Read Maru APAN AQAO: 16 Bible Online

APAN AQAO: 16 - Maru bible

APAN AQAO: 16

¹Abram nho: yham sang myhi" Sarai wa yao" qhid' mae" zo: dau dayaug re: makhau byid: ngad:ra". Sarai kam" wa Hagara ga: mang: ra" Egutu jeim myhi" dayaug qo" ra".

²Airumung: yao: wa Abram re ASANG wa ngore zo: dau qo" nae" rure tam" pye' ava"-nao wa ye: mung: nga" jeim myhi" we' yab wa, yao: wa nga" qhid' mae" zoshao qo" khau byid: maba -ga: ta" ra". Abram wa Sarai ta" rure myid vang" ra".

³Airumung: Sarai wa Hagara re myingai kad' nae" qhid' mae" yao: re ab byid' ra". (Ceru boe" ru wa Abram Khanan mung" mae daxe zin na thao re boe: ru ngad: ra".)

⁴Abram wa Hagara we' gaung sho: zam" mung: Hagara gaung la" li" ra". Hagara wa yao: gaung la" li" rure ba lao" yao: wa nhag' lam: myhao: li" mung: Sarai re maphug' makhyad' kad' ra".

⁵Ailao" Sarai wa Abram re Hagara ngore maphug' makhyad' kad' ru wa ni" qobo ngad: ra". Yao: re ngoyang yao:- nao re ab byid' ru ngad:- yao: gaung la" rure ba: ra" ayo, mae" yao: wa ngore maphug' makhyad' kad' ra". Nao we' ngo khoyaug jo: rure ASANG wa nga" shid' tao re dao: kho' byid: vashao: wo"- ga: ta" ra".

⁶Abram wa gai va" yao: wa ni" jeim ngad mung: ni" qao: mae na yaug ngad: ra". Yao: re nao nug: ra" khyo" kad' wa, ga: tau" ra". Amung: Sarai wa yao: re gyai thin: ra" khyo" se' da: be, khyad' kad' ra". Amung: Hagara wa phao: lo" ra".

⁷ASANG: mug: lagyo: wa Shura khyo ye" ra" khyodang din"pyad' yo jo; ra" qid thug' mae Hagara re li" qhug' ra".

⁸Yao: wa Hagara re Sarai nho: jeim myhi" Hagara we" nao khai: mae" li" mung: khai: khyo ye: nae" ein: i? ga: myid' ra". Yao: wa ngo wa nga" asang myhi" tau mae" phao: lhau: ru ngad: ga: phaug' tau" ra".

⁹Ailao" mug: lagyo: wa yao: jhao" dam: tug' phao: lo" mung: yao" jeim lo" dam: doe, wa,- ga: ta" ra".

¹⁰Ai: thao yao: wa khag' re: maqo" nghe' genae" ra" myid:zo: myo: sho' ngo nao re byid: nae".

¹¹Nao wa yauggai zo: dayaug khau zai ngad: ra". Nao wa yao: re Ishmae mhang" byid' li" nae". Pe"mung:ga"re ASANG wa ni" nho: khyag' qhui yang: gyi: ngug: ra" thoe re gyo: byid' ava".

¹²Ni" yauggai zo: kam" wa loze lae" we' dakhyo: daui: na: li" nae". Yao: wa yaug khao: ngo" re gye kad' mung: yaug khao: ngo" re: yao: re gye kad' li" genae". Yao: wa yao" ba nam ug zo: qe we' gao: mung: gatau mae na: li" nae".

¹³Hagara wa yao: yao" gaung re- ngo wa Mao"So re gaigai: myao mung: ai: khyo re ta" kyo: nae". Daui: na va" laug i? ga: myid' ra". Airumung: yao: re dao: jhau: ra" ASANG re- myao: ra" Mao"So ga: mhang" byid' ra".

¹⁴Ce: mathao mae mo,byu qe wa Kade we' Bered agyo: mae" qid thaung: re- ngore myao: ra" Daui: na: ra" Yaug: qid thaung: ga: mhang" ako".

¹⁵Hagara wa Abram re yauggai zo: dayaug khau byid: mung: yao: re Ishmae ga: mhang" byid' ra".

¹⁶Ai: ayo, mae Abram wa she' xe: khyaug' zin: ngad: ava".