Read Maru APAN AQAO: 1 Bible Online

APAN AQAO: 1 - Maru bible

APAN AQAO: 1

¹Sao qhid' maqhid mae mug: kin re Mao"So phan" ra" au:-

²Myid gaung wa akhyao mabo lo: pyad' lad sade: akeim ngad: jo; ra". Yo" lhau: qin" ra" panglai: qid: yang ja: khao: ngo" re nghoe' to: mung: no, sang: kyid cad' jo; ra". Amung: Mao"So: qam: so' wa qid dao mae qui" du" lhau: ra".

³Ailao" Mao"So wa bo" bao jo; li" shao:- ga: amyin" byid' ra". Amung: bo" bao thug' li" ra".

⁴Mao"So wa aire qu" ngaui: ra". Ai: thao yao: wa bo" bao re mug: cad' mae" kho' yu yang:-

⁵Yao: wa ai: bo" bao re Na" ga: mhang" byid: mung: ai: mug: cad' re Myi" ga: mhang" ra". Myi" thao wa lai: lo" byaug mung: ne, seim joe" lo: ra". Aiwa sao qhid' ba ngad: ra".

⁶Ai: thao Mao"So wa qid re kho' mung:- aire jo, qo shid' lam: mae gatau tau zam" to: nae" qhid' mae" mug: lhaung" boe" li" shao: ga: amyin" byid' ra". Ailao" airu: boe" li" ra". Airumung: Mao"So wa mug: lhaung" re kad' mung: ai: qid re mug: lhaung" atho' khyo we' akhug khyo kho' pye' ra".

⁸Yao: wa ai: mug: lhaung" re Mug: Gaung ga: mhang" byid' ra".Myi" thao wa lai: lo" mung: ne, seim joe" lo: ra". Aiwa shid' ba: ba ngad: ra".

⁹Ai: thao Mao"So wa taung myid thug' li" nae" qhid' mae" mug:gaung gyid' mae jo; ra" qid jham: jo, qo dalam: mae za: zhang: lo geri: ga: amyin" byid' ra". Ailao" airu: boe" lo: ra".

¹⁰Yao: wa ai: taung myid re Myid Gaung ga: mhang" byid' ra". Ai: zhang: jo; ra" qid re Pang:Lai: ga: mhang" byid' ra". Mao"So wa aire qu" ngaui: ra".

¹¹Ai: thao yao: wa myid gaung wa gaug zo ashi: zaui" ru we' sag' shi: voshi: zaui" ra" agae ja: khao: ngo" alhab' re yaug: thug' li" nhao shao:- ga: amyin" byid' ra". Ailao"- airu: boe" lo: ra".

¹²Airumung: myid gaung wa agae aja: ja: alhab' re yaug: thug' li" nhao: ra". Mao"So wa aire qu" ngaui: ra".

¹³Myi" thao wa lai: lo" mung: ne, seim joe" lo: ra". Aiwa sam ba: ba ngad: ra".

¹⁴Ai: thao Mao"So wa Myi" we' Na" kho' mung: ba na- zin ve; re qhu" byid: nae" we' goe; pa" thung" poe jham ba: kad' nae" qhid' mae" mug:gaung mae" bo" bao thug' li" geshao:- ga: amyin" byid' ra". Yao: bam wa myid gaung re bo" bao zho byid: nae" qhid' mae" mug:gaung mae bao: zho: jo; li" genae". Ailao" airu: boe" lo: ra".

¹⁶Airumung: Mao"So wa bo" bao qi: shid' lam: re kad' ra". Ba wa na" gaung re eib mung: lho" wa myi" re eib nhao: ra". Yao: wa kyi jham rere: kad' ra".

¹⁷Yao: wa myid gaung bao zho byid: nae" re: myi" we' na" re eib nae" qhid' mae" re: bo" bao we' mug: cad' re kho' nae" qhid' mae" re: mug:gaung mae bo" bao jham re te' to: byid' ra". Mao"So wa aire qu" ngaui: ra".

¹⁹Myi" thao wa lai: lo" mung: ne, seim joe" lo: ra". Aiwa byid ba: ba ngad: ra".

²⁰Ai: thao Mao"So wa qid khug mae daui: na: ra" ja: myo: sho' ja: byang" li" vashao:. Amung: mug: le; mae ngho' cao jab byang" li" vashao: ga: amyin" byid' ra".

²¹Airumung: Mao"So wa panglai: mae na: ra" gug'nyhug' qi: jham we' qid khug mae na: ra" gug'nyhug' ja: cao jab alhab' re phan" mung: ngho' ja: cao jab re phan" ra". Mao"So wa aire qu" ngaui: ra".

²²Yao: wa aijham alhab' re shaman" byid' ra" amung: yao: wa qid khug mae daui: na: ra" ja: cao jab re anau" khau mung:- panglai: re byang" li" nhao nae" we' ngho' jham re myo" laug: li" nhao nae" ta" ra".

²³Myi" thao wa lai: lo" mung: ne, seim joe" lo: ra". Aiwa ngo" ba: ba ngad: ra".

²⁴Ai: thao Mao"So wa- myid gaung yham mae myhung: ra" gug'nyhug' mae" gug'nyhug' lae" aqi: angai gug'nyhug' ja: cao jhab alhab' re myhung: thug' ke' vashao: ga: amyin" byid' ra".

²⁵Airu: Mao"So wa yao: bam alhab' re kad' ra". Amung: yao: wa aire qu" ngaui: ra".

²⁶Ai: thao Mao"So wa Ana" ngonhaung" wa xao su byu re kad' gelang:- yao: bam wa ngonhaung" we' dakhyo: khyao dau mo, ngad: li" genae". Yao: bam wa ngo:- ngho' jham gug'nyhug' jham alhab' gug'nyhug' mai"- gug'nyhug' lae" aqi: angai jham: dao mae eib nae" kheim: so' qo" li" genae".

²⁷Airumung: Mao"So wa yao: yao" gaung we' dau sho' tau" mung: xao su byu re phan" ra". Yao: wa yauggai we' myiqe: re phan" ra".

²⁸Yao: shid' tao re shaman" byid: mung:- ni" shid' tao: nho: myid:zo: qe wa myid gaung geim" mae na: byang" li" mung: alhab' re yao: bam eib zo: geshao: myid:zo: myo: sho' khau ge,- ga: ta" ra".

²⁹Ngo wa ni" shid' tao zo: nae" qhid' mae" gaug zo ashi: ja: cao jab we' sag' shi: voshi: ja: cao jab byid' to: va".

³⁰Ngadqere: gug'nyhug' lae" alhab' we' ngho' jham alhab' qhid' mae" zo:ve wa mhin: zo: we' avho' de; ra" agae jham re ngo byid' to: va". Ailao" airu: boe" lo: ra".

³¹Mao"So wa yao: kad' to" ru ja: khao: ngo" re qu" ke' re yao: wa gyai qu" ngaui: ra". Myi" thao wa lai: lo" mung: ne, seim joe" lo: ra". Airu wa khyaug' ba: ba ngad: ra".