Read Maru APAN AQAO: 20 Bible Online

APAN AQAO: 20 - Maru bible

APAN AQAO: 20

¹Abraham wa Mamre mae" Khanan mung" mug: thao tam" khyo byaung" ye: mung: Kade we' Shura agyo: mae yena: ra". Ai: thao yao: wa Gerara mae na: jo; au:-

²Yao: wa yao" yham sang myhi" Sara wa nga"nhaung: ngad: ga: ta" ra". Airumung: Gerara mae" kho:kham Abimeleg wa Sara re yao: jho" jhui" yu: ra".

³Damyi re Mao"So wa yab mo, mae yao: jhao" li" na: qhu" mung:- nao ce: myiqe: re yu ngho" va" ruyang nao wa shid zai ngad: ra". Yao: wa lo, xo'xo' to: va" myiqe: ngad: ra"- ga: ta" ra".

⁴Abimeleg kam" wa yao: jhao" mate' ye: ngad: ra". Yao: wa ASANG we"- ngo wa qobo maqo" yaug ngad: nao wa ngore we' nga" byu qere phyo' qheim" pye' nae" i? ga: ta" ra".

⁵Sara wa nga"nhaung: ngad: ga:- Abraham yao: yao: ta" ra". Sara re: airu: ta" ra". Ngo wa cekhyo re aung khug nhag' lam: gyang: gyang: za: kad' ru ngad:- ngo pe" shad' ru makad' to: ga: ta" ra".

⁶Ailao" Mao"So wa yab mo, mae- Ngad va" nao wa aung khug nhag' lam: gyang: gyang: za: kad' va" rure ngo ba: ra". Airumung: ngore qobo shad' lhoe" nae" rumae" nao re tam" to: mung: yao: re matin: nhao: ru ngad: ga: tau" ra".

⁷Ngadqere: ana" wa, ai: myiqe: re yao" yham sang pho" lo, khyo dam: tug' byid: wa,- yao: wa lapa dayaug ngad mung: nao mashid nae" qhid' mae" yao: wa nao re akyu" mho' byid' li" nae". Ngadqere: nao yao: re madam: tug' byid: re wa nao wa shid zai ngad: nao we' ni" byu qe alhab' shid: li" genae" ein: rure ngo ta" peim: byid: ra"- ga: ta" ra".

⁸Thao: ba ne, seim no' mae" Abimeleg wa yao" zug: ade, qe alhab' khai: yu mung:- boe" lai: lo: ra" khyo re yao: bam re ta" kyo" ra". Amung: yao: bam wa gyaug: din: pye' ako".

⁹Aimung: Abimeleg wa Abraham re khai: yu mung: nao ngonhaung" re pe" kad' va" i? Ngo we' mung"dan: byu qe: dao mae ce: khyag' qhui: rure nao kad' nhao sho' ni" dao mae ngo pe" shad' va" i? Nao ngore kad' ra" ja: khag' makad' qu" ko" ngad: ra".

¹⁰Pe"mung: nao ceru: kad' i? ga: myid' ra".

¹¹Abraham wa cetau mae Mao"So re gyaug phug' ra" byu dayaug re: mana genae" ein: ngo myid: jho: ru we' yao: bam wa nga" yham sang myhi" re the' yu sho' ngore se' li" genae" ein: ngo jho yang: ngad: ra".

¹²Yao: wa gaigai: yao: nga"nhaung: ngad: ra". Yao: wa nga" pho" nho: myiqe: zo:ngad: ra". Ngadqere:nga" myhi" yang khau: ru wa mangad:- amung: ngo yao: re lo, xo' xo' yu: ru ngad: ra".

¹³Mao"So wa ngore nga" pho" yham mae" gatau taung bug byumyu" mang: khyo nhao: ke' ra" au:- ngo wa yao: re- nao wa nga" dao mae khoqhi" jhaug' zaug: rure qhu" byid: nae" qhid' mae"- byumyu" yaug khao: ngo" re- ngo wa ni" mao: ngad:- ein: ta" wa,- ein: ta" to: va"- ga: ra" ra".

¹⁴Ailao"- Abimeleg wa Abraham re Sara dam: tug' byid: mung: ai we' daga" za: yao- nung: we' jeim qere re: yao: re byid' ra".

¹⁵Yao: wa Abraham re C+e wa nga" mung"dan: za: ngad: ra". Nao nug: o: ra" jo, qo mae na wa, ga: ta" ra".

¹⁶Yao: wa Sara re- nao wa qobo maqo" yaug ngad: rure nao we' daga" ngad: ra" mo, alhab' re sagse: qhu" byid' ra" khyo"- ngo wa ni" mao: re ngaui dataung byid' ke' ra". Nao pe" makad' shad' rure yaug khao: ngo" ba: li" genae"- ga: ta" ra".

¹⁷Abraham nho: yham sang myhi" Sara re airu: boe" ra" khyo mathao mae Abimeleg nho: kho:kham vang" mae" myiqe: dayaug re: zoshao magai: khau sho' ASANG kad' pye' ra". Airu: mung: Abraham wa Abimeleg qhid' mae" akyu" mho' byid: mung: Mao"So wa yao: re gai byid' ra". Yao: bam zoshao khau genae" qhid' mae" Mao"So wa yao" nho: yham sang myhi" re we' yao" nho: jeim myhi" qere re: gai byid' ra".