpii kalui kaga keikapyii karing- mah kapat bam tei mpounii tiiwo takle,

¹⁰Sateichii Melkizedek taito adoidoi tiisii lung kadoihum kalei taiswisii, “Saraanii mpougo kanat kajum atingmei hangniniile katupii saa mpat takle.”

¹¹Ai kaang kito nyiinii tam tang karam hangkii leile, nlenii gonyiinii shiiti kasu jangpii sam ai mashangsii timatu tang karam hungle.

¹²Ka- dapokii tinglang taiswisii gonyiinii madhiikapyiimei tiitu kajyii kito, mei kata hangninanii gonyiigo Saraa samtam mah karei roukatii hang tei nlailoisii ralikapyii tei gonyii jangpii bitang takle; sateichii gonyiinii chiitak katei chiitang karam sungnii ranadwi sak tang karam takle.

¹³Kadapokii ranadwi sak kaleimei hangteinii kasang kamajyiimah kaang kito switii makle, kadapokii ahnii nahmeile.

¹⁴Nlenii chiitak katei teinii “Tiikamadhii paikito kabi kashyii tikabui kangam,” katingmei jangpiile.