Read Maram Naga MATIMANGOU KAPYII 18 Bible Online

MATIMANGOU KAPYII 18 - Maram Naga bible

MATIMANGOU KAPYII 18

¹Aitaito teimaham kadi kalei kaki sating gamlui hangni- nanii sating gamto kahum tei Inii ngoutakle; sateichii ahmah kava teipii sazyii pouryii hang vatakle.

²Sateichii ahnii rok kasagoipiinii saa mpatle, “Koutakle, koutakle, kadi Bebilon tei! Sateichii aitoinii sara kashyii hangnii sateichii matei kasu rangii hangnii kabamni, ninado matei kasu sateichii ngouka nraang ruinah hangteinii mpoupei dato lunglei takle.

³Kadapokii lui hangnii mpoupeimah matei kasu mareimah jou katei tei sak wotakle, sateichii sazyii pouryii sagong hangnii mpou- peigo kaswisii mashung maha aitakle; sateichii samah kado mazhii kasu kaga mpoupeimah marei majangmah kani kahii teipii sazyii pouryii lilaa katiimei hangnii mahni wotakle.”

⁴“Sateichii sating gamto kaki rok hangninanii aitiisii katam Inii shiile, he gumeihang, gonyiinii mpoupeimah kem tei njai poi njoi kasu tiisii ninado mpoupeimah sararahum mah njai tei dou njoi kasu tiisii mpoupei dateito pat tolo;

⁵kadapokii mpoupei mah kem hangtei sating gam sagoi thakii sagoisii koibam takle, ninado mpoupei mah kakui kama hangtei maning gongloi takle.

⁶Mpoupeinii kapyii takumpii mpoupei godo pyiilo, sateichii mpoupeimah tha taiswisii mpoupeigo njaina tei pyiilo; mpoupeinii ryii nja katu peek kiteikii mpoupei jangpii njaina tiisii katei kasak tei ryii njapyiilo.

⁷Mpoupei roinapii mpoupeigo tam matoi katu ninado hangkapiinii kasamou pyii katu takumpiinii, teiziikii kamoi kamage kalak ninado madaksii magee katu tei mpoupeigo pyiilo. Kadapokii mpoupeinii mpoupei lung kito tamle, ‘sagong nou tiisii Inii bamle, laksimei makle, madaksii magee katu tei Inii ngousang ngoulakle!’

⁸Teijangpiinii tingneikii mpoupeimah sararahum hang, katunii, ra rahum kagong, madaksii magee katu, ninado tak kateeng tei gong tangle, sateichii mpoupeigo mipiinii rutangle; kadapokii mpoupeigo samtak katii Bangpii Saraa teinii dile.”

⁹Sateichii mpoupeigo kaswisii sapwimei sapfiimei kashyii kahong tha tiisii, marei majang tiisii kalei sazyii pouryiimah sagongmei hang teinii mpoupeigo mi ru kaleimah mika tei ngou sekchii, ahnyiinii mpoupei jangpii hat tangle sateichii takou byii tangle;

¹⁰mpoupeimah mage tei ngouhingsii ahnyiinii dhiisii sat tangle ninado tam tangle, “Ngouhingjule, ngouhingjule! Kadi ninado kadi kathang namdi Bebilon, nang! Pungkii kikii gomah samtak katii tei gong takle.”

¹¹Sazyii pouryiimah lilaa katiimei hangniido mpoupei jangpii mageesii hatle, dapodinchii ahnyii- mah pot hangtei mei kaniido lyiipyiiloi sutakle;

¹²mei kaniido ahnyiimah, sona, sanah raguiba, mai kating kuitu, sanahkang, kamajyii peimani, ghangzing katu, kounah maipei, ghang kamajuipei, ninado kai manam kabi tinglyii, sateichii sapung kanyii ninado mai kating ating hang, sanahgyii, sagyii ninado marbalpii katii mahlyiihang,

¹³sateichii tingtchii, gaigi, tiiroutou, myrrh, keirum kabi thao, jou ninado thao, toknui, ninado gihu, twom, jao, takoi, ninado takoi garyii, kikalei- mei, ninado meinah mah karing katangdo lyiipyii sutakle.

¹⁴Lilaa katiimei teinii mpoupeigo tamle, “Nangnii dounyiisii kalei mahlyii hangtei gatakle, ninado gomah kani kahii ninado vakabi tei tat tutakle, sateichii teihang tei nangnii doukailak takle!”

¹⁵Namdi kiteito lilaa tiisii mahni kalumei hangteinii, mpoupei mah mage tei dou njoitu tang karam gotei hingsii, ahnyiinii akak dhiisii sat tangle, ahnyiinii hatsii takou byiisii tam tangle,

¹⁶“Ngouhingjule, ngou- hingjule! kamanoi ghangzing katu ninado ghang kamajui peimani kaikalei, ninado sonapii, mai kating kuitupii, ninado sanakhang hangpiinii natkai mbi kabam namdi kadi tei!

¹⁷Pungkii kikii kani kahii hang ai mpoupeinii maga aitakle!” Sateichii mahlyii apum mei hangnii, mbuitat kaleimei hangnii, ninado malyii hoikaleimei hang ninado dwijai phyiiryii teito malot fii chiisii kaleimei hang teinii akak dhiisii satsanii,

¹⁸mpoupeigo miru kaleimah mika tei ngou wosanii saa mpatle, “Namdi kadi tei kadapeigo njoi takpo?”

¹⁹Sateichii ahnyiinii ahnyii phyii kikii buinei boikaisii, hatsii ninado mageesii tamle, “Ngouhingjule, ngouhingjule! namdi kadi tei! Dwijai phyiiryiito malyii hoikaleimei hangnii mpoupeimah kani kahii teipii mah niwokalu namdi tei mpoupeile! Sateichii pungkii lung kikii mpoupeinii mahlyii hang maga aitakle.”

²⁰Hesating gam, kamateimei, tiilamlwi kapyiimei ninado lungka- kalingmei hang mpoupeigo tiimaga kalei jangpii ntalo! Kadapokii Sa- raanii mpoupei phyiiryiikii gonyiimah samtak tei tiipyii takle!

²¹Teito kadi kathang sating gamlui hangninanii kakaryii kuitu takum katu kadi hangninii poima- tusanii, dwijai lungkii toikaisii tamle, “Aitiisii ngoukahing teimaham patsii Bebilon namdi kadi gotei toi m-mang ai tangle, sateichii nlailoisii dou- loilak takle.

²²Sateichii kitattung nhok katumeimah, meinah mah rok- mah, Levii kakongmeimah, ninado kachem kakongmeimah rok tei godato nlailoisii shiisang shiiloi lak takle. Baichem mara kata hangninii mah baichem kachem mei meigo kado godato ngouloilak takle; sateichii kakaryii kuitumah koi tei godato nlailoisii shiisang shiiloi lakle;

²³thaomimah kava tei godato vasang valoilak takle. Sateichii noutiitang karampii sapfii mpou ninado amyiipei pwimah rok tei godato shiisang shiiloilak takle. Kadapokii gomah lilaa katiimei teinii sazyii pouryiito kadi kathangmei hangle; sateichii kasang kasu gomah ashoi kapoi teipiinii lui hang go chuisii hem wotakle.”

²⁴Sateichii Lungkakalingmei mah, kamateimei mah ninado sazyii pouryiito gikalei matum madum mah zai tei mpoupei dato doutakle.