Read Maru APAN AQAO: 12 Bible Online

APAN AQAO: 12 - Maru bible

APAN AQAO: 12

¹ASANG wa Abram re ni" mug:- ni" ba nam- ni" pho" yham re to: co' mung: ngo nao re qhu" byid: nae" ra" mung" khyo ye" lo" wa,-

²Ngo wa nao re myid:zo: myo: sho' byid: nae"- amung: yao: bam wa qi" qhang: ra" byumyu" damyu" boe" li" genae". Ngo wa nao re shaman" byid: mung: ni" mang re lahau: qi: nhao nae"- Airumung: nao wa shaman" jeju gaung boe" li" nae".

³Ngo wa nao re shaman" byid' ra" mo, re shaman" byid: nae". Nao re nhang" ra" mo, re kam" wa ngo nhang: nae"- ga: ta" ra". Nao khyo" yang ngo wa byumyu" alhab' re shaman" byid: nae"- ga: ta" ra".

⁴Abram wa nhad' xe ngo" zin ngad lao" yao: wa Haran mae" thug' lo" mung: ASANG yao: re ta" to" ru we' dakhyo: kad' ra". Lod wa yao: we' daga" cao" ye" lo" ra".

⁵Abram wa yao" yham sang myhi" Sarai nho:- yao: zo nhaung: Lod re jhui: mung: Haran mae qo" ra" jeim qe jo,nho" alhab' we' yao: bam wa Khanan mung" khyo to" lo" ako". Yao: bam Khanan mae joe" ye: gelao".

⁶Abram wa Shekhem mae" Gyang" lho" jo, qo ngad: ra" More ga" ra" jo, qo mae" gyang" lho" sag' gae khyo joe" ye: sho' Khanan mung" geim" jao: sho' su" qin" ra". (Ai: ayo, joe" sho' Khanan byu qe wa ai: mung" mae na: ako".

⁷ASANG wa Abram re na: qhu" mung: ce: mung"dan: wa ngo ni" myid:zo: qere byid: nae" mung"dan: ngad: ra"- ga: yao: re ta" ra". Ailao" Abram wa aitau mae yao: re na: qhu" ra" ASANG: qhid' mae" phan dalam: kad' ra".

⁸Ai: thao yao: wa Bethela vogaung" nho: ba thug' shad' mae" jo, ra" bam mug: mug: thao shad' khyo qui" ye" lo" ra". Yao" jamu re ba vao shad' Bethela ba thug' shad' Ai: vogaung: agyo: mae kad' ra". Aitau mae re: yao: wa phan dalam: kad' yang: ASANG re caung:pa" byid' ra".

⁹Ai: thao yao: wa jo, qo dalam: mae" dalam: khyo qui" lhau mung: Khanan mung" mug: thao shad' khyo ye" lo" ra".

¹⁰Ai: ayo, mae Khanan mung" mae bao" khug' khug' li" mung: bao" khug' saung" no; ruyang Abram wa mug: thao shad' Egutu khyo ye: mung: aitau mae dayo, zo: yena: ra".

¹¹Yao: wa Egutu mung" khyo mug: kyo: re lai: ye: nae" ngad lao"- yao" yham sang myhi" Sarai re- nao wa yaung" ra" myiqe: dayaug ngad: ra".

¹²Egutu byu qe nao re myao gelao" yao: bam wa nao re nga" yham sang myhi" ngad: ga: jho: li" genae". Ailao" yao: bam wa ngore se' pye' mung: nao re wa nha: to" li" genae".

¹³Airumung: nao wa nga" nhaung: ngad: ein: yao: bam re ta" wa,- airulao" ni" mathao mae yao: bam wa ngore daui: na nhao mung: ngore nyang" za: kad' li" genae"- ga: ta" ra".

¹⁴Yao: wa Egutu mung" shad' mug: kyo: re lai: ye: lao" Egutu byu qe wa yao" yham sang myhi" yaung" qo re lham: myao: ako".

¹⁵Kho:kham kho" mae" zug: daqhae: wa Sarai re myao mung:- yao: khoqhi" yaung" ra" khyo re kho:kham pho" re ta" kyo" ako". Airumung: Sarai re yao" kho:kham kho" khyo jhui" yu: ra".

¹⁶Yao" mathao mae kho:kham pho" wa Abram re nyang" za: kad' mung:- yao- cad' be,- nung:- loze kyaung" jham we' jeim qe- gola:u jham yao: re byid' ra".

¹⁷Ngadqere: kho:kham pho" Sarai re ngho" ra" mathao mae ASANG wa qu" gyaug qu" lhaung sho' ra" no aqam" yao" dao mae we' yao" kho:kham kho" mae na: ra" byu qe: dao khyo nhao: ke' ra".

¹⁸Ailao" kho:kham pho" wa Abram re khai: yu mung: nao ngore pe" kad' i? Yao: ni" yham sang myhi" ngad: rure ngore pe"mung: mata" kyo: i?

¹⁹Yao: wa ni" nhaung: ngad: ein: nao pe"mung: ta" i? Yao: re nga" yham sang myhi" khyo" ngore pe"mung: ngho" nhao: i? Ni" yham sang myhi" cemae ngad: ra". Yao: re jhui" yu mung: thug' lo" wa,- ga: ta" ra".

²⁰Kho:kham pho" wa yao" byu qere amyin" khyo" ke' ra". Airumung: yao: bam wa Abram re khai: yu mung:- yao" yham sang myhi" we' yao: sang: ra" gu: alhab' we' daga" mung"dan: mae" nhao: thug' ke' ako".