Read Maram Naga MATIMANGOU KAPYII 8 Bible Online

MATIMANGOU KAPYII 8 - Maram Naga bible

MATIMANGOU KAPYII 8

¹Jaonah teinii sana kashang seal tei kalaat tinglang kak pung aphang kakum sating gam tei malhiisupii bam takle.

²Teito Saraa doito sat kalei sating gamlui sana ninado ahnyii dakii kachem sana pyii katu tei Inii ngoutakle.

³Sateichii sona mah tiiroutou poikalei sating gamlui kaki hang- ninanii gongsii pyiitoi tang karam bam kiteito sat takle, teito ahnii sagongbam doiteito kalei sonapii katii pyiitoi tang karam bam phyii- ryiito kamateimei hangmah kariita gotei kai mpam matutang jangpii ah dakii tiiroutou hangkii pyiibam takle.

⁴Sateichii sating gamluimah bah kiteito rukalei tiiroutou mah mika teinii kamatei meimah kariita gotei kaswisii Saraa doi pitu takle.

⁵Teito sating gamlui teinii tiiroutou karubung tei poitakle, sateichii ahnii teitei pyiikatoimah mi teipiinii kaitokryii wosii sazyiikii rat toi aitakle, sateichii sating katwi, rok hang, sating kapeek liklik katu ninado malyii kachyii tei pat takle.

⁶Teito kachem sana poikalei sating gamlui sana teinii kachem tei kongtang karam jangpii tiikada wotakle.

⁷Sating gamlui karei teinii ahmah kachem tei kongtakle, teito siiti ninado mi, zaigo ryii njasii sazyiikii rui m-mangtakle. Sateichii sazyii pouryii njai hangtum kito njai hangninii tei sungtoi aitakle, ruibang hang njai hangtum kito njai hangninii, sateichii sagei hiinhii kamadek hangtei sungtoi aitakle.

⁸Teito hangna kashang sating gamlui teinii ahmah kachem tei kongtakle, minii sungkalei zang kadi hangninii takumpii mah hangninii dwijai kikii toikai aitakle; sateichii dwijaimah njai hangtum kito njai hangninii tei zai ndat wotakle;

⁹Sateichii dwijai kito kalei karing kounah hangmah njai hangtum kito njai hangninii taitakle, sateichii malyii garyii hang mah njai hangtum kito njai hangninii tei tiimaga aitakle.

¹⁰Sateichii hangtum kashang sating gamlui teinii ahmah kachem tei kong takle, sateichii mi machii takumpii mi songkalei sageiti kadi hangninii sating gamto takmang- sanii karyii hangmah njai hangninii phyiiryii ninado dwimah dwipok hang phyiiryii takmang takle.

¹¹Sageiti zei tei “Kakha” sii latle, dwi njai hangtum kito njai hangninii tei kha takle; meihangkii dwi tei sak wosii taitakle; Kadapokii dwi tei kakaa ndat takle.

¹²Teito madai kashang sating gamlui teinii ahmah kachem kongtakle, sateichii leimikmah njai hangtum kito njai hangninii sakhiimah njai hangtum kito njai hangninii, sateichii sageiti hangmah njai hangtum kito njai hangninii, myii matutang karam jangpii, sateichii tingnamah njai hangtum kito njai hangninii, tinghum mahdo teitakumpiinii vamatulak tang ka- ram jangpii, leimikmah, sakhiimah ninado sageiti hangmah njai hangtum kito njai hangninii kakhii aitakle.

¹³Teito Inii jule, sateichii sating sumteito jung kalei kalaang ruinah hangninanii rok sagoisii katam tei Inii shiitakle; “Kongtang karam sating gamlui kaki hangtum mah kachem hang jangteipii sazyii pouryiito lung kalei hang jangpiinii kamagele, kamagele, kamagele!”