Read Maram Naga 1 JON 5 Bible Online

1 JON 5 - Maram Naga bible

1 JON 5

¹Jisugo Kristale katupii kamalum meihangnii Saraa nahmeile sateichii Pfiigo lungkasyiimei hang- teinii mpougodo lungsyiile.

²Nyiinii Saraago lungsyiisii mpoumah kakhat- sam hang gotei kaswi kak, nyiinii Saraamah nahmeigo lungsyiile katu nyiinii aipii tile.

³Kadapokii nyiinii mpoumah kakhatsam hang go kaswi ai Saraago lungkasyiile, sateichii mpoumah kakhatsam hangteinii masui makle.

⁴Kadapokii Saraa dato manaa kalumei hang teinii sazyii pouryiigo ngamle sateichii sazyii pouryiigo jangsai tiikalu kangam tei aile, katunii, nyiimah kamalum teile.

⁵Sateichii Jisugo Saraa nahlesii kamalum ah tei supiinii, sazyii pouryiigo kangam ah tei tapo?

⁶Dwi nei zai njasii kagong mpou tei aile, katunii, Inii Kristale, dwi teiroinii supii, dwi nei zai kaswisii gongle.

⁷Sateichii sakchyii tei rangiile, dapodinchii rangii teinii kasangle.

⁸Kadapokii sakchyii kapyii hangtum leile: rangii, dwi, ninado zai teile, sateichii hangtum ai hangninii tiisii sakchyii pyiile.

⁹Nyiinii meinah mah sakchyii poileponii, Saraamah sakchyii teinii kisii dile, kadapokii Saraamah sakchyii tei aile, katunii, mpounii mpounah sapfii mpou mah kaang kito sakchyii pyiitakle.

¹⁰Saraa nah sapfii mpougo kamalum ah teinii ah roinapii sakchyii tei leile, Saraago malum kasu ahteinii mpougo chuimatu aitakle, kadapokii Saraanii mpounah sapfii mpou mah kaang kito pyii kabam sakchyii tei ahnii malum sutakle.

¹¹Sateichii sakchyii tei aile, katunii Saraanii nyii dakii kalui kaga karing tei pyiile, sateichii karing tei mpounah sapfii mpouda leile.

¹²Nah sapfii mpougo doukalu ahteinii karing tei doutakle, Saraa nah sapfii mpougo doukasu ahteinii karing tei doumakle.

¹³Saraa nah sapfii mpou zei kito kamalum gonyii dato kalui kaga karing leile katu gonyiinii titang karam jangpii, Inii ai ai ryii leile.

¹⁴Sateichii mpou dato kalei nyiimah maning kamalum tei aile, katunii, mpoumah kamaning taiswisii nyiinii mah kata kara khang leponii, nyiinii kakhang mpounii shiipyiile.

¹⁵Satei- chii nyiinii kakhang hang mpounii shiipyiile katu nyiinii tileponii, nyiinii mpou dato kakhang hangtei doutakle katu nyiinii tile.

¹⁶Mei kata hangninanii, mpou sanapiinii taitang gatang karam kem tiikalei ngouleponii, mpounii riita khang tang karamle, Sateichii Saraanii mpou dakii katai kaga mpat kasu kem katiimei jangpii karing tei pyiitangle. Taitang gatang karam kem leile, aimah kaang kito ahnii khang tang karamlesii Inii tam makle.

¹⁷Tiikama hang ai kemle, nlenii katai kaga mpat kasu kem leile.

¹⁸Saraa dato manaa kalu meihangnii kem tiisii leimakle, kadapokii Saraanah sapfii mpou teinii ahgo tiigatpii jumatousii leile sateichii sara kashyii teinii ahgo tiimashyiipei wolakle katu nyiinii tile.

¹⁹Nyiinii Saraamahle, sateichii sazyii pouryii hangnii sara kashyii kang nkangsii leile katu nyiinii tile.

²⁰Teito Saraa nah sapfii mpounii gongpyiile sateichii kasang ah gotei tiimatu tang karam sateichii mpounah sapfii mpou Jisu Krista, kasang ah dato nyii leile katu timatu tang karam jangpii, nyii dakii swikati pyiitakle katu nyiinii tile. Kasang Saraa ninado kalui kaga karing tei aile.

²¹Lungkasyii nahmei, gonyii roinapii gonyii tingtumah param hang kiteito mpaa wolo.