Read Maru APAN AQAO: 13 Bible Online

APAN AQAO: 13 - Maru bible

APAN AQAO: 13

¹Abram wa Egutu mung" Mug: am: shad' mae" Khanan mung" mug: thao shad' khyo yao" yham sang myhi" we' yao: sang: ra" gu: alhab' re jhui: yang: thug' lo" ra". Lod wa yao: we' daga" cao" ye" ra".

²Abram wa yao- cad' be,- nung: jham we' ngaui we' qhang gyai qo" yaug ngad: ra".

³Ai: thao yao: wa ai: jo, qo re to: co' mung: jo, qo dalam: mae" dalam: qui" ye: yang: qhid' phyao: yao: jamu kad' thang: na yang: phan kad' qu" ra" Bethela we' Ai vogaung: agyo: mae" jo, qo khyo joe" ye" ra". Aitau mae yao: wa ASANG re caung:pa" ra".

⁵Lod re: yao" ug' khug' dinkhu: we' jeim qe- yao- cad' be,- nung: jham qo" ra".

⁶Airumung: ai: jo, qo mae yao: shid' pha: daga" na nae" qhid' mae" mhin: gyo, jao: malaug ngad: ra". Pe"mung:ga"re yao: shid' pha: wa gug'nyhug' myo: sho' qo" geyang: ngad: ra".

⁷Aimung: Abram nho: gug'nyhug' zam: mo, we' Lod nho: gug'nyhug' zam: mo; agyo: mae myan" myo" thug' li" ra". (Ai: ayo, mae Khanan byu qe we' Perizi byu qe wa ai: mung" mae na: jo; ashiko".)

⁸Ailao" Abram wa Lod re Nga" shid' pha: wa ba nam sang: cao: ngad: ra". Ni" byu qe we' nga" byu qe jho" myan" myo: nae" madau maang ngad: ra".

⁹Airumung: jho" gao: lang: se, nao o: ra" mug: myid re khyin: yu wa,- nao dashad' khyo ye" lo" wa,- ngo wa gatau dashad' khyo ye" lo" nae"- ga: ta" ra".

¹⁰Lod wa gam: sho' qu" mung: Zoa khyo ye" lo" ra" khyo cao" yang: Yodan gyaung: lao: khaung: geim" mae qid myo: sho' jo, mung: ASANG: khyae we' dau: ru mangad: lao"- Egutu mung" we' dau: rure yao: Myao: ra". (Ce wa Sodom we' Gomora vogaung: re Mao"So: yang maphyo' qheim" pye' shire ngad: ra".)

¹¹Airumung: Lod wa yao" qhid' mae" Yodan gyaung: lao: geim: geim" re khyin: yu mung: ba thug' shad' khyo qui" ye" lo" ra". Ceru wa yao: shid' pha: jho" gao" lo" ra" khyo ngad: ra".

¹²Abram wa Khanan mung" mae thang: na: ra". Lod wa lao: geim: mae" vogaung: jham: phaung mae yecao: na mung: Sodom nhae mae thang yang: zaung yekad' na: ra".

¹³Sodom vogaung: byu qe wa makhyang" ru we' ASANG: qhid' kheim: mae qobo shad' lhoe" ra" mo, ngad: ako".

¹⁴Lod thug' lo" thao re ASANG wa Abram re nao na: ra" jo, qo mae" shad' khao: ngo" khyo nyang" za: qu" wa,-

¹⁵Ngo wa nao myao: ra" mug: myid alhab' re nao we' ni" myid:zo: qere byid: nae". Aiwa apyad ato ni" nho: mug: myid ngad: li" nae".

¹⁶Ngo wa nao re khag' re: matho' nghe' nae" myid:zo: myo: sho' re byid: nae". Aiwa myid gaung mae" badan alhab' re nghe' laui: re za: alaui nae".

¹⁷Ana" ye: mung: mung" geim" re yequ" wa,- pe"mung:ga"re ngo wa ai: gu: alhab' re nao re byid: nae"- ga: ta" ra".

¹⁸Ailao" Abram wa yao" jamu re qhui: mung: Hebron mae" Gyang" Lho" sag' gae jham yaug: ra" Mamre nhae mae yete" na: ra". Ai mae yao: wa ASANG: qhid' mae" phan dalam: kad' ra".