Read Maru APAN AQAO: 11 Bible Online

APAN AQAO: 11 - Maru bible

APAN AQAO: 11

¹Sao qhid' re mug: myid geim" mae" byu qe wa myan" daja: za: jhau mung:- dao: re: daja: za: ci: ako".

²Yao: bam wa ba thug' shad' khyo du" lae" ye: zo" re Babelon mung" mae" pa: din" khyo joe" ye: mung: aimae yete" na: ako".

³Yao: bam wa lo geri: zhogam: kad' mung: qao sho' phad' gelang: ga: yao: cao: jho" ta" ako: Airumung: yao: bam wa zao nae" qhid' mae" zhogam: jham we' aijham re zaui" zham: to: nae" qhid' mae" nhai: daja: re qo" yu: ako".

⁴Yao: bam wa ngonhaung" yao" mang qo" nae" we' myid gaung byang" sho' mabyo: sin" lo" nae" qhid' mae" mug:gaung myhi: ra" gyebyu zaung bo: ra" vogaung: mo" dalam: zao: to' gelang: ga: ta" ako".

⁵Ailao" ASANG wa ai: byu qere zao: to" ra" gyebyu zaung re we' vogaung: mo" re qu" nae" qhid' mae" gyo" li" ra".

⁶Amung: yao: wa ana" cebam damyu" za: ngad mung: yao: bam myan" daja: za: jhau: ako". Ceru wa yao: bam kad' genae" ra" mau" aqhid shi" ngad: ra". Dazab lao" yao: bam o: ra" ja: pe" rere: yao: bam qo" kad' li" genae".

⁷Ngonhaung" wa gyo" ye: mung: yao: bam yao: cao: majho" ba: gyo: genae" qhid' mae" yao: bam: myan" re lhau: lhag' pye' byid: gelang:- ga: ta" ra".

⁸Airumung: ASANG wa yao: bam re mug: myid geim" khyo byo: sin" lo" nhao mung: yao: bam wa ai: vogaung: mo" zao: ra" mau" re thang: pye' ako".

⁹Ai: vogaung: mo" wa Babelon ga: mhang" ru ngad: ra"- pe"mung:ga"re ai: mae ASANG wa byu alhab' mo, re myan" lhau: lhag' pye' byid: yang: ngad: ra". Ai: tau mae" yao: wa myid gaung: geim" khyo yao: bam re byo: sin" lo" nhao: ra".

¹⁰Cebam wa Shem nho: myid:zo: qe ngad: ako". Daqid shi: thao shid' zin kyo thao Shem apyad 100 zin ngad lao" yauggai zo: Arpakshad re myhung: ra".

¹¹Ai: thao yao: wa 500 zin daui: na mung: gatau yauggai zo: myiqe: zo: qere: myhung: ra".

¹²Arpakshad wa apyad 35 zin ngad lao" yauggai zo: Shela re myhung: ra".

¹³Ai: thao yao: wa 403 zin daui: na mung: gatau yauggai zo: myiqe: zo: qere myhung: ra".

¹⁴Shela wa apyad 30 zin ngad lao" yauggai zo: Eber re myhung: ra".

¹⁵Ai: thao yao: wa 403 zin daui: na: mung: gatau yauggai zo: myiqe: zo: qere myhung: ra".

¹⁶Eber wa apyad 34 zin ngad lao" yauggai zo: Peleg re myhung: ra".

¹⁷Ai: thao yao: wa 430 zin daui: na mung: gatau yauggai zo: myiqe: zo: qere myhung: ra".

¹⁸Peleg wa apyad 30 zin ngad lao" yauggai zo: Reu re myhung: ra".

¹⁹Ai: thao yao: wa 209 zin daui: na mung: gatau yauggai zo: myiqe: zo: qere myhung: ra".

²⁰Reu wa apyad 32 zin ngad lao" yauggai zo: Serug re myhung: ra".

²¹Ai: thao yao: wa 207 zin daui: na mung: gatau yauggai zo: myiqe: zo: qere myhung: ra".

²²Serug wa apyad 30 zin ngad lao" yauggai zo: Naho re myhung: ra".

²³Ai: thao yao: wa 200 zin daui: na mung: gatau yauggai zo: myiqe: zo: qere myhung: ra".

²⁴Naho wa apyad 29 zin ngad lao" yauggai zo: Tera re myhung: ra".

²⁵Ai: thao yao: wa 119 zin daui: na mung: gatau yauggai zo: myiqe: zo: qere myhung: ra".

²⁶Tera wa apyad 70 zin ngad thao yao: wa Abram- Naho- Haran tao ho' nho: yao: pho" boe" lo: ra".

²⁷Cebam wa Abram- Naho- Haran tao ho' yao: pho" Tera nho: myid:zo: qe ngad: ako". Haran wa Lod nho: yao: pho" ngad: ra".

²⁸Haran wa yao: pho" daui: na shi" au:- Babelon mung" mae" yao" co' nyhab' vogaung: Ura mae shid: lo" ra".

²⁹Abram wa Sarai re lo, xo' yu: ra". Naho wa Isakha nho: yao: pho" Haran nho: myiqe: zo: Milkha re lo, xo' yu: ra".

³⁰Sarai wa zo: dau makhau ngad: ra".

³¹Tera wa Yao: zo: Abram- Haran nho: yauggai zo: ngad: ra" yao: myid: Lod- Abram nho: yham sang myhi"- yao" dau mo" Sarai bam re yao: we' daga" jhui: mung: Babelon mung" Ura vogaung: re to: co' mung: Khanan mung" khyo ye" lo" ra". Yao: bam wa- Haran khyo joe" sho' ye: mung: ai: mae yena: ako".

³²Tera wa apyad 205 zin re shid: lo" ra".