Read Maru APAN AQAO: 18 Bible Online

APAN AQAO: 18 - Maru bible

APAN AQAO: 18

¹ASANG wa Abraham re Mamre mae" gyang" lho" ra" sag' gae jham: nhae mae li" na: qhu" byid' ra". Abraham wa na" gaung ba je: laung: thao" ra" yo, yao" Jamu kham: dung: mae zaung: jo; au:-

²Yao: qu" ke' re byu sam yaug ye; jo, ko" rure myao: ra". Yao: bam re yao myao we' tao" thug' lo" mung: yao: bam re yetug: yu: ra". Yao" myo, khung: myid gaung mae tin: sho' goe; gyo" mung:-

³Nga" ASANG qe we" jeju we' nga" yham mae mathang lo: dalai: lo" byid: gela, ngo wa naonhaung" re caung da" byid: nae" qhid' mae" cemae na: jo; ru ngad:-

⁴Naonhaung" nho: khyid cid' qid cilo byid: geli" naonhaung" wa ce: sag' gae qao: mae myaung: ngho" na shige,.

⁵Ngo wa naonhaung" qhid' mae" zo:ve re: dajhid' ci: li" byid: nae"-airu: yang naonhaung" re: gyaung: xo' su: ye: nae" qam: bo nhao: li" nae". Naonhaung" nga" yham khyo joe" vao li" ko" ra" khyo" yang ngore phug' te' nga: yhe' byid' avako". Arumung: naonhaung" re ngo caung da: byid: gali"- ga: ta" ra". Yao: bam wa jeju qi: va" ngonhaung" khae: yu: ra"- ga: phaug' tau" ako".

⁶Abraham wa zaung khug khyo hin hin za: vao lo" mung: Sara re Ni" nho: gai: thao" ra" cin man" phaui: dathaung yu: yu mung: dajhid' re mug phyad phyad kad' wa,- ga: ta" ra".

⁷Aimung: yao: wa nung: kyaung" khyo tao" thug' ye: mung: xau xau nau" nau" za" ra" nung: nau" dadau: re taung" yu yang: daui daui byu dayaug re byid' ra". Ai: daui daui yaug wa phyad za: se' nyhang" yang: caungda" byid' ra".

⁸Yao: wa nug' pe' we' nung: nug'- amung: nung: sho: we' zo:ve re ai: byu qe: qhid' kheim: mae caung da" byid' ra". Ai: sag' gae qao: mae wa yao: bam re yao: yao: caung da" byid' ra". Amung: yao: bam zo" ako".

⁹Ai: thao re yao: bam wa yao: re- ni" yham sang myhi" Sara khai: mae ngad: i? ga: myid' ako". Yao: wa yao: zaung khug mae na: ra" ga: tau" ra".

¹⁰Yao: bam mae" dayaug wa- ana" mae" lho" gug khye' kyo lao" ngo dam: tug' joe" li" nae". Ni" yham sang myhi" Sara wa yauggai zo:khau: li" nae"- ga: ta" ra". Sara wa yao" nhaung thao" Jamu kham: dung: nhae mae tae" gyo" na: ra".

¹¹Abraham we' Sara tao wa gyai mao" avako". Amung: Sara re: mai maci lo:ngad: ra".

¹²Airumung: Sara wa yao: za: qi mung: ana" ngo wa mao" kyaug' byaug va" ngo wa gaung sho: zam" pyo: khyo qo" kad' shizai i? Aitho' mago" nga" yham sang pho" re: mao: va"- ga: ta" ra".

¹³Ailao" ASANG wa Abraham re Sara wa qi yang: ngo wa gyai mao: thao re gaigai: yao: zoshao qo" khau shinae" ga: pe"mung: ta" ra" i?

¹⁴ASANG: qhid' mae" gyai qug' ru daja: ja: jo; ra" i? ngo ta" va" ru we' dakhyo: ana" mae" lho" gug khye' thao ngo dam: tug' li" nae". Amung: Sara wa yauggai zo:khau: li" nae"- ga: ta" ra".

¹⁵Sara wa gyaug yang: ngo maqi ga: ha: ra"- yao: wa ngad: nao qi: ava" ga: phaug' tau" ra".

¹⁶Ai: thao ai: byu qere wa aimae" to" mung: Sodom vogaung: re myao nae" jo, qo khyo ye" lo" ako". Abraham re: yao: bam re yedai" ke' nae" qhid' mae" yao: bam we' daga" cao" ye" lo" ra".

¹⁷Ailao" ASANG wa yao: yao: za: ngo wa ngo kad' nae" mau" re Abraham re mazug' to: nae"- ga: ta" ra".

¹⁸Yao" nho: myid:zo: qe wa qi" qhang: li" mung: qam: bo: ra" byumyu" boe' li" li" nae" yao: khyo" yang qam: bo: ra" byumyu" boe" li" li" nae" yao: khyo" yang byumyu" alhab' re ngo shaman" byid: nae".

