Read Maram Naga MATIMANGOU KAPYII 7 Bible Online

MATIMANGOU KAPYII 7 - Maram Naga bible

MATIMANGOU KAPYII 7

¹Aitaito sazyii pouryiito dwijai kito mak-kii ruibang hang phyiiryiito tingkai teinii mah kado gwimatu kasu tiisii, sating gamlui madainii sazyii pouryii ska madaito satsii sazyii pouryiimah tingkai tei jum kaleiloisii kalei tei Inii ngoutakle.

²Teito karing Saraamah seal poikalei sating gamlui kaki hangninanii leimik kapat lamto tat kapi tei Inii ngoutakle. Sateichii sazyii pouryiigo ninado dwijaigo tiimashyii matutang karam jangpii teimaham pyiikabam sating gamlui madai dateikii rok sagoisii sating gamlui teinii saasii tamle.

³“Nyiinii nyiimah Saraamah kikaleimei hang go saiphang gamkii seal kai kasuta sazyii pouryiigo, dwijai go, sateichii ruibang hang go tiimashyii aisulo.”

⁴Sateichii seal nam kabam mei kamoi tei Inii shiitakle, Isrelmeinah mah sadung hang kito seal nam kabam (Lakh hangninii tang rekdaisii madai nkhiile) 144000.

⁵Judahmah sadung kito thang keariisii nakhiigo seal nam takle, Reuben mah sadung kito, tang keariisiinakhiigo, Gad mah sadung kito thang keariisiinakhiigo.

⁶Ashermah sadung kito tang kea- riisii nakhiigo, Neptalimah sadung kito tang keariisii nakhiigo, Mana- shal mah sadung kito tang keariisii nakhiigo,

⁷Simion mah sadung kito tang keariisii nakhiigo, Levimah sadung kito tang keariisii nakhiigo, Isakkar mah sadung kito tang keariisii nakhiigo,

⁸Zebulun mah sadung kito thang keariisii nakhiigo, Joseph mah sadung kito tang keariisii nakhiigo, Benjamin mah sadung kito tang keariisii nakhiigo seal nam aitakle.

⁹Aitaito Inii ngoutakle, sateichii julo, mei kaniido meiphyii fiipei kalak, lui hang kito sadung, mei, ninado lat hang kito paijou kathang kaha nat kai kalei sateichii bah hang kiteikii kananhii poi kalei meimoi moisang sagongbam ninado Jaonah dateito satsii,

¹⁰rok sagoisii saa mpatle, “Keikapyii karing teinii sagongbam gamto bam kalei nyiimah Saraa ninado Jaonah dateitole!”

¹¹Sateichii sating gamlui hang teinii sagongbam ninado katingmei ninado karing kounah madai gotei sat ma- guibang wotakle, sateichii ahnyiinii sagongbam doiteito makumpii koumang Saraago matasii tamle.

¹²“Amen! Sadoi kabi, pumtei kava, swirek kabi, tam kamatoi, sadzyii ngariit katii, teimaham ninado kalui gasii katei kamaham tei nyii Bangpii dakii matulo, Amen.”

¹³Sateichii katingmei kak kiteito mei hangninanii gudato n-nhiile, “Paijou kathang kaha kai kaleimei hang ai tapo? Sateichii ahnyii tei kada kito gongpo?”

¹⁴Inii mpou dakii tamle, “Oja, nangnii tile,” sateichii mpounii gudakii tamle, “Ahnyii hang teinii kamage kalak kadi kiteito pat kalumei teile, sateichii ahnyiimah paijou kathang tei shyii mateisii jaonah mah zai kito tiimaha aitakle.

¹⁵Teijangpii ahnyiinii Saraamah sagongbam doiteito leile, ninado ahnyiinii tinghum tingna mpoumah kamatei kiteito mpougo nga ngasii bamle. Sateichii sagongbam gamto bam kalei ahteinii mpoumah taksupii haikalei teipiinii ahnyiigo dangpyii tangle.

¹⁶Ahnyii teinii nlailoisii moi mazyii lakle, nlailoisii saryiilakle sateichii ahnyii phyiiryii teikii leimik ninado mi kamagaa kata hangninii kaniido rulakle.

¹⁷Kadapokii sagong- bam sum taito kalei Jaonah tainii ahnyiimah Jaokakoipii tiitangle, sateichii karing dwipokni katang tei ahnii chyiimang pyiitangle, sateichii ahnyiimah mik kiteito mikdwi hangtei Saraanii piit toipyii tangle.”