Read Maram Naga 1 JON 3 Bible Online

1 JON 3 - Maram Naga bible

1 JON 3

¹Julo, nyiigo Saraamah nahmei tiipyii tang karam jangpii Pfiinii nyii phyiiryiikii kadaziikapii lungsyii pyiitakpo? Sateichii nyiinii teitei miwo takle, kaang aijangpii sazyii pouryiinii nyiigo timakle, dapokii sazyii pouryiinii mpougo timakle.

²Lungkasyiimei, aitoinii nyiinii Saraamah nahmei takle, nlenii nyii ai kadapei takum tangpo katu aitoi mangou makle, nlenii Kristanii ka- gong kak, nyiido mpou takum tangle katu nyiinii tile, dapodinchii mpounii kasangpii ringkalei sek takumpii nyiinii mpougo ngoutangle.

³Sateichii mpougo maning kamalum meihangnii, mpounii kamatei takumpii mpou roinapii mpougo tiimateile.

⁴Kem katiimei hangnii ajaiting- shang go swikasudo tiile, sateichii kemnii ajaitingshang go swimakle.

⁵Sateichii kem hang poitoipyii tang karam jangpii mpounii gongle, sateichii mpouda kem gasangle gale katu gonyiinii tile.

⁶Mpou dato taksupii kaleimei hangtei kem tiimakle, kem katiimei hangnii mpougo ngoudo ngoumakle tido timakle.

⁷Gunahmei, mei kaniido gonyiigo chuisii hem maluwo sulo! Kasang tiisii kaleimei tei mpounii kasang ka- majyii takumpiinii, kasang kamajyii meile.

⁸Kem katii ahteinii seitan datole, dapokii seitannii saroisekto kem tiile. Seitanmah tha tei tiimaga tang karam jangpii, Saraanah sapfii mpou gotei magongle.

⁹Saraa dato manaa kalumei hang- tei kem tiimakle. Dapokii Saraamah lwirou tei mpou dato taksupii leile, sateichii mpounii kem tiisii leiwo lakle. Dapokii ahnyii Saraa dato manaa takle.

¹⁰Saraamah nahmei tei tatapo, sateichii seitanmah nahmei tei tatapo katu aipii ngou wobuile: Kasang tiikasumei ninado mpou sanapiigo lungsyii kasu mei tei Saraa dato makle.

¹¹Kadapokii “Hangninanii hang- niniigo nyiinii kalungsyii tang karamle,” katu ai saroisekto gonyii- nii shiikalu samtam teile.

¹²Nyiinii Ken takum lak tang karamle; mpounii sara kashyii tai tei swisii mpou sanapii Abel go gitat aitakle. Kennii mpougo dajangpii gitat aipo? Dajangpiipo dinchii mpounii katii hangtei kamale, nlenii mpou sanapiinii katii hangtei kasangle.

¹³Kangsanamei, sazyii pouryii- meinii gonyiigo ngourou leponii, sung gasulo.

¹⁴Nyiinii katai kito majusii karing kitei liit takle katu nyiinii tile, dapodinchii nyiinii nyii sanameigo lungsyiile. Lungsyii kasu ahteinii katai kito taksupii leile.

¹⁵Kang- sanameigo ngoukaroumei hangteinii meigo kagimeile, sateichii meigo kagimei mei kaniido kalui kaga karing tei gale katu gonyiinii tile.

¹⁶Aipii nyiinii lungkasyii tei tile, ka- tunii, mpounii nyii jangpii mpoumah karing tei pyiitakle, sateichii nyiiniido nyii kangsanamei jangpii nyiimah karing tei pyiitang karamle!

¹⁷Nlenii sazyii pouryii mah kanimei, hangninanii mpou sanapiinii bitang karam tei ngou wosii mpou sanapii jangpii lungtei laatsei suleponii, mpounii Saraago lungsyiile sii mpounii tam wobuipo?

¹⁸Gunahmei, nyiinii samkangpii ninado sam katam kamalhiipii lungsyii sude, nlenii tha teipii sateichii kasang teipii kalungsyiide.

¹⁹Teitii leponii nyii ai kasang kito leile katu aipii titangle. Sateichii nyii lungswinii nyiigo malesii tam ka- mashyiita,

²⁰nyiinii nyii lungswigo mpou doito tiisangtingloi tangle, kadapokii Saraanii nyii lungswi sung kisii dile, sateichii mpounii mahlyii hang tile.

²¹Lungkasyiimei, nyii lungswinii nyiigo malesii tam mashyii suleponii, Saraa doito nyiinii lung kadi tei leile.

²²Sateichii nyiinii kakhang hangtei mpou dato doule, kadapokii nyiinii mpoumah kakhat- sam hangtei swisii mpounii kamarei tei nyiinii tiile.

²³Sateichii ai ai mpoumah kakhatsamle, katunii, mpounah sapfii mpou Jisu Krista zei kito nyiinii malum tang karamle sateichii mpounii nyii dakii kakhat kabam takumpii, hangninanii hangniniigo nyiinii kalungsyii tang karamle.

²⁴Sateichii mpoumah ka- khatsam kaswimei hangteinii mpou dato taksupii leile, sateichii mpounii ahnyii dato leile. Sateichii mpounii nyii dakii pyii kabam rangii aipiinii mpounii nyii dato taksupii leile katu nyiinii tile.