Read Maram Naga MATIMANGOU KAPYII 19 Bible Online

MATIMANGOU KAPYII 19 - Maram Naga bible

MATIMANGOU KAPYII 19

¹Aitaito sating gamto meimoi- mah rok kasagoi takumpii aitiisii katam Inii shiitakle; “Haleluiyah! Kalei kapyii karing pumtei kava ninado teimaham tei nyii Saraamahle.

²Kadapokii ahmah samtak katii teinii kasangle ninado majyiile; mpoupeimah mashung kamaha tha katii teipii sazyii pouryiigo tiika- maga kadi sahapwipei gotei ahnii samtak tiitakle, sateichii ahmah kikaleimei hangmah zai tei mpoupei phyiiryiikii ahnii kumfii takle.”

³Nlailoisii ahnyiinii saa mpatle, “Haleluiyah! Mpoupeigo rukalei mishong kiteito mika tei kalui gasii sagoitu takle!”

⁴Sateichii katingmei makaisiimadai nkhii sateichii karing kounah madai teinii koumang sanii, sagongbam kito bamkalei Saraa gotei matasii tamle, “Amen; haleluiyah!”

⁵Sateichii sagongbam kiteito rok hangninanii saasii tamle, “He Sa- raamah kikaleimeihang, mpoumah kikaleimei ninado mpoumah mei- hang, kacheng kadihang, nyiimah Saraago tam matoilo.”

⁶Sateichii meimoimah rok takumpiinii, dwi hangkii ninado sating katwimah khoi takumpiinii, aitiisii katam Inii shiitakle, “Haleluiyah! Kadapokii kadi kathang Saraa nyii Bangpiinii magong leile.

⁷Nyiinii nta rangade sateichii Ahgo tam matoide. Kadapokii Jaonah mah myiikapang tinglang tei gong takle, sateichii mpoumah amyiipeipwi teinii mpoupei roinapii tiikada wotakle;

⁸Sateichii manoi kabi, vakabi ninado kamateeng peimani tei kaimatu tang karam jangpii mpoupei dakii pyiitakle,” kadapokii manoi kabi pei teinii kamateimei mah kasang kamajyii tha teile.

⁹Sateichii sating gamlui teinii gudakii tamle, “Ai ai ryii wolo: Jaonah mah myiikapang takbai tei gonghai losii lat kalumei hangtei sadoibile.” Sateichii Ahnii gudakii tamle, “Aihang ai Saraamah kasang samkang hang teile.”

¹⁰Teito Ahgo mata tang karam jangpii Inii ahmah pibang tei kou- mangle, nlenii ahnii gudakii tamle, “Nangnii teitei tiilak tang karamle! Inii n-go njoi katu kikalei ninado Jisumah sakchyii pungsii kalei go kangsanapiile. Saraago matalo.” Ka- dapokii Jisumah sakchyii teinii Saraa sam tam ka-mpatmah rangii teile.

¹¹Teito Sating gam laat kabam tei Inii ngoutakle, sateichii julo, takoi kaha ninado malum kabui ninado kasangsii kalat ahteinii tei phyiiryii tei tong leile, sateichii kasang kamajyii kito ahnii samtak tiileile ninado saryii tiileile.

¹²Ahmah mik teinii mi mishong takumle, sateichii ahphyii gamkii sagong phyiihung hangtei leile. Sateichii ahnii supii mei kakimei hangninii kaniido tikasu ryiikabam zei hangninii leile.

¹³Zaipiinii towkabam peimani tei Ahnii kai leile sateichii Ahzei teinii “Saraamah samkang sii” latle.

¹⁴Sateichii satingmah saryiimei hangteinii manoi kabi, kaha ninado matei kabi peimani tei kaiwosanii takoi kaha gam tongsii Ahtai swileile.

¹⁵Lui hang go mpounii ngam tangle, mwi kabi saryiikhang hangninii tei Ahmah mwi kito pat takle. Ahnii ahnyiigo sagyii tingrang- pii ahnyii phyiiryiito apum tiitangle, sateichii Ahnii Saraa kadimah hangkapii hungsii rakarhiimah darkhati jou kakaryii bamtei pipii kusii paryii tangle.

¹⁶Sateichii Ahmah peijou kathang kiteikii ninado ahmah liikang gam teikii, “Sagong- mei hangmah sagong, ninado Abangmei hangmah Bangpii,” sii ryii kabam zei ai leile.

¹⁷Teito Sating gamlui hangni- nanii leimik kito sat kalei tei Inii ngoutakle, sateichii ahnii sating sumto jungkalei ruinah hang dateikii rok sagoisii saa mpatle, “Gonglo, Saraamah takbai kadi ki teito,

¹⁸gonyiinii sagong meimah kamyii, saryii kito kadimeimah kamyii, kadi kathangmeimah kamyii, takoimah kamyii, ninado teiphyiiryii katong- meimah kamyii, laat kabam meido kikaleimeido kadi kacheng, meihang- mah kamyii chiitang karam jangpii gong ndwilo.”

¹⁹Teito takoigam tongkalei ahgo ninado ahmah saryiimei hang gotei saryii tiitang karam jangpiinii saramkownah ninado sazyii pouryii- mah sagongmei hang teinii ahnyiimah saryiimeihang gotei kaswisii ndwi katu tei Inii ngoutakle.

²⁰Saram- kownah ninado ah doito siiti hang tiimangou sanii saramkownah mah siiti doukalumeigo ninado teimah tingtu paramgo mata katumeihang go kasang kasu teipii chuisii hem kalu, ahgo kaswi kalei kasang kasu lungkakalingmei gotei jum wotakle. Ai hangna aigo sulphur piinii song- kalei mimah jailungkii maringpii toikai aitakle.

²¹Sateichii mashak kalei kakimei hang gotei takoi gam bam kalei, ahmah mwi kito pat katu saryiikhang teipiinii tatrang aitakle; sateichii ahnyiimah kamyii teipiinii ruinah hangtei moi maghii takle.