Read Maram Naga HEBRUMEI 7 Bible Online

HEBRUMEI 7 - Maram Naga bible

HEBRUMEI 7

¹Kadapokii Salem ki sagong, sagoi kaki Saraamah kanat kanhii kajum atingpii teinii, sagong madaigo ngam kalu kito nlaigong kalei Abraham go kadou wosii mpougo sa- toi pyiitakle,

²sateichii Abrahamnii mahlyii hangmah njai kearii kito njai hangninii mpougo pyiitakle. Melki- zedek zei mah kaang karei ainii “Kasang kamajyii mah sagong” sateichii mpou ai Salem mah sagong katu taiswisii mpou ai “Kamajung mah sagong” teitiile.

³Melkizedek pfii mak-kii, pwi mak-kii, mpoumah peipaomei hangninii mah kado ryiidek kabam tei gale, mpougo kalung mak-kii katai tinglang mah ryiidek kabam tei gale, mpounii Saraa nah sapfii mpou takumle; kalui gasii mpounii kanat kajum atingmei hangninii tiisii bamle.

⁴Julo, mpou ai kadaziikapiinii dipo! Abrahamnii saryii kito doukalu mpoumah mahlyii hangmah njai kearii kito njai hangninii tei mpougo pyiitakle.

⁵Sateichii kanat kajum atingmeimah bam doukalu Levi mah tatreng hang teinii ajaitingshang taiswisii meihang dato katunii, Abraham mah taa nahmei kado, Isrelmeinah dato njai kearii kito njai hangninii poi matu tang karam jangpii kakhatsam tei doutakle.

⁶Melkizedeknii Levi mah taa nahmei makle, nlenii njai kearii kito njai hangninii tei mpounii Abraham dato poiwo takle... Sateichii Saraanii pyiitanglesii riishii tiikabam doukalu mpougo tei satoi pyiitakle.

⁷Satoi pyiisii kaleipii teinii satoi kadoupii sung kisii dile katu ai mah kado maning kariirhii katu gale.

⁸Sateichii aikitonii taiga tang karam meinii njai kearii kito njai hangninii ai poileile, nlenii teiki tonii mpou ring leile katumah sakchyii kalei ah teinii poileile.

⁹Sateichii njai kearii kito njai hangninii dousii kalei Levi sekpiiniido Abraham paikito njai kearii kito njai hangninii tei pyiitakle sii tam buile.

¹⁰Kadapokii Melkizedeknii Abraham go kadou katu tinglang kak Levi tei mpou Pfii moilungto leile.

¹¹Sateichii kanat kajum atingpii Levi sadung mah paikito bikamatui tei doutakle leponii, (Kadapokii tei kangto Isrelmeinah-nii ajaitingshang tei doutakle) Aron taito adoidoi tiisii lungkahum teisupii, Melkizedek taito adoidoi tiisii lung kahum kanat kanhii kajum Atingmei kaki hangninii pat tang karam kadapei kabi leipo?

¹²Kadapokii kanat kajum atingmei tei pikali katu tinglang kak, ajaitingshang kitodo poikali tang karam tei leile.

¹³Sateichii ai hang jangpii tam kalei, nyii Bangpii ai meilui kaki hangninii kitole, satei- chii mpou mah lui kak kito mei hangninii kado kakhatbam kiteito kanat kajum atingmei hangninii tiisii tha tiisang tiimakle.

¹⁴Kada- pokii Judah sadung kito nyii Bangpii gongle katu kasangpii titakle; teimah sadung mah kaang kito Mosesnii kanat kajum atingmei mah kaang kito samah kado tam makle.

¹⁵Sateichii Melkizedek go njoi katu kanat kajum atingmei kaki hangninii kapat tinglang kak, nyiinii tam kalei ai hangkapii kisii kasang takle;

¹⁶Mpounii pumzai mah ajaitingshang taiswisii makle, nlenii kalui kaga karing mah teimaham taiswisii kanat kajum Atingmei tiiwo takle.

¹⁷Kadapokii ai ai mpoumah sakchyiile, “Nang Melkizedek taito adoidoi tiisii lungkahum, kalui tiikasu kanat kajum atingmei hangniniile.”

¹⁸kadapokii asung karei mah ajaitingshang tei kasui ninado mah kado kabi kaga jangpiinii toi aitakle.

¹⁹Kadapokii Moses mah ajaiting- shang teinii samah kado bimatwi matu womakle, sateichii kisii bikaki maning kamalum gotei pung gongpyiile, teimah paikito nyiinii Saraa mah bam kitei manang gongle.

²⁰Sateichii ai ai riishii haisupii pat makle,

²¹sung kareiki kanat kajum Atingmei tiikalumei hang teinii riishii haisupii ahnyiimah bamtei poitakle, nlenii Saraanii mpou dakii tamle, “Bangpiinii riishii tiiwo takle, sateichii mpoumah lungswi kalilakle, ‘Nang kalui tiikasu kanat kajum atingmei hangniniile.’”

²²Aitiisii Jisunii riishii tei njasii soikalak kisii kabi sat tang karam samtam tei tiitakle.

²³Asung kareiki kanat kajum atingmei teinii mei hangkiile, kadapokii katai teinii ahnyiigo bam hang kiteito bamhumsanii tha tiimatu makle.

²⁴Nlenii Mpounii kalui gasii leihum katu jangpii tak kasu kanat kajum atingmei bam tei doutakle.

²⁵Teijangpii mpoumah paikito Saraada manang kagong mei hang go tinglang kaleita mpounii kei- kapyiido ngamle, kadapokii mpounii ahnyii jangpii riita khangpyii tang karam jangpii taksupii ringsii leile.

²⁶Kadapokii ai kakum kamatei, tam kamashyiini kaga kahongrum kasu, kem katiimei hang dato poitaam kabam sateichii sating gam sung kisii poi kasagoi, kanat kajum Tingditupii hangninii nyiinii dou- tang karam sekle.

²⁷Kanat kajum Tingditupii teinii karei reisang kito ahnyii mah kem jangpii, sateichii tei taito meihangmah jangpii sating kata kakarat pot pyiitoi kalei takumpiinii, mpounii tiitang karam kabi tei gale, mpounii mpou roinapii mpougo pyiikatoi tinglang kak, mpounii ai ai binii ahang jangpiinii tiitakle.

²⁸Moses mah ajaitingshang teinii meinahgo ahnyiimah kasui kiteito kanat kajum Tingditupii tiisii kalaile, nlenii ajaitingshang tainii kagong riishii mah samkang teinii kalui gasii bikamatui nah sapfii mpou gotei kalaile.