Read Maram Naga 2 JON 1 Bible Online

2 JON 1 - Maram Naga bible

2 JON 1

¹Kalai kalu sapwi mpei ninado mpoupei nahmei dakii kating tiisii kalei Inii ryii leile. Inii gonyiigo kasang kito lungsyiile, sateichii I-roinii makle, nlenii kasang tikalu meihangnii dole.

²Nyii dato taksupii kalei sateichii kalui gasii nyiigo kaswisii bam tang karam kasang mah kaang jangpiile:

³Pfii Saraa dato sateichii Pfii Saraa nah sapfii mpou Jisu Krista dato, kasang kito, ninado lungkasyii kito, jumage kapyii kito, lungsyii kati kito, ninado kamajung tei nyiigo kaswipyii tangle.

⁴Nyii Pfii dato kakhatsam doukalu takumpii, kasang kito tatsii kalei gonyii nahmei kangkiigo ngoukalu kito Inii hangkapii ntale.

⁵Sateichii aitoinii, sapwi mpei, Inii go dato khang leile; kasatai kakhatsam Inii godakii ryiikalei takum makle, nlenii nyiinii doukalu tei ryii leile.

⁶Sateichii nyiinii mpoumah kakhatsam hangtai tei swisii katat ai lungkasyiile. Gonyiinii saroisekto shiikalu takumpii, tei taiswisii gonyiinii tat tang karamle katu kakhatsam tei aile.

⁷Kadapokii Jisu Kristanii pumzai pungsii gongpyiile katu tisei kasumeigo chuisii kahem mei hangkii sazyii pouryii lung tatpat takle. Ai ai meigo chuisii kahem mei teile — sateichii Kristago ngou karoumei teile.

⁸Nyiinii tiikabam hangtei gonyiinii maga supii gonyii- mah lhang katokryii tei doukabui tiisii, gonyii roinapii gonyii sakai wolo.

⁹Mei kata hangninanii Kristamah karali gotei kaswisii leikasu, nlenii teigo majusii tat kalei teinii Saraago doumakle. Kristamah karali kito kaleimei hang teinii Pfii godo, nah sapfii mpou godo doule.

¹⁰Mei kata hangninanii gonyiida gongsii karali ai pung gongsu leponii, gonyiinii ahgo kikii lukai sulo, mak-kii ahgo salam kado pyiisulo.

¹¹Kadapokii ahgo salam kapyii ah teinii ahmah tha kashyii hangtei dou njoile.

¹²Inii gonyii dakii hangka ryii kanyii leikado, Inii larek ninado mukdwi ai jumlak takle, nlenii teitungpii, nyiimah ka-nta ai matwi mashang kabui tiisii Inii gonyiida gong gonyiigo ju kadousii karashii tanglesii Inii maning malumle.

¹³Kalai kalu lungkasyii go taikarhiipei nahmeinii n-go salam pyiileile.