¹⁹Yao" yauggai zo: qere we' yao" myid:zo: qere nga" mho dao: phug' cao" mung: jo: ru we' din:man" ra" khyo" kad' genae" qhid' mae" yao: amyin" qo" byid: nae" qhid' mae" ngo wa yao: re khyin: jaung: to: va". Yao: bam phug' cao" ko" re ngo dao:so: byid' to" ra" ja: alhab' yao" qhid' mae" ngo kad' byid: nae".

²⁰Ai: thao ASANG wa Abraham re Sodom we' Gomora vogaung: re qu" gyaug qu" lhaung sho' qobo zhaug' ra" khyo jham jo, mung: yao: bam: qobo wa gyai qi" ra".

²¹Ngo the' gyo" ra" qobo zhaug' ra" khyo jham wa ngad: ru mangad: ru ba nae" qhid' mae" ngo gyo" ye: ca" ra"- ga: ta" ra".

²²Ailao" byu shid' yaug wa aimae" to" mung: Sodom vogaung: shad' khyo ye" lo" ako". ASANG wa Abraham we' daga" thang: jo; ra".

²³Abraham wa ASANG jhao" te' ye: mung: nao wa qobo maqo" ra" mo, re qobo qo" ra" mo, we' daga" gaigai: yao: phyo' qheim" pye' naeva" i?

²⁴Ai: vomo" mae qobo maqo" ra" byu ngo" xe zo: na: ngad ngad: re nao wa vogaung: geim" phyo' qheim" pye' nae" i? Nao wa ai: byu ngo" xe zo: re khyad' yu nae" qhid' mae" ai: vomo" re matang" to: lo nae" i?

²⁵Nao wa dang za: qobo maqo" ra" mo, re qobo qo" ra" mo, we' daga" mase' pye' nae". Aikhyo wa magai: boe" ngad: ra" nao airu: maqo" kad' ngad: ra". Nao airu: kad' re qobo maqo" ra" mo, wa qobo qo" ra" mo, we' daga" qobo dae byid' ru qhug' li" genae". Airu wa magai: boe" ngad: ra". Myid gaung alhab' mae" tarha" zug: qe wa din: din: man: man: za: dao: kho' ako"- ga: ta" ra".

²⁶ASANG wa Sodom vogaung: mae qobo maqo" ra" byu ngo" xe zo: re ngo myao: re wa ngo wa yao: bam: mathao mae vomo" geim" re tang" to: nae"- ga: phaug' tau" ra".

²⁷Ailao" Abraham wa ASANG we" jeju khyo" ngo nao re xo' yang: vae" jhau: rure qobo khyad' byid: la, ngo wa byu dayaug za: ngad mung: daja: ta" nae" akho: akhang" qo" yaug mangad:-

²⁸Ngadqere: ai: vogaung: mae byu ngo" xe zo: atha" qobo maqo" ra" byu byid xe ngo" yaug na: re na ko" maba ngad: ra". Ngo" zo: nang" ruyang nao wa ai: vomo" geim" re phyo' qheim" pye' nae" i? ga: dam: ta" ra". ASANG wa ai: vomo" mae qobo maqo" ra" byu byid xe: ngo" yaug re ngo myao: ngad: re ngo wa ai: vomo" re maphyo' qheim' pye' nae" ga: phaug' tau" ra".

²⁹Abraham wa ai: vomo" mae qobo maqo" ra" byu byid xe khalhao" na: re na ko" maba ngad: ra" ga: dam: ta" ra". Ailao" yao: wa ai: vomo" mae qobo maqo" ra" byu byid xe: na: ngad: re ngo wa ai: vomo" re maphyo' qheim" pye' nae"- ga: tau" ra".

³⁰Abraham wa ASANG we" jeju khyo" nhag' dayo: wa,-ngo dao: dam: jhau qo shi" ra". Ai: vomo" mae qobo maqo" ra" byu sam xe zo: na: re khoru: i? ga: ta" ra". Yao: wa sam xe zo: re ngo myao: re ngo wa ai: vomo" re maphyo' qheim" pye' nae".

³¹Abraham wa ASANG we" jeju khyo" nao re xo' yang: vae" jhau: rure qobo khyad' byid: la, shid' xe zo: myao: re khoru: i? ga: ta" ra". Yao: wa ai: vomo" mae qobo maqo" ra" byu shid' xe zo: re ngo myao: re ngo wa ai: vomo" re maphyo' qheim" pye' nae"- ga: ta" ra".

³²Abraham wa ASANG we" jeju khyo" nhag' dayo: wa,- ngo dalhang za: ata" lo nae". Daxe zo: myao: re khoru: i? ga: ta" ra". Yao: wa ai: vomo" mae qobo maqo" ra" byu daxe zo: na: ngad: re ngo wa ai: vomo" re maphyo' qheim" pye' nae"- ga: ta" ra".

³³Yao: wa Abraham we' dao: bin: jhau thao re ASANG wa to" ye" lo" mung: Abraham wa yham khyo dam: phao: lo: ra".