Read Maram Naga MATIMANGOU KAPYII 2 Bible Online

MATIMANGOU KAPYII 2 - Maram Naga bible

MATIMANGOU KAPYII 2

¹“Ipisa kito kalei charsh mah rangii dakii ryiilo: bah ajiilamkii sageiti sana poikalei, sona mah thaomi kadungpii sana kak kito tatpat tatliitsii kalei Ah teinii sam hang ai tam leile!

²Gomah tha, katii kapung, lung leh kati ninado kashyii kahongmeigo nangnii lung lehpei lakle katu ninado mpouroinapii mpougo tiilamlwi kapyiimeisii kalat, nlenii kasang kasumei hang go jai jusii ahnyiimah kachui nangnii doutakle katu Inii tile.

³Nangnii lung lehsii bamle, sateichii guzei jangpiinii lehsii bamle sateichii nangnii matoupyii aimakle katu Inii tile.

⁴Nlenii go phyiiryiito mazhii kasu gumah sam ai leile; katunii nangnii gomah kareiki lungkasyii tei rat toi aitakle.

⁵Teijangpii nangnii kada kito kou aitakpo katu maning gonglo, sateichii golung kalisii kareiki nangnii katii tha tei tiilo; nangnii lungkali suleponii, Inii goda gongsii gomah thaomi kadungpii tei mpoumah bam kiteito poitoi aitangle.

⁶Nlenii gomah ai leile, katunii, Inii ngoukarou Nikolaiten meimah tha tai nangniido ngou karangle!

⁷“Rangiinii Charsh dakii tam kalei tai khoi pungkalei meihang teinii shiimatulo, ngam kalu ah dakii Saraamah Paradais kito kalei karingmah ruibang kiteito chii matu- tang karam jangpii Inii pyiitangle.’

⁸“Smarna charshmah rangii dakii ryiilo: katai kito ringkhii kalu karei ninado kana, Ah teinii sam hang ai tam leile.

⁹“‘Gonyiimah kamage kalak ninado kaga tei Inii tile — Nlenii gonyiinii kasangpii mah nile! Satei- chii Jehudimei kasangsupii, ahnyii roinapiinii ahnyii Jehudimei lesii tamsii kalei, Seitanmah abemei tiisii kaleimei teinii gonyii phyiiryiikii samlat kashyii tam kalei tei Inii tile.

¹⁰Gonyiinii doutang karam kamage kalak gotei hingsulo. Julo, gonyiigo jai jutang karam jangpii seitannii gonyii kangkagonii kabang kikii toikai tangle, sateichii gonyiinii leimik kearii kamage kalak tei doutangle. Gonyiinii katai katang tei malum kabuimei tiilo, sateichii Inii gonyii dakii karingmah phyiihung tei pyiitangle.

¹¹“Rangiinii Charsh dakii tam kalei tei khoi pung kaleimei hangnii shiimatulo. Ngam kalumei hang gotei hangna kashang katai teinii kadeng tei gatangle.

¹²“Pergamam Charshmah rangii dakii ryiilo! Mwi mwina kapung mwi kabi saryiikhang kalei Ah teinii sam hang ai tam leile.

¹³Nangnii lungkalei bam tei Inii tile, teikito seitanmah sagongbam leile, Sei- tannii lungkalei bamni teito, malum kabui gumah sakchyii, Antipasgo kagi tinglang kikak katangdo, gonyiinii gu zeigo kamalum tei toi aimakle sateichii gonyiinii gudato kasangle.

¹⁴Nlenii go phyiiryiikii Inii mazhii karou chengniikii leile: gonyii kak kito mei kangkii Balam mah karali taiswisii, tingtu paramgo pyiitoi kalei chiitak tei ahnyiinii chiimatu tang karam jangpii sateichii sapwimei sapfiimei kashyii kahong tha tiimatu tang karam jangpii Isrelmeinah doikii sadoi kashyii ai kai matutang karam jangpii Balakgo ralipyii takle.

¹⁵Tei takumpiinii Nikolaitenmei mah ralikapyii taiswi kalei mei gonyii kak kito leile.

¹⁶Teipiinii lung kali wolo, suleponii, Inii kalangsii gonyiida gongtangle, sateichii gu mwi kito pat kalei saryiikhang teipiinii ahnyiigo saryii tiitangle.

¹⁷“Rangiinii Charsh hang dakii tam kalei tei khoi pung kalei mei- hangnii shiimatulo. Ngam kalu ah dakii Inii kamakum manna tai pyiit- angle sateichii kuitu kaha hangninii ninado kuitu phyiiryiikii ryiikabam kasatai zei hangninii tei Inii ahdakii pyiitangle, teitei doukalu ah teisu- piinii mei kaniido zei tei timakle.’

¹⁸“Sateichii Thyatira kito kalei Charshmah rangii dakii ryiilo: mi mishong takum katu mik kapung ninado piitmatei kalei kamaleek sa- nahgyii takumpii vakalei pi kouzhii kapung, Saraa nah sapfii mpou teinii sam hang ai tam leile.

¹⁹Gomah tha, gomah lungkasyii, gomah kamalum, gomah nga kanga ninado gomah lung leh kati tei sateichii gomah kana tha teinii kareiki sung kile katu Inii tile.

²⁰Nlenii go phyiiryiikii Inii mazhii karou aile, katunii, Mpouroinapiinii lungkaklingpeisii kalat sapwi mpei Jezabelgo nangnii mazhii wotakle, sateichii mpoupeinii goki kaleimeigo sapwimei sapfiimei kashyii kahong tha tiimatutang karam jangpii sateichii tingtu param dakii karat toi kalei kachiipot gotei chiimatu tang karam jangpii kasang kasu tamsii hem wole.

²¹Sateichii mpoupeinii lungkali matutang karam jangpii Inii mpoupei dakii tinglang pyiitakle, nlenii mpoupeinii sapwimei sapfii- mei kashyii kahong tha katii kiteito mpoupeinii lung kalinyii makle.

²²Julo, ahnyiinii mpoupeigo kaswisii kashyii tha tiikabam hang kiteito lung kali kasuta, mpoupeigo katchii zyiigamkii toikai tangle, sateichii mpoupeigo kaswisii masung kamaha tha katiimeigo kadi kamage kiteikii Inii toikai tangle;

²³Sateichii Inii mpoupeimah nahmei hang gotei gitangle, sateichii lungswi ninado lung hang go fii ka-mpat ahtei Ile katu Charsh hangnii tigong tangle, sateichii gonyiimei nsang nsang dakii gonyii mah tha taiswisii doukamajyii tei Inii pyiitangle.

²⁴“Nlenii Thyatira kito mashaksii kalei, ralikapyii aigo poikasu seitanmah kamakum sam tikasumei gonyii dakii Inii tam leile, Inii gonyii phyiiryiikii kamaswi kaki hangninii kado kaipyii lakle.

²⁵Nlenii gonyiinii doukalu tei Inii gong kasuta tiigatpii sangtingsii jum wolo.

²⁶Sateichii ngam kalu ninado kalui katang gumah tha hang ryiisii kalei ah dateikii Inii luihang phyiiryiito teimaham pyiitangle;

²⁷sateichii rangrhiili karakimeinii pakchet chet kalei takumpii, Iniido gu pfii dato doukalu takumpii, ahnii ahnyiigo sagyiimah tingrangpii apum tiitangle;

²⁸sateichii Inii mah dakii tingchoi mah sageiti tei pyiitangle.

²⁹“Rangiinii charsh hang dakii tam kalei tei khoi pung kaleimei hangnii shiimatulo.