Read Maram Naga MATIMANGOU KAPYII 16 Bible Online

MATIMANGOU KAPYII 16 - Maram Naga bible

MATIMANGOU KAPYII 16

¹Sateichii Saraa kamaning kilungto rok kasagoi hang- ninanii sating gamlui sana dateikii aitiisii katam Inii shiitakle, “Tat tulo, Saraanii rakarhii mah kok sana tei sazyii pouryiikii rui mpat ailo.”

²Teito karei sating gamlui teinii tatpatsii ahmah koktei sazyii pouryiikii rui mpat takle; sateichii saramkow mah siiti pungkalei ni- nado ah mah tingtu param go kamata mei hang phyiiryiito ngoukahing ninado katchiijam hang tei pat takle.

³Sateichii hangna kashang sating gamlui teinii ahmah kok tei dwijai lungkii rui mpat takle; sateichii teitei kataimeimah zai takum takle sateichii karing kounah hang, dwijai lungto kalei hangtei taitakle.

⁴Sateichii hangtum kashang sating gamlui teinii ahmah kok tei karyii hang kikii ninado dwipok hang kikii rui mpat takle, sateichii teitei zai ndat takle.

⁵Sateichii dwimah rangii teinii aitiisii katam Inii shiile, “Tingneishang ninado ndoushangto kalei, O kamateipii, nangnii samtak tiikatu ai majyiile.

⁶Kadapokii kamatei ninado lungkakalingmei hangmah zai tei ahnyiinii tii-mpatle, teipiinii zai tei sak matu tang karam jangpii nangnii ahnyiigo pyiitakle. Ahnyiinii doukamajyii tei ahnyiinii dou leile!”

⁷Teito Saraago pyiikatoibam kiteito aitiisii tam kalei rok hangninii Inii shiile, “Bangpii Saraa kadi! Gomah samtak katii hangteinii majyiile ninado kasangle!”

⁸Sateichii madai kashang sating gamlui teinii ahmah kok tei leimik gamkii rui mpat takle; sateichii meihang go ru matu takle,

⁹meihang gotei ngoukahing maga teipii maga takle, sateichii sararahum hang phyiiryiito teimaham kalei Saraa zei gotei sheeng takle sateichii ahnyiinii ahgo pumtei kava pyiitang karam jangpii tam matoimakle.

¹⁰Sateichii mangii kashang sating gamlui teinii ahmah kok tei saramkow mah sagongbam gamkii rui mpat takle; sateichii ahmah sagong sazyii tei myiimatu takle; ninado meihang teinii katchii jangpii ahnyiimah malyii tei makitu takle.

¹¹Sateichii ahnyiinii sating gam mah Saraa gotei ahnyiimah katchii ninado chiilotlot katu jam hang jangteipiinii sheeng takle, sateichii ahnyiinii ahnyiimah tha hang kiteito lungkali makle.

¹²Sateichii siiruk kashang sating gamlui teinii ahmah kok tei Eu- phrates karyii kadi kiteikii rui mpat takle; sateichii leimik kapat lamto kagong sagongmei hang jangpii pwidi tiikada tang karam jangpii teimah dwitei tang matu takle.

¹³Sateichii mwigatpwi mah mwiki teito, saramkow mah mwiki teito kasang kasu lungkakaling meihang mah mwiki teito gownah takum katu matei kasu rangii hangtum kapat tei Inii ngou takle.

¹⁴Ahnyii teinii sung kaga tha hang tiisii kalei sara ka- shyiimah rangiihang teile. Ai rangii hangtum ainii ahnyiihang go Saraa kadimah leimik kadipiinei saryii tiitang karam jangpii poi nkom tang karam jangpii sazyii pouryiimah sagong hangda tatpatle.

¹⁵(“Julo, karagamei takumpii Inii gongtangle! Peimani haisupii makungpii ninado laat kabam tei ngoumatu lak tang karam jangpii peimani kaiwosii, mik raksii kalei ahtei sadoi bile!”)

¹⁶Teito rangii hangteinii sagong- mei hang go tei Hebrumei latpii “Armagedon” sii kalat kiteikii poi nkom wotakle.

¹⁷Sateichii sana kashang sating gamlui teinii ahmah koktei tingkai kikii rui mpat takle; sateichii Saraa kamaningki lungto rok kasagoi hang- ninanii sagongbam kiteito tatpatsii tamle, “Tei shang takle!”

¹⁸Sateichii sating kapeek katu, rok hang, sating katwi koi hang, sateichii meinahnii sazyii pouryii lung katuto ngoulei kasu kadi malyii kachyii tei pat takle, teimah malyii kachyii tei hang- kapiinii dile.

¹⁹Namdi kadi hangtei jaitum tiisii pak takle, sateichii luihang mah namdi hangtei tiimaga aitakle. Saraanii kadi Bebilon gotei maningloi takle, ninado ahmah ngoukahing rakarhiimah joutei ahmah peek kito mpoupeigo joutei sak matutakle.

²⁰Dwipiinii magui kalei sazyii hangtei pakga takle, ninado zang hangtei gatu takle.

²¹Sateichii kadi kasiiti hang, kasiiti hangninii kg rekngiikii kamaswi tei; meinahnii kashii kakhiimah sarara- hum jangpiinii Saraago sheeng kasuta katangtei, sating gamto meihang phyiiryiikii takmang matu takle. Teimah sararahum tei hangkapiinii ngouhingle.