Read Maram Naga MATIMANGOU KAPYII 1 Bible Online

MATIMANGOU KAPYII 1 - Maram Naga bible

MATIMANGOU KAPYII 1

¹Kalangsii pat tang karam sam Saraanii Jisu Krista dakii mati mangou pyiisii mpounii mpouki kaleimei dakii mangoupyii matu tang karam jangpii, mpounii mpoumah sating gamluigo lang magongsii mpouki kaleipii Jon dakii mati pyiile.

²Mpounii Saraamah samtam mah ninado Jisu Kristamah sakchyii mah kaang kito, katunii mpounii ngou- kalu hangmah kaang kito sakchyii pyiitakle.

³Saa mpat kalei sam hang aigo lat patsii kafiimei ninado shiikalu ahnyii, ninado teilung kito ryii kabam hangtei swikalu ahnyii tei sadoi bile, kadapokii tinglang tei natakle.

⁴Jon-nii Asia kito kalei charsh sana dakii: Tingneishang, ndoushang ninado sushang gongtang karam Ah dato, Ahmah sagong bam doito kalei rangii sanamah.

⁵Sateichii malum kabui sakchyii, kataimei kak kito ringkhii karei, sateichii sazyii pouryii hangmah apum tiikalei Jisu Krista dato jumage kapyii ninado kamajung tei gonyiigo kaswipyii matulo. Nyiigo lungsyii kapyii mpoumah zai teipiinii nyiimah kem kito nyiigo laat mpatpyii takle;

⁶sateichii nyiigo sagong sazyii ninado mpoumah Pfii Saraamah bam kiteito kanat kajum Atingmei tiimatu kapyii mpou dakii pumtei kava ninado magongsii kalung tei kalui kaga tei matulo. Amen.

⁷Julo, Mpounii kamong gotei ka- swisii gong leile; sateichii meihangnii, sateichii mpougo nghiipii kahuimei tei haisii mpougo ngoutangle; sateichii sazyii pouryii luihangnii mpou kaang kito kamadak tangle, nle, teitii tangle, Amen.

⁸Tingneishang, ndoushang ninado sushang gongtang karam kadi kathang, Saraa Bangpii teinii tamle, “Karei ninado kana tei Ile.”

⁹Gonyii sanapii ninado Jisutai kaswimei hangninii tiisii gonyiigo kaswisii kamage kalak, ninado sagong sating sazyii ninado lung leh kati mah njai dou njoisii kalei Jon Inii Saraamah samtam ninado Jisunii kamati kamangou tei saa ka-mpat jangpii Patmos-sii kalat dwipii maguisii kalei sazyii kiteikii n-gu kai aitakle.

¹⁰Bangpiimah leimik piinei Inii rangii kito leile sateichii buika kachem takumpii kasagoi rok hangninanii gutailamto ai tam kalei tei Inii shiitakle.

¹¹“Nangnii ngou- kalei hangtei larek kikii ryii wosii Charsh sana dakii, katunii, Ipisa kikii, Smarna kikii, Pergamam kikii, Taiyatira kikii, Sardis kikii, Philadelphiya kikii, ninado Laodisiya kikii teitei matat ailo.”

¹²Sateichii gudakii rashii kalei roktei jutang karam jangpii Inii ngaryii gongkii Inii sona mah thaomi kadungpii sana tei ngoutakle.

¹³Sateichii thaomi kadungpii sana kak kiteito meinah sapfii mpougo karai, njou kathang pi rot katang kai kalei, ninado mpoumah takou kiteikii sona mah haikak kak kalei hangniniigo ngoutakle.

¹⁴Sateichii mpoumah phyiibung nei phyiitaam tei hakabi kounah mah mai takumle mak-kii sabui takumle; mpou mah mik tei mi mishong takumle.

¹⁵Mpoumah pi kouzhii tei rumatei kalei ninado piit matei kalei sanahgyii takumpii malikle, sateichii mpoumah rok teinii kasagoi gamto takmang kalei dwi nrung takumle.

¹⁶Sateichii mpoumah bah ajiilam tei sageiti sana leile, mwi kitei mwi kabi mwina kapung saryiikhang tei pat takle, ninado mpoumah jupa teinii hangkapii vakabi tingna leimik ta- kumle.

¹⁷Inii mpougo ngou wosek-kii kataimei takumpii Inii mpou doito koumang takle. Sateichii mpounii mpou bah ajiilam tei guphyiiryiikii poikai pyiisii tamle, “Hingsulo, karei ninado kana tei Ile,

¹⁸sateichii karing teile. Inii taitakle nlenii julo, aitoinii Inii kalui gasii ring takle sateichii kataimei ninado kataimei- mah sazyii pouryii chabyii tei guda leile.

¹⁹Teijangpii nangnii kangou hangtei, aitoi ninado sushang aitainii pat tang karam hangtei ryiiwolo;

²⁰Gubah ajiilamto nangnii ngou kalu sageiti sana ninado sona mah thaomi kadungpii sanamah kamakum sam teinii: Sageiti sana teinii Charsh sanamah sating gamlui hang teile, sateichii thaomi kadungpii sana teinii charsh sana teile.