Read Maram Naga 2 PITAR 3 Bible Online

2 PITAR 3 - Maram Naga bible

2 PITAR 3

¹Lungkasyiimei, aitoinii ai ai Inii gonyii dakii karyii hangna kashang chitile; chiti hangna-napui kiteito gonyiigo tam maningsii gonyiimah kasamsang lungswi gotei lung tiimadi tang karam jangpii Inii tiitakle,

²katunii, ndou kareiki lung- kakalingmeinii tam kabam ninado tiilamlwi kapyiimei mah paikito gonyii dakii pyiikabam Bangpii ninado nyiigo keikapyiipiimah kakhatsam tei gonyiinii maningloi matu tang karam jangpiile.

³Karei reisang kito gonyiinii ai ai tilo, katunii, kalui tinglang ki hoksii kanuimeinii ahnyii pumzainii kamarei ka-ntha hang teitei swisii, hoksii kanui tei njasii gong tam tangle,

⁴“Mpou gong tang- lesii mpounii riishii tiibam makpo? Mpou kadaki leikhe? Nyiipei nyiipaomei hang taitu takle, nlenii mahlyii hangtei sazyii pouryii tii ka-mpat sekto rei njoihumle.”

⁵Ndou kareiki Saraanii kakhatsii katam sam teipii mpounii sating ninado sazyii tii-mpatle. Teito sazyii ai dwi kito dwipii tii-mpatle,

⁶sateichii kaham sazyii pouryiigo tiimaga kalei tai, dwi kadimah dwi teipiile katu pat kalei kasang tei ahnyiinii mangainyii sii mangaile.

⁷Nlenii samtak katiimah ninado Saraa haikasumei hang go tiikamaga mah leimik tei gong kasuta, njoi katu kakhatsam teinii aitoi kalei sating ninado sazyii pouryiigo mipii rutang karam jangpii jumatousii kaibam takle.

⁸Nlenii lungkasyiimei, Bangpii mik doito leimik hangninii tei tingkum tangkii takumle, sateichii tingkum tangkii tei leimik hangninii takumle, katu sam hangninii ai gonyii mangai sulo.

⁹Mei kangkanii kamanyiisii maning kalei takumpii, mpounii tiitanglesii riishii tiikabam tei tiitang karam jangpii Bangpiinii manyii makle, nlenii mpounii gonyii jangpii lung lehpyiile, mpounii mei kagodo tiimaganyii makle, nlenii meihangnii lung kaligong katu mareile.

¹⁰Nlenii Bangpiimah leimik teinii karagamei takumpiinii gong tangle, teipiinei leimik satingnii koi-nrung katei tei kaswisii gatu tangle, sateichii sating gam sageiti hang tei mipiinii rutoi tangle, sateichii sazyii ninado teilungto kalei tha hangtei gatu tangle.

¹¹Mahlyii hang ai aitiisii gatu tang karam taiswisii Saraamah leimik gong tang karam tei, koisii koisii sateichii kalangsii gong matu- nyiisii, mateisii kalung kito ninado Saraa kamaning kito gonyiinii kada kakum mei tiitang karampo!

¹²Teipiinei leimik mah kaang jangpii sating tei mipii rusii tiimaga tangle, sateichii mi maga teipii sating gam sageiti hang tei long tangle.

¹³Nlenii mpoumah riishii taiswisii, kasang kamajyiimeinii lungkalei sateichii sating ninado kasatai sazyii gotei nyiinii koileile.

¹⁴Teijangpii lungkasyiimei, gonyii- nii aijangpii koikalei taiswisii, mpou mikjot kito sajek ninado kama gasii, majungsii gonyiigo mpounii dou wokabui tiilo.

¹⁵Sateichii nyii Bang- piimah lung leh kati tei keikapyii karing lesii poi wolo. Tei takumpii lungkasyii nyii sanapii Polniido mpou dakii pyii kabam swirek kati taiswisii, gonyii dakii ryiipyii takle. Mpoumah chiti karei hang ki kado aimah kaang kito mpounii tam kalei tei aile.

¹⁶Tei lung kito kangkanii tihungle; teitei tikasumei ninado lung tiigatpii sat kasumeinii kabi rasam kakido masii poitaam kapyii takumpii ryiikabam kaang tei ahnyiinii poikali pyiile. Ahnyiinii tiikalei aijangpii samtak katii piinei ahnyii roinapii ahnyiigo tiikamaga tei pung gong leile.

¹⁷Teijangpii lungkasyiimei gonyii, ai ai reipii tilo, katunii, kashyii- meimah kama teinii chyiipoi tusii, gonyiinii gonyiimah lung kasangting kiteito koukasu tiisii sakai wolo.

¹⁸Nlenii jumage kapyii kito sateichii nyii Bangpii, nyiigo keikapyiipii Jisu Kristamah swirek kati kito dikhiilo. Mpou dakii aitoido kalui kaga katangdo pumtei kava tei matulo Amen